ប្រជាពលរដ្ឋមួយចំនួនរស់នៅតាមបណ្ដោយស្ទឹងព្រែកត្នោត ក្នុងខណ្ឌដង្កោ រាជធានីភ្នំពេញ កំពុងប្រឈមខ្វះទឹកស្អាតប្រើប្រាស់ ខណៈអណ្ដូងទឹកនិងប្រព័ន្ធទឹកស្អាតត្រូវបានលិចដោយជំនន់ទឹកស្ទឹង។
កាលពីថ្ងៃទី២៥ ខែតុលា រដ្ឋបាលខណ្ឌដង្កោ បានចេញសេចក្ដីជូនដំណឹងដល់ប្រជាពលរដ្ឋដែលរស់នៅជាប់សណ្ដស្ទឹងព្រែកត្នោត រួមមាន សង្កាត់ដង្កោ សង្កាត់ព្រៃស សង្កាត់ព្រៃវែង សង្កាត់ក្រាំងពង្រ សង្កាត់ស្ពានថ្ម សង្កាត់ទៀន សង្កាត់សាក់សំពៅ សង្កាត់ជើងឯក សង្កាត់ព្រែកកំពឹស និងសង្កាត់គងនយ ត្រូវត្រៀមសម្ភារនិងបន្តតាមដានស្ថានភាពទឹកជាប្រចាំ ដើម្បីចៀសវាងការបាត់បង់សម្ភារនិងអាយុជីវិត។
អ្នកស្រី នូន កែម រស់នៅជាប់សណ្ដស្ទឹងព្រែកត្នោត ក្នុងភូមិបាគូ សង្កាត់ដង្កោ ខណ្ឌដង្កោ ប្រាប់ វីអូឌី នៅថ្ងៃព្រហស្បតិ៍នេះថា នៅក្នុងភូមិនេះមានប្រជាពលរដ្ឋប្រហែលជិត១០០គ្រួសារដែលបានលិចលង់ដោយទឹកស្ទឹងព្រែកត្នោត និងបានជម្លៀសទៅនៅទីទួលសុវត្ថិភាព។
អ្នកស្រីបន្តថា រយៈពេលនៃការជន់លិចផ្ទះប៉ុន្មានថ្ងៃមកនេះ បានធ្វើឱ្យអ្នកស្រីនិងពលរដ្ឋក្នុងភូមិជួបការលំបាកជាច្រើន ដូចជា ការខូចខាតទ្រព្យសម្បត្តិ ខ្វះខាតស្បៀងអាហារ គ្មានបង្គន់អនាម័យប្រើប្រាស់ និងពុំមានទឹកស្អាតប្រើប្រាស់ ជាដើម។
អ្នកស្រី នូន កែម បន្ថែមថា៖ «ពេល[ទឹកជំនន់] ពួកខ្ញុំពិបាកណាស់ ភ្លើងក៏គេផ្ដាច់ ទឹកក៏អត់ប្រើប្រាស់ យើងទិញទឹកគេហូប។ បង្គាន់អនាម័យអីក៏យើងពិបាកដែរ ដោយសារវាលិចអស់ហើយ។ យើងមកបត់ជើងនៅផ្ទះគេ ដែលមិនទាន់លិច។ គេចែករំលែកឱ្យយើងប្រើប្រាស់ដែរ»។
ពលរដ្ឋម្នាក់ទៀតរស់នៅជាប់សណ្ដស្ទឹងព្រែកត្នោតក្នុងភូមិបាគូ លោក សុង ឈុនលី និយាយថា ការជន់លិចដោយជំនន់ទឹកស្ទឹងព្រែកត្នោតនេះ បានធ្វើឱ្យហេដ្ឋារចនាសម្ព័ន្ធ ជាពិសេសផ្លូវក្នុងសហគមន៍ អណ្ដូងទឹក និងបង្គន់អនាម័យ បានរងការខូចខាតមិនអាចប្រើប្រាស់បាន។
ពលរដ្ឋរូបនេះក៏បារម្ភសុវត្ថិភាពនិងសុខភាពរបស់ក្មេងៗនៅសហគមន៍ផងដែរ ប្រសិនទឹកស្ទឹងព្រែកត្នោតនៅតែបន្តហក់ឡើងខ្ពស់។
លោកបន្ថែមថា៖ «និយាយទៅ ពួកយើងលំបាកច្រើនណាស់ យើងខូចខាតទ្រព្យសម្បត្តិមួយចំនួនដែលយើងយកមកមិនទាន់ អណ្ដូងវាលិច ម៉ូទ័រយើងបូមអត់កើតទៀត ភ្លើងក៏វាដាច់ទៀត។ ខ្ញុំអំពាវនាវដល់អាជ្ញាធរពាក់ព័ន្ធ សប្បុរសជន និងអ្នកមានៗ ជួយទំនុកបម្រុងដល់ទុក្ខលំបាករបស់ប្រជាពលរដ្ឋយើងនេះ»។
យ៉ាងណា លោក សុង ឈុនលី ឱ្យដឹងថា អំឡុងពេលមានទឹកជំនន់ប៉ុន្មានថ្ងៃមកនេះ ខាងអាជ្ញាធរពាក់ព័ន្ធមួយចំនួនក៏បានយកអំណោយ ដូចជា ស្បៀងអាហារ និងរបស់ប្រើប្រាស់មួយចំនួនមកចែកជូនប្រជាពលរដ្ឋជាបន្តបន្ទាប់ផងដែរ។
ចៅសង្កាត់ដង្កោ លោកស្រី សឿង សេរី មានប្រសាសន៍ថា អាជ្ញាធរមូលដ្ឋានតែងតែចុះចែកអំណោយនិងផ្ដល់ថវិកាជាបន្តបន្ទាប់ ដើម្បីឱ្យពលរដ្ឋទាំងនោះមានលទ្ធភាពអាចទិញទឹកស្អាតមកប្រើប្រាស់ក្នុងគ្រួសារបាន។ លោកស្រីថា ក្នុងសង្កាត់ដង្កោ មានពលរដ្ឋ៥១៥គ្រួសារប៉ុណ្ណោះដែលបានរងផលប៉ះពាល់ដោយទឹកជំនន់ស្ទឹងព្រែកត្នោត។
លោកស្រីបន្ថែមថា៖ «មីងមិនបានផ្ដល់ទឹកជូនពួកគាត់ទេ ប៉ុន្តែខ្ញុំបានជូនលុយគាត់២ម៉ឺនរៀលជាបន្តបន្ទាប់ ដើម្បីឱ្យពួកគាត់បែងចែកលើការចំណាយផ្សេងៗ សម្រាប់ទិញទឹកប្រើប្រាស់ និងទឹករបស់របរអីផ្សេងទៀត»។
រដ្ឋបាលរាជធានីភ្នំពេញ បានឱ្យដឹងថា អភិបាលរាជធានីភ្នំពេញ នៅថ្ងៃទី២៨ ខែតុលា ឆ្នាំ២០២១នេះ បានយកអំណោយចែកជូនប្រជាពលរដ្ឋ៥១៥គ្រួសារដែលរងគ្រោះដោយការជន់លិច នៃស្ទឹងព្រែកត្នោត ខណៈស្ថានភាពទឹកស្ទឹងនៅថ្ងៃនេះបានស្រកចុះ៤តឹក បើធៀបពីថ្ងៃម្សិលមិញ៕
