អ្នកជំនាញផ្នែកហិរញ្ញវត្ថុ លើកឡើងថា កម្ចីតាមប្រព័ន្ធអនឡាញភាគច្រើនជាអាជីវកម្មខុសច្បាប់ដែលធ្វើឱ្យអ្នកខ្ចីងាយនឹងធ្លាក់ក្នុងអន្ទាក់បំណុល ខណៈការប្រាក់ខ្ពស់ ហើយកម្ចីប្រភេទនេះពុំមានយន្តការដើម្បីការពារអតិថិជននោះឡើយ។
ការផ្ដល់កម្ចីតាមប្រព័ន្ធអនឡាញ ត្រូវបានគេមើលឃើញថា មានភាពផុសផុលនៅលើបណ្ដាញសង្គម ហើយមកទល់ពេលនេះ មិនទាន់មានការបញ្ជាក់ច្បាស់លាស់ណាមួយពីស្ថាប័នពាក់ព័ន្ធរបស់រដ្ឋាភិបាល អំពីប្រភេទកម្ចីអនឡាញណាដែលអាចទុកចិត្តបាន និងប្រភេទកម្ចីណាដែលខុសច្បាប់ឬក្រោមលក្ខខណ្ឌបោកប្រាស់នៅឡើយទេ។
អ្នកនាំពាក្យសមាគមគ្រឹះស្ថានមីក្រូហិរញ្ញវត្ថុកម្ពុជា លោក កាំង តុងងី មានប្រសាសន៍នៅថ្ងៃទី២៨ ខែតុលា ថាអាជីវកម្មផ្ដល់កម្ចីតាមអនឡាញភាគច្រើនជាអាជីវកម្មខុសច្បាប់ ហើយមួយចំនួននៃការផ្សព្វផ្សាយទាំងនេះជាការបោកប្រាស់ ដោយតម្រូវឱ្យអតិថិជនបង់លុយមុន ហើយទំព័រហ្វេសប៊ុកឬផេកទាំងអស់នោះនឹងមិនផ្ដល់កម្ចីដូចការសន្យាឡើយ។
ក្នុងករណីខ្លះ លោកថា ផេកអនឡាញទាំងនោះតម្រូវឱ្យអតិថិជនថតរូបអាក្រាត ហើយក្រោយមកបានប្រើប្រាស់រូបភាពទាំងនោះជំរិតទារប្រាក់ពីអតិថិជនក៏មាន។
លោក កាំង តុងងី បន្តថា៖ «សូមកុំប្រើប្រាស់សេវាប្រាក់កម្ចីដែលផ្ដល់ដោយក្រុមហ៊ុនអនឡាញទាំងអស់នោះ ឬសេវាផ្ដល់ប្រាក់កម្ចីដែលផ្ដល់ដោយអ្នករកស៊ីចងការប្រាក់ឯកជនអីជាដើមហ្នឹង ពីព្រោះក្រៅពីការប្រាក់ថ្លៃហើយ គឺពួកគាត់ពុំមានយន្តការការពារអតិថិជនទេ។ ជាក់ស្តែង យើងឃើញថា កន្លងមក មានការប្រើប្រាស់អំពើហិង្សា ការគំរាមកំហែង ការជំរិតទារប្រាក់ពីអតិថិជន ជាដើម»។
លោកថា នៅកម្ពុជា ក្រុមហ៊ុនដែលផ្ដល់ប្រាក់កម្ចី លុះណាតែទទួលបានអាជ្ញាបណ្ណពីធនាគារជាតិនៃកម្ពុជា ដែលរួមមាន ធនាគារ គ្រឹះស្ថានមីក្រូហិរញ្ញវត្ថុ ក្រុមហ៊ុនភតិសន្យាហិរញ្ញវត្ថុ (Leasing) និងគ្រឹះស្ថានឥណទានជនបទ ជាដើម។
លោក កាំង តុងងី បន្ថែមថា ការបង្ក្រាបទៅលើអាជីវកម្មខុសច្បាប់តាមប្រព័ន្ធអនឡាញនេះមានភាពស្មុគស្មាញ ដោយសារតែជនឧក្រិដ្ឋទាំងអស់នោះមិនមានឈ្មោះពិតប្រាកដ មិនមានទីតាំងច្បាស់លាស់ និងមិនមានអត្តសញ្ញាណទេ។
យ៉ាងណា លោកប្រាប់ឱ្យជនរងគ្រោះប្ដឹងទៅអាជ្ញាធរ ដើម្បីកំណត់អត្តសញ្ញាណឧក្រិដ្ឋជនតែម្តង ហើយមហាជនក៏អាចរាយការណ៍ (Report) ថាជាអាជីវកម្មខុសច្បាប់បានដែរ នៅពេលឃើញការផ្សព្វផ្សាយអាជីវកម្មកម្ចីអនឡាញទាំងនោះនៅលើបណ្ដាញសង្គម។
វិនិយោគិន និងជាអ្នកជំនាញផ្នែកហិរញ្ញវត្ថុ លោក ង៉ែត ជូ មានប្រសាសន៍ថា កម្ចីអនឡាញមិនស្ថិតនៅក្រោមការត្រួតពិនិត្យរបស់អាជ្ញាធររដ្ឋឬធនាគារជាតិនៃកម្ពុជាឡើយ។ លោកថា កម្ចីអនឡាញ មានការប្រាក់ខ្ពស់ មិនអាចយកមករកស៊ីបានទេ ហើយអាចមានគ្រោះថ្នាក់សម្រាប់ពលរដ្ឋទៀតផង ខណៈអ្នកផ្ដល់កម្ចីនោះពុំបានសិក្សាវាយតម្លៃថាតើអ្នកខ្ចីមានលទ្ធភាពសងឬអត់ ស្របពេលពលរដ្ឋកម្ពុជាដែលមិនមានចំណេះដឹងផ្នែកហិរញ្ញវត្ថុមានរហូតដល់ទៅជាង៨០%។
លោកបន្តថា បើពលរដ្ឋចង់បានកម្ចីសម្រាប់ប្រើប្រាស់ ពួកគាត់គួរទៅរកខ្ចីតែស្ថាប័នដែលមានអាជ្ញាបណ្ណពីធនាគារជាតិនៃកម្ពុជា ព្រោះស្ថាប័នទាំងនោះមានវិជ្ជាជីវៈត្រឹមត្រូវ ក៏ដូចជាតែងតែពិនិត្យលើលទ្ធភាពរបស់អ្នកចង់បានកម្ចី មុនពេលផ្ដល់ជូន។
លោក ង៉ែត ជូ និយាយថា៖ «ចៀសវាងកុំប្រើកម្ចីពីប្រភពកម្ចីអនឡាញ កម្ចីឈ្មួញចងការនៅតាមផ្សារ នៅតាមភូមិ កម្ចីដេញតុងទីនក៏ជាបញ្ហាដែរ ហើយកម្ចីដែលគេផ្ដល់ជាការបង់រម្លស់សម្ភារអីហ្នឹងសុទ្ធតែជាបញ្ហា»។
លោក ង៉ែត ជូ ឱ្យដឹងទៀតថា អ្នកចង់បានកម្ចីក៏ត្រូវមានភាពស្មោះត្រង់ក្នុងការខ្ចី ពោលគឺប្រាប់មន្ត្រីហិរញ្ញវត្ថុឱ្យចំ ថាយកកម្ចីទៅធ្វើអ្វីឱ្យប្រាកដ ដូចជា ការខ្ចីដើម្បីយកទៅទិញជី ឬថ្នាំកសិកម្មជាដើម នោះគឺហៅថាជាការខ្ចីដើម្បីប្រើប្រាស់ឱ្យចំគោលដៅហើយ។
អ្នកនាំពាក្យក្រសួងសេដ្ឋកិច្ច និងហិរញ្ញវត្ថុ លោក មាស សុខសេនសាន សុំមិនធ្វើការបកស្រាយជុំវិញករណីនេះ ដោយបង្វែរសំណួរអ្នកសារព័ត៌មានឱ្យសួរទៅខាងធនាគារជាតិវិញ។
វីអូឌី មិនអាចទាក់ទងទេសាភិបាលធនាគារជាតិនៃកម្ពុជា លោក ជា ចាន់តូ និងអ្នកនាំពាក្យធនាគារជាតិនៃកម្ពុជា លោកស្រី ជា សិរី បានទេ។
ដោយឡែក អ្នកនាំពាក្យក្រសួងមហាផ្ទៃ លោក ខៀវ សុភ័គ មានប្រសាសន៍ថា កម្ចីអនឡាញមិនមានអ្វីជាភស្តុតាង មិនមានក្រដាសស្នាម និងមិនមានសាក្សី ដែលនេះជាបញ្ហាពិបាកក្នុងការរកយុត្តិធម៌ណាស់។ លោកបន្ថែមថា ជាក់ស្តែង នៅពេលឡើងតុលាការ គេតែងសួររកសាក្សី និងក្រដាសស្នាមពាក់ព័ន្ធ។
លោក ខៀវ សុភ័គ ថាកម្ចីអនឡាញនេះពិបាកក្នុងការវិនិច្ឆយថាខុសឬត្រូវច្បាប់ណាស់ ព្រោះមិនមានច្បាប់ចែងទេនៅកម្ពុជា ហើយវាជាសេរីភាពរបស់បុគ្គល។
លោកមានប្រសាសន៍ថា៖ «បើយើងអត់មានច្បាប់ចែងផង បើថាខុសច្បាប់ តើយកច្បាប់ណាមកថា? បើយើងថាត្រូវ តើយកច្បាប់ណាមកថា? វាជាសិទ្ធិសេរីភាពរបស់គេ។ យើងអត់មានច្បាប់ចែងរឿងហ្នឹងផង បើមានច្បាប់ [កម្ចីអនឡាញ] ធនាគារជាតិអីបានគេដឹងច្បាស់រឿងហ្នឹង»។
កាលពីថ្ងៃទី១៨ ខែតុលា ឆ្នាំ២០២១ ធនាគារអភិវឌ្ឍន៍អាស៊ី (ADB) បានចេញសេចក្ដីប្រកាសព័ត៌មានមួយ ដោយថា ពលរដ្ឋកម្ពុជាចំនួន ១៨% ប៉ុណ្ណោះដែលមានចំណេះដឹងផ្នែកហិរញ្ញវត្ថុ ខណៈពលរដ្ឋភាគច្រើនលើសលុប ជាពិសេសពលរដ្ឋក្រីក្រ លទ្ធភាពទទួលបានផលិតផលនិងសេវាកម្មហិរញ្ញវត្ថុនៅមានកម្រិត ហើយចំណេះដឹងផ្នែកហិរញ្ញវត្ថុនៅទាបថែមទៀតផង។
បញ្ហានេះ អ្នកជំនាញផ្នែកហិរញ្ញវត្ថុ យល់ថា អាចធ្វើឱ្យពលរដ្ឋងាយសម្រេចចិត្តខុសក្នុងការប្រើប្រាស់សេវាហិរញ្ញវត្ថុ ពិសេសងាយនឹងធ្លាក់ទៅក្នុងអន្ទាក់នៃបំណុលដោះខ្លួនមិនរួច៕
