អ្នកនយោបាយខ្មែរ បានផ្ញើសារថ្វាយព្រះពរព្រះមហាក្រត្រ ព្រះបាទសម្ដេច ព្រះបរមនាថ នរោត្ដម សីហមុនី ក្នុងខួបឡើងគ្រងរាជសម្បត្តិរបស់ព្រះអង្គ ផ្សេងៗគ្នា ក្នុងនោះមានទាំងសារជូនពរព្រះអង្គ ឱ្យទទួលបានជោគជ័យក្នុងព្រះរាជទស្សនកិច្ចដ៏ខ្ពង់ខ្ពស់ដើម្បីផ្សះផ្សាជាតិ ខណៈវិបត្តិនយោបាយនៅបន្តអូសបន្លាយ។
នៅថ្ងៃទី២៩ ខែតុលា ឆ្នាំ២០២១នេះ ជាខួប១៧ឆ្នាំនៃការឡើងគ្រងរាជសម្បត្តិរបស់ព្រះករុណា ព្រះបាទសម្តេច ព្រះបរមនាថ នរោត្ដម សីហមុនី ព្រះមហាក្សត្រខ្មែរ។
ក្នុងខួបនេះ លោកនាយករដ្ឋមន្ត្រី ហ៊ុន សែន បានសរសេរសារនៅលិខិតថ្វាយព្រះពរព្រះអង្គឱ្យមាន «ព្រះបញ្ញាញាណភ្លឺថ្លាវាងវៃ ព្រះជន្មាយុយឺនយូរជាងរយព្រះវស្សា ដើម្បីស្ដេចគង់ប្រថាប់គ្រងព្រះបរមសិរីរាជសម្បត្តិ ជាម្លប់ដល់ប្រជានុរាស្រ្តជាកូនជាចៅរបស់ព្រះអង្គ ជ្រកកោនត្រជាក់ត្រជំសុខដុមរមនា ជាភិយ្យោភាព តរៀងទៅ»។
ចំណែកអតីតមន្ត្រីជាន់ខ្ពស់គណបក្សសង្គ្រោះជាតិ ព្រះអង្គម្ចាស់ ស៊ីសុវត្ថិ ធម្មិកោ បានរំលេចសារលើហ្វេសប៊ុករបស់ព្រះអង្គថា ក្នុងឱកាសខួបទី១៧ឆ្នាំនៃការគ្រងរាជសម្បត្តិនេះ ព្រះអង្គ «សូមថ្វាយព្រះពរ ព្រះករុណា ទទួលបានជោគជ័យក្នុងព្រះរាជទស្សនកិច្ចដ៏ខ្ពង់ខ្ពស់បំផុត ដើម្បីផ្សះផ្សា រួបរួមជាតិ និងកសាងសន្តិភាពពិតប្រាកដជូនប្រជារាស្ត្ររបស់ព្រះអង្គ»។
បន្ថែមពីនេះ ព្រះអង្គមានព្រះរាជបន្ទូលប្រាប់ VOD នៅថ្ងៃសុក្រនេះថា ការផ្ញើសារបែបនេះ ដោយសារព្រះអង្គទតឃើញថា បច្ចុប្បន្ន កម្ពុជាកំពុងមានវិបត្តិនយោបាយនៅឡើយ ក្រោយមានការរំលាយគណបក្សសង្គ្រោះជាតិ។
ព្រះអង្គបន្តថា ដូចជាករណីលោក កឹម សុខា ក៏មិនទាន់ត្រូវបានដោះស្រាយដែរ រួមទាំងបញ្ហាសេដ្ឋកិច្ចកំពុងជួបបញ្ហាធ្ងន់ធ្ងរដោយសារតែជំងឺកូវីដ-១៩ និងបញ្ហាទឹកជំនន់។
ព្រះអង្គមានបន្ទូលបន្តថា៖ «ដូច្នេះ តាមការយល់ឃើញរបស់ខ្ញុំ ព្រះករុណាជានិមិត្តរូបនៃឯកភាពជាតិ ដូច្នេះលោកមានព្រះរាជទស្សនកិច្ច ត្រូវបង្រួបបង្រួមជាតិ! ផ្សះផ្សាជាតិ ដើម្បីអី? ដើម្បីឱ្យយើងទាំងអស់គ្នាពួតដៃកសាងជាតិទាំងអស់គ្នា»។
អគ្គលេខាធិការគណបក្សប្រជាធិបតេយ្យមូលដ្ឋាន លោកបណ្ឌិត សាម អ៊ីន មានប្រសាសន៍ថា ១៧ឆ្នាំមកនេះ ព្រះមហាក្សត្របានបំពេញព្រះរាជតួនាទីតាមរដ្ឋធម្មនុញ្ញ ជាព្រះមហាក្សត្រ ឡើងគ្រងរាជ តែមិនកាន់អំណាច ដូចមានចែងក្នុងរដ្ឋធម្មនុញ្ញ ដែលការនេះ លោកយល់ថា ជាកំហុសឆ្គងមួយដែលអ្នកនយោបាយខ្លះបានរិះគន់ព្រះអង្គថាមិនបំពេញតួនាទីដើម្បីផ្សះផ្សាជាតិ។
បើតាមលោក សាម អ៊ីន ពិតប្រាកដណាស់ ព្រះមហាក្សត្រអាចដើរតួនាទីឱ្យមានការបង្រួបបង្រួមជាតិ ប៉ុន្តែលោកថា ភាពជោគជ័យឬមិនជោគជ័យ អាស្រ័យលើឆន្ទៈអ្នកនយោបាយគ្រប់គ្នា។
លោកថា៖ «ព្រះអង្គបានបំពេញតួនាទីរបស់ព្រះអង្គហើយ ត្រង់យើងជាអ្នកនយោបាយធ្វើមិនបានជោគជ័យ ជាការទទួលខុសត្រូវរបស់អ្នកនយោបាយរៀងៗខ្លួន ហើយសូមកុំប្រើភាសាប្រមាថព្រះមហាក្សត្រ»។
អតីតមេដឹកនាំបក្សប្រឆាំងដែលកំពុងនិរទេសខ្លួន លោក សម រង្ស៊ី មិនបានផ្ញើសារថ្វាយព្រះពរ ព្រះករុណា ព្រះបាទសម្តេច ព្រះបរមនាថ នរោត្ដម សីហមុនី ក្នុងខួប១៧ឆ្នាំនៃការឡើងគ្រងរាជនេះទេ ប៉ុន្តែកន្លងទៅ លោកធ្លាប់បង្ហោះសារថា ព្រះអង្គមិនបានប្រើព្រះរាជតួនាទី ដើម្បីផ្សះផ្សាជាតិ ដូចស្មារតីរដ្ឋធម្មនុញ្ញទេ ខណៈស្ថានការណ៍នយោបាយជាង៤ឆ្នាំមកនេះនៅតែបន្តបិទខ្ទប់ ការវិលត្រលប់មកប្រឡូកក្នុងឆាកនយោបាយវិញរបស់អតីតបក្សប្រឆាំង។
ការរំលាយគណបក្សប្រឆាំងចេញពីឆាកនយោបាយចាប់ពីអំឡុងឆ្នាំ២០១៧មក ជំរុញឱ្យប្រទេសលោកសេរី ដែលនាំមុខគេដោយសហរដ្ឋអាមេរិក និងសហភាពអឺរ៉ុប បានមើលឃើញថា ជារបត់នយោបាយមួយរុញកម្ពុជាចេញពីគន្លងប្រជាធិបតេយ្យ និងបានចាត់វិធានការមួយចំនួន រួមទាំងដកប្រព័ន្ធអនុគ្រោះពន្ធ EBA ២០ភាគរយ មុនកាលកំណត់។
នាយករងអង្គការឃ្លាំមើលសិទ្ធិមនុស្សលីកាដូ លោក អំ សំអាត មានប្រសាសន៍ថា វាចាំបាច់ណាស់ ក្នុងសង្គមប្រជាធិបតេយ្យ ដែលអ្នកនយោបាយខ្មែរ ត្រូវរួមគ្នាស្ដារស្ថានភាពសិទ្ធិមនុស្សនិងប្រជាធិបតេយ្យឡើងវិញ ដើម្បីការពារប្រយោជន៍ជាតិ ក្រោមដំបូលរដ្ឋធម្មនុញ្ញ និងក្រោមម្លប់អង្គព្រះមហាក្សត្រ។
លោកថា៖ «ពីព្រោះគោលការណ៍គោរពសិទ្ធិមនុស្សឈរលើបន្ទាត់នៃលទ្ធិប្រជាធិបតេយ្យនេះ វានាំឱ្យកម្ពុជាមានផលចំណេញច្រើន ដែលសហគមន៍អន្តរជាតិក៏គេអាចមើលឃើញ ហើយអបអរទាំងនយោបាយការទូត និងជំនួយអភិវឌ្ឍន៍ផ្សេងៗ នឹងអាចកើតឡើងចំពោះប្រទេសដែលកំពុងអភិវឌ្ឍន៍»។
មាត្រា៨ នៃរដ្ឋធម្មនុញ្ញកម្ពុជា ចែងថា «ព្រះមហាក្សត្រ ព្រះអង្គទ្រង់ជានិមិត្តរូបនៃឯកភាពជាតិ និរន្តរភាពជាតិ»។
មាត្រា៩ ចែងដែរថា៖ «ព្រះមហាក្សត្រ ទ្រង់មានតួនាទីខ្ពង់ខ្ពស់ជាអាជ្ញាកណ្ដាល ដើម្បីធានាការប្រព្រឹត្តទៅនៃអំណាចសាធារណៈឱ្យមានភាពទៀងទាត់»៕
