ស្ថានភាពទឹកជំនន់ស្ទឹងព្រែកត្នោតបានធូរស្រាលឡើងវិញហើយ គិតត្រឹមរសៀលថ្ងៃទី២៩ ខែតុលានេះ ខណៈប្រជាពលរដ្ឋប្រមាណជាង៣ ០០០គ្រួសារ នៅរាជធានីភ្នំពេញ និងខេត្តកណ្ដាល បានរងផលប៉ះពាល់។
អ្នកនាំពាក្យគណៈកម្មាធិការជាតិគ្រប់គ្រងគ្រោះមហន្តរាយ លោក ឃុន សុខា បានប្រាប់ វីអូឌី ថាក្នុងចំណោមប្រជាពលរដ្ឋដែលរងផលប៉ះពាល់ពីទឹកជំនន់ស្ទឹងព្រែកត្នោតជាង៣ ០០០គ្រួសារនេះ គឺនៅរាជធានីភ្នំពេញចំនួន១ ៨០០គ្រួសារ និងពលរដ្ឋនៅខេត្តកណ្ដាលចំនួន១ ២០០គ្រួសារ។ លោកបន្ថែមថា បើទោះបីជាស្ថានភាពទឹកជំនន់ស្ទឹងព្រែកត្នោតបានស្រកចុះក្ដី តែប្រជាពលរដ្ឋរងគ្រោះនៅក្នុងខេត្តកណ្ដាលដែលបានជម្លៀសមកកាន់ទីទួលសុវត្ថិភាពនាពេលកន្លងមក នៅមិនទាន់អាចវិលទៅលំនៅដ្ឋានវិញបាននៅឡើយទេ។
លោកលើកឡើងថា៖ «ឥលូវនេះ នៅភូមិសាស្រ្តរាជធានីភ្នំពេញអត់អីទេ ពួកគាត់នៅផ្ទះដដែលទេ។ រីឯនៅខេត្តកណ្ដាល ប្រជាពលរដ្ឋមួយចំនួនតូចទេដែលនៅទីទួលសុវត្ថិភាព ក្រៅពីនោះ ពួកគាត់នៅតាមផ្ទះនៅឡើយ ព្រោះទឹកជំនន់មិនទាន់ធ្ងន់ធ្ងរពេកដែលធ្វើឱ្យយើងជម្លៀសពួកគាត់ទាំងអស់ទេ»។
អភិបាលខណ្ឌដង្កោ លោកស្រី តឹម ញឹប គូសបញ្ជាក់ថា សម្រាប់ស្ថានភាពទឹកលិចនៅខណ្ឌដង្កោ នៅពេលនេះស្រកអស់ហើយ ហើយខណៈនេះ លោកស្រីកំពុងស្នើសុំអភិបាលរាជធានីភ្នំពេញ ដើម្បីយករថយន្តដឹកទឹកសម្រាប់បាញ់សម្អាតផ្ទះរបស់ប្រជាពលរដ្ឋ។
ប្រធានមន្ទីរធនធានទឹក និងឧតុនិយមខេត្តកណ្ដាល លោក អ៊ុក វណ្ណា បានលើកឡើងថា នៅភូមិសាស្រ្តខេត្តកណ្ដាល ទឹកស្រកតិចតួចប៉ុណ្ណោះបើធៀបនឹងរាជធានីភ្នំពេញ នៅក្នុងរយៈពេល២៤ម៉ោងនេះ។ លោកថា មូលហេតុ ដោយសារនៅរាជធានីភ្នំពេញ គឺស្ថិតនៅចំមុខតួនៃស្ទឹងព្រែកត្នោត ទឹកហូរលឿន។
លោកបន្តថា៖ «ពីរថ្ងៃនេះ នៅភ្នំពេញតាំងពីថ្ងៃបាក់[ទំនប់]មក ទឹកស្រកចូលមួយម៉ែត្រកន្លះ ហើយ បើនៅខេត្តកណ្ដាលគឺអត់ទេ។ នៅខេត្តកណ្ដាល វាអាចលំហូរមកចូលតំបន់ទំនាប អ៊ីចឹងបានស្រកតិចតួចជាងនៅភ្នំពេញ។ ២ថ្ងៃដូចគ្នា [ខេត្តកណ្ដាល]ស្រកបានតែ២តឹកជាងប៉ុណ្ណោះ»។
ប្រធានមន្ទីរធនធានទឹក និងឧតុនិយមខេត្តកំពង់ស្ពឺ លោក ញាញ់ ជាបហ៊ង បញ្ជាក់ថា ស្ថានភាពទឹកស្ទឹងព្រែកត្នោតបានវិលមករកភាពប្រក្រតីវិញហើយ តាំងពីថ្ងៃទី២៨ ខែតុលាម្សិលមិញនេះ ដោយសារល្បឿនទឹកហូរលឿន។ តែយ៉ាងណា លោកថា ទឹកជំនន់ស្ទឹងព្រែកត្នោតនេះបង្កឱ្យមានផលប៉ះពាល់ច្រើនឃុំដែរ តែលោកនៅមិនទាន់អាចបញ្ជាក់ពីតួលេខផលប៉ះពាល់បាននៅឡើយទេ។
លោកបន្តថា៖ «តាមមើលស្ថានភាពនេះ មិនអាចបង្កឱ្យមានទឹកជំនន់អីទៀតនោះទេក្នុងខេត្តកំពង់ស្ពឺ គ្រាន់តែភ្លៀងនិងបរិមាណទឹកដូចជាមិនច្រើនទេ លុះត្រាតែមានព្យុះចូល ដែលអាចភ្លៀងខ្លាំង៣ថ្ងៃជាប់គ្នាដូចពេលមុន បានទប់អត់ជាប់។ បើភ្លៀងធម្មតាៗតាមរដូវកាល អត់អីទេ»។
ក្រសួងធនធានទឹក និងឧតុនិយម កាលពីថ្ងៃទី២៨ ខែតុលាម្សិលមិញ បានចេញសេចក្ដីជូនដំណឹងថ្មីមួយទៀតស្ដីពីស្ថានភាពអាកាសធាតុនៅកម្ពុជា ថានឹងទទួលរងឥទ្ធិពលចំនួនពីរទៀតចាប់ពីថ្ងៃទី២៧ ដល់ថ្ងៃទី២៨ ខែតុលា និងពីថ្ងៃទី២៩ ដល់ថ្ងៃទី២ ខែវិច្ឆិកា ដែលអាចបង្កជាជំនន់ទឹកភ្លៀងនៅតាមខេត្តមួយចំនួនទៀត៕