សហជីពធំមួយបានលើកឡើងថា កម្មកររោងចក្រជាច្រើននៅទូទាំងប្រទេសកំពុងរងគ្រោះដោយសារជំងឺវិជ្ជាជីវៈ និងមិនដែលទទួលបានអត្ថប្រយោជន៍ពីក្រុមហ៊ុនដែលខ្លួនបានធ្វើការឱ្យនោះឡើយ។
តាមរយៈទិវាពិភពលោក ដើម្បីសុខភាព និងសុវត្ថិភាព កម្មករ រៀបចំដោយអង្គការអន្តរជាតិខាងការងារ ILO កាលពីថ្ងៃទី២៨ ខែតុលា លោក អាត់ ធន់ ប្រធានសហភាពការងារកម្ពុជា ថ្លែងថា លោកបានលើកឡើងពីបញ្ហាប្រឈមមួយចំនួនរបស់កម្មករ ដូចជា គ្រោះថ្នាក់ការងារ ការសន្លប់ ប្រព័ន្ធសន្តិសុខសង្គម បរិយាកាសនៅកន្លែងការងារ និងច្បាប់មួយចំនួនទៀតដែលត្រូវពង្រឹង និងដោះស្រាយ ជូនកម្មករនិយោជិតខ្មែរ ក្នុងនោះក៏មានចំណុចស្តីអំពី «ជំងឺវិជ្ជាជីវៈ» ផងដែរ។
សូមបញ្ជាក់ថា ជំងឺវិជ្ជាជីវៈ គឺជាជំងឺដែលកើតចេញពីការងារ។ លោកបានលើកជាឧទាហរណ៍ថា តួយ៉ាងដូចជាកម្មករផ្នែកលាយថ្នាំពណ៌ នៅពេលដែលធ្វើការយូរៗទៅ ស្រាប់តែពិនិត្យឃើញថា កើតជំងឺមហារីកដោយសារសារធាតុពីប្រភេទថ្នាំពណ៌ទាំងនោះ នោះគឺហៅថាជំងឺវិជ្ជាជីវៈ ដែលមានន័យថា ជាជំងឺកើតចេញពីអាជីពការងាររបស់ខ្លួន។
លោក អាត់ ធន់ថា នៅកម្ពុជា រោងចក្រនីមួយៗពុំបានផ្តល់អត្ថប្រយោជន៍នៃជំងឺវិជ្ជាជីវៈនេះដល់កម្មករឡើយ ខណៈកម្មករខ្លួនឯងក៏មិនបានទាំងដឹងផងថា ខ្លួនបានរងផលប៉ះពាល់សុខភាពរយៈពេលវែងក្រោយធ្វើការនៅរោងចក្រទាំងនោះ។
លោក អាត់ ធន់ មានប្រសាសន៍ថា៖ «ហ្នឹងហើយ [រោងចក្រនីមួយៗនៅទូទាំងប្រទេស] វាសុទ្ធតែមាន [ជំងឺវិជ្ជាជីវៈ] ប៉ុន្តែពួកគាត់ [កម្មករ] អត់ដែលទទួលបានប្រយោជន៍ [ពីថៅកែ] ទេ។ ធ្វើការយូរៗទៅ គាត់ឈប់ធ្វើការ ទៅផ្ទះវិញ លក់គោក្របី ចិញ្ចឹមជីវិតគាត់ទៅ ព្យាបាលជំងឺទៅ ឆាប់ស្លាប់បាត់ទៅ ដែលដឹង? ស្លាប់បាត់ហើយហ្នឹង។ លក់គោ លក់ក្របី លក់ដី មើលខ្លួន ដល់ស្លាប់បាត់ទៅ មានដឹងថា ខ្លួនឯងធ្វើការឱ្យគេមានការប៉ះពាល់ឯណា! ព្រោះគេ [ថៅកែ] មិនដែលចាត់ទុកថា ជាជំងឺវិជ្ជាជីវៈផង ពួកគាត់ម៉េចបាន [អត្ថប្រយោជន៍]»។
លោកថា ជំងឺវិជ្ជាជីវៈមិនទាន់ត្រូវបានរដ្ឋាភិបាលកំណត់ច្បាស់លាស់នៅឡើយទេ ខណៈកម្មករជាច្រើនបាត់បង់អត្ថប្រយោជន៍ដោយសារតែថៅកែ ឬក្រុមហ៊ុនមិនបានចាត់ទុកពួកគេថាមានជំងឺវិជ្ជាជីវៈ។
លោក អាត់ ធន់ អះអាងថា ដរាបណារដ្ឋាភិបាលមិនទាន់កំណត់ច្បាស់លាស់ពីច្បាប់ ស្តីពី ជំងឺវិជ្ជាជីវៈនេះ គឺកម្មករមានភាពលំបាកណាស់ក្នុងការតាមដាន និងទាមទារអត្ថប្រយោជន៍ទាំងនោះ។ លោកថា តួយ៉ាងបើកម្មករមានជំងឺសួតជាដើម ហើយអះអាងថា មានជំងឺវិជ្ជាជីវៈ រីឯថៅកែតបថា រដ្ឋមិនទាន់បានកំណត់ច្បាប់ជាក់លាក់ពីរឿងនេះផង នោះកម្មករក៏មិនដឹងថាត្រូវតវ៉ាយ៉ាងដូចម៉េចដែរ។
យ៉ាងណា លោកថា តាមរយៈវេទិកាកាលពីម្សិលមិញរដ្ឋាភិបាលបានបង្ហាញភាពសុទិដ្ឋិនិយមថានឹងរៀបចំវិធានការច្បាប់ខ្លះៗ ដើម្បីជាការសម្រួលស្ថានភាពសម្រាប់កម្មករ និងដើម្បីដោះស្រាយបញ្ហាប្រឈមរបស់ពួកគេ។
កម្មកររោងចក្រស្រោមដៃ នៅទល់មុខព្រលានយន្តហោះអន្តរជាតិពោចិនតុង រាជធានីភ្នំពេញ កញ្ញា សោ ធារ៉ា និយាយថា កញ្ញាចង់បានអត្ថប្រយោជន៍សម្រាប់ជំងឺវិជ្ជាជីវៈ ព្រោះកំឡុងពេលធ្វើការក្នុងរោងចក្រកញ្ញាជឿថា ក្នុងរាងកាយទទួលនូវសារធាតុគីមីពីរោងចក្រ គ្រាន់តែពិបាកស្មានពីទំហំនៃផលប៉ះពាល់នាពេលអនាគត។
កញ្ញា សោ ធារ៉ា ថា៖ «ដល់ពេលយើងឈប់ទៅ ទៅផ្ទះ ចឹងក្រុមហ៊ុនហ្នឹងអត់ដឹងថា យើងឈឺទេ ចឹងគេអត់ទទួលទេ។ បើនៅក្នុងរោងចក្រ យើងឈឺ យើងទៅ ប.ស.ស។ តែដល់ពេលយើងឈប់ធ្វើការទៅ ដាច់៣ខែ យើងអត់អាចទៅ ប.ស.ស បាន អញ្ចឹងយើងប្រើចំណាយលុយហ្នឹងជារបស់ផ្ទាល់ខ្លួន។ ចឹងខ្ញុំចង់បានអត្ថប្រយោជន៍ពីក្រុមហ៊ុនដែរ នៅពេលដែលឈប់ចឹងហ្អាស់»។
អ្នកនាំពាក្យក្រសួងការងារ និងបណ្តុះបណ្តាលវិជ្ជាជីវៈ លោក ហេង សួរ ប្រាប់វីអូឌីនៅថ្ងៃទី ២៩ ខែតុលានេះថា វេទិកាពីម្សិលមិញនេះមិនមានអ្វីប្លែកទេ ពោលគឺវាគ្រាន់តែជាការប្រារព្ធទិវាមួយប៉ុណ្ណោះ និងមិនមែនជាការបូកសរុបលទ្ធផលការងារអ្វីនោះទេ។
យ៉ាងណាលោកថា ប្រធានបទពាក់ព័ន្ធជំងឺវិជ្ជាជីវៈ ត្រូវការការវិភាគច្រើន និងព័ត៌មានច្រើនទៀត ខណៈលោកមិនទាន់ក្តាប់ព័ត៌មាននេះជុំនៅឡើយ។
លោក ហេង សួរ ថ្លែងថា៖ «សេចក្តីប្រកាសស្តីពីជំងឺវិជ្ជាជីវៈ វាត្រូវការវិភាគច្រើន ហើយត្រូវការព័ត៌មានច្រើនទៀត ខ្ញុំមិនទាន់ក្តាប់បានដែរ។ ប្រកាសស្តីពីជំងឺវិជ្ជាជីវៈ ក្រសួងដូចចេញយូរហើយតើ! ខ្ញុំគិតថា គេមានច្បាប់ប្រកាសអីហើយអស់ហើយ។ ខ្ញុំដឹងថា គេមានប្រកាស ប៉ុន្តែគ្រាន់តែថា នីតិវិធីលម្អិតអីយ៉ាងម៉េច ខ្ញុំមិនទាន់ក្តាប់បានដែរ»។
រដ្ឋមន្ត្រីក្រសួងការងារ លោក អ៊ិត សំហេង បានថ្លែងក្នុងវេទិកា «ទិវាពិភពលោក ដើម្បីសុខភាព និងសុវត្ថិភាព» កាលពីម្សិលមិញថា ក្នុងការរក្សាស្ថិរភាពប្រាក់ចំណូលរបស់កម្មករនិយោជិត រាជរដ្ឋាភិបាលបានដាក់ចេញនូវកញ្ចប់វិធានការចំនួន ៩ជុំ រួចមកហើយ។
ក្នុងនោះលោកថា សម្រាប់វិស័យការងារក៏បានអនុវត្តនូវវិធានការដោះស្រាយផលប៉ះពាល់ របស់និយោជក និងកម្មករនិយោជិត រួមមាន ការអនុញ្ញាតឱ្យរោងចក្រ សហគ្រាសនៅក្នុងវិស័យ វាយនភណ្ឌ កាត់ដេរ ផលិតស្បែកជើង ផលិតផលិតផលធ្វើដំណើរនិងកាបូប និងវិស័យទេសចរណ៍ តាមគោលដៅដែលរងផលប៉ះពាល់ធ្ងន់ធ្ងរ អាចព្យួរកិច្ចសន្យាការងារ ដោយកម្មករនិយោជិតទទួលបានប្រាក់ជំនួយឧបត្ថម្ភ និងការបណ្តុះបណ្តាលជំនាញទន់ ខណៈនិយោជក ក៏ទទួលបាននូវការអនុគ្រោះចំពោះកាតព្វកិច្ចមួយចំនួន ដូចជាការលើកលែងបង់ភាគទានរបបសន្តិសុខសង្គមជាដើម៕
