បើទោះបីជាខេត្តណាខនរាជសីមា (Nakhon Ratchasima) ស្ថិតនៅភាគឦសានប្រទេសថៃ ដែលសម្បូរទៅដោយរោងចក្រ និងឧស្សាហកម្មជាច្រើន ស្ថិតនៅលើតំបន់ខ្ពង់រាបដែលមានកម្ពស់ពី២០០-២៥០ម៉ែត្រ លើនីវ៉ូទឹកសមុទ្រក៏ដោយ តែខេត្តនេះបានរងផលប៉ះពាល់យ៉ាងធ្ងន់ធ្ងរ ដោយទឹកជំនន់សារជាថ្មី ដោយសារឥទ្ធិពលខ្យល់មូសុង។
ករណីនេះក៏បានបង្កឱ្យមានជាការជន់លិចផ្លូវមួយចំនួន ដែលនាំឱ្យមានការខាតបង់យ៉ាងធ្ងន់ធ្ងរដល់ទ្រព្យសម្បត្តិនិងហេដ្ឋារចនាសម្ព័ន្ធរបស់ប្រជាពលរដ្ឋផងដែរ។
នៅក្នុងបទសម្ភាសជាមួយសារព័ត៌មាន A24 News ប្រធានសភាពាណិជ្ជកម្មខេត្តណាខនរាជសីមា លោក Sakchai Polpanich ថ្លែងថា៖ «ក្នុងឆ្នាំ២០១១ ខ្ញុំធ្លាប់បានរងផលប៉ះពាល់ម្ដងរួចមកហើយ។ នៅពេលនោះ ទឹកជំនន់បានហូរចូលក្នុងផ្ទះរបស់ខ្ញុំ ហើយរថយន្តទាំងអស់របស់ខ្ញុំក៏ត្រូវបានលិចលង់ផងដែរ»។
លោកបន្ថែមថា៖ «កាលពី៤០ទៅ៥០ឆ្នាំមុន ខេត្តរបស់យើងមិនដែលជួបប្រទះបញ្ហាទឹកជំនន់នោះទេ។ វាគឺជារឿងដែលភ្ញាក់ផ្អើលមួយនៅពេលនេះ។ ដូច្នេះហើយ យើងត្រូវតែមានការប្រុងប្រយ័ត្នជាងមុនក្នុងឆ្នាំនេះ។ នៅពេលដែលអភិបាលខេត្តជូនដំណឹងដល់យើង ពួកយើងត្រូវតែប្រញាប់ប្រញាល់រៀបចំនិងដាក់របស់របរចាំបាច់ទាំងឡាយណានៅទីខ្ពស់»។
ប្រជាពលរដ្ឋរងគ្រោះមួយរូបក្នុងស្រុក Sung Noen ខេត្តណាខនរាជសីមា ឱ្យដឹងផងដែរថា៖ «ពួកគេបានរំដោះទឹកតាមបណ្ដាញនានាមកកាន់ទីនេះ។ ក្នុងរយៈពេលតែប៉ុន្មានម៉ោង ទឹកក៏ចាប់ផ្ដើមលិច»។
ប្រជាពលរដ្ឋរងគ្រោះមួយរូប រស់នៅក្នុងស្រុក Mueang ខេត្តណាខនរាជសីមា លោក Krit Sho-pudsa បន្ថែមថា៖ «ករណីទឹកជំនន់ធ្លាប់បានកើតឡើងម្តងហើយកាលពីឆ្នាំ២០១១កន្លងទៅ ខណៈដែលកម្រិតទឹកបានកើនឡើងខ្ពស់កាលពីពេលនោះ។ ទឹកជំនន់ទើបតែកើតឡើងសារជាថ្មីម្តងទៀតនៅក្នុងឆ្នាំនេះ។ ទឹកបានកើនឡើងយ៉ាងលឿន ដោយសារតែវាហូរខ្លាំង ហើយនៅពេលដែលទឹកទាំងនេះមិនអាចហូរបន្តទៅណាបាន វាបង្កឱ្យមានជាទឹកជំនន់នៅក្នុងតំបន់។ បច្ចុប្បន្ន យើងកំពុងតែព្យាយាមដាក់វត្ថុដែលចាំបាច់នានានៅទីខ្ពស់។ យើងមិនដឹងច្បាស់ថាតើវានឹងកើនឡើងខ្ពស់ជាងនេះឬយ៉ាងណានោះទេ»។
លោក Sakchai Polpanich បន្តថា៖ «យើងត្រូវបានកំណត់ជាតំបន់សេដ្ឋកិច្ចពិសេសមួយនៃភូមិភាគឦសាន។ ទាក់ទិននឹងករណីនេះ ខ្ញុំគិតថា រដ្ឋាភិបាលគួរតែអនុវត្តវិធីសាស្រ្តគ្រប់គ្រងទឹកឱ្យមានប្រសិទ្ធភាពជាងនេះ ដើម្បីព្យាករពីបរិមាណទឹកក្នុងទំនប់នីមួយៗ និងអាចឱ្យពួកគេដឹងថាតើត្រូវបញ្ចេញទឹកប៉ុន្មានជាមុន ក្នុងការដាក់បរិមាណទឹកថ្មី។ ខ្ញុំជឿជាក់ថា បច្ចេកវិទ្យាព្យាករណ៍អាកាសធាតុមានភាពជឿនលឿនណាស់នាពេលបច្ចុប្បន្ននេះ»៕
