សមត្ថកិច្ចខេត្តក្រចេះបានឃាត់ខ្លួនមេប៉េអឹមក្រុងនិងគូកន ពាក់ព័ន្ធនឹងប្រើហិង្សាទៅលើក្មេងស្រីចំនួន២នាក់ ដែលជាកូនឈ្នួលបម្រើនៅផ្ទះ បណ្ដាលឱ្យរងរបួស ហើយបច្ចុប្បន្នកំពុងសម្រាកព្យាបាលនៅមន្ទីរពេទ្យ។
ក្មេងស្រីដែលរងអំពើហិង្សាទាំង២នាក់នោះ ទើបតែមានអាយុ១២ឆ្នាំប៉ុណ្ណោះ ហើយអ្នកទាំង២នាក់នេះ ត្រូវជាបងប្អូនជីដូនមួយនឹងគ្នា រស់នៅ ភូមិកញ្ជរ ឃុំកញ្ជរ ស្រុកឆ្លូង ខេត្តក្រចេះ និងបានមកស៊ីស្មួលបម្រើនៅផ្ទះមេបញ្ជាការអាវុធហត្ថក្រុងក្រចេះ ក្នុងមួយខែថ្លៃឈ្នួលម្នាក់ចំនួន១០០ដុល្លារ។
ក្នុងសេចក្តីប្រកាសព័ត៌មានរបស់អ្នកនាំពាក្យកងរាជអាវុធហត្ថលើផ្ទៃប្រទេសលោក អេង ហ៊ី បានឱ្យដឹងកាលពីថ្ងៃទី៣០ ខែតុលា ឆ្នាំ២០២១នេះថា មន្ត្រីនគរបាលយុត្តិធម៌ នៃកងរាជអាវុធហត្ថខេត្តក្រចេះ បានឃាត់ខ្លួន ឈ្មោះ ទេព ហ៊ុយ ភេទប្រុស អាយុ៤២ឆ្នាំ ឋានន្តរសក្តិវរសេនីយ៍ត្រី មុខងារមេបញ្ជាការមូលដ្ឋាន កងរាជអាវុធហត្ថក្រុងក្រចេះ និងគូកន។
មេបញ្ជាការកងរាជអាវុធហត្ថខេត្តក្រចេះ លោក សាន្ត ប៊ុនថាន លើកឡើងក្នុងសេចក្តីប្រកាសព័ត៌មាននោះថាការឃាត់ខ្លួននេះ ធ្វើឡើងកាលពីថ្ងៃទី៣០ ខែតុលា ឆ្នាំ២០២១ ដោយសារ ពួកគេបានប្រព្រឹត្តអំពើហិង្សាទៅលើក្មេងស្រី២នាក់ ដែលជាកូនឈ្នួល ឬអ្នកបម្រើនៅផ្ទះរបស់ខ្លួន បណ្តាលឱ្យរងរបួស ខណៈបច្ចុប្បន្នកំពុងសម្រាកព្យាបាលនៅមន្ទីរពេទ្យ ។
សេចក្តីប្រកាសព័ត៌មានដដែលបញ្ជាក់ថា កន្លងទៅ កងរាជអាវុធហត្ថ បានដាក់ចេញនូវទិសស្លោក “ចំពោះប្រទេសជាតិត្រូវតែការពារ ចំពោះប្រជាត្រូវតែបម្រើ ច្បាប់ត្រូវតែគោរព បទល្មើសត្រូវតែបង្ក្រាប” បើបុគ្គលគ្រប់រូប ដែលប្រព្រឹត្តបទល្មើស ត្រូវតែបង្ក្រាប និងអនុវត្តតាមច្បាប់ជាធរមាន ។
វីអូឌី មិនអាចសុំការបំភ្លឺបន្ថែមពីអ្នកនាំពាក្យកងរាជអាវុធហត្ថលើផ្ទៃប្រទេស លោក អេង ហ៊ី បានទេនៅថ្ងៃអាទិត្យនេះ ខណៈលោក ទេព ហ៊ុយ ក៏នៅមិនទាន់អាចទាក់ទងរកការឆ្លើយតបបានដែរ។
ចំណែកស្ត្រីម្នាក់ដែលអះអាងថាជាម្តាយក្មេងស្រីរងអំពើហិង្សា បាននិយាយក្នុងវីដេអូឃ្លីបមួយរៀបរាប់ថា ដើមចមដែលនាំឱ្យ ទេព ហ៊ុយ ប្រើហិង្សាបោចសក់ និងយកជើងម៉ាវាយក្បាលកូននិងក្មួយរបស់ខ្លួនចំនួន២ជើងម៉ា ហើយកូនចៅលោកបានវាយលើកូនស្រីគាត់ចំនួន៣កំភ្លៀង ថែមទាំងបង្ខំឱ្យស៊ីអាចម៍ឆ្កែ និងដេកអោបផ្នូរខ្មោចឆ្កែចំនួន១យប់ ដោយសារតែពួកគេធ្វើឱ្យកូនឆ្កែងាប់។
ប្រភពដដែលបន្តថា ក្រោយពីប្រើអំពើហិង្សា គឺលោក ហ៊ុយ ចង់ធ្វើការសម្របសម្រួលជាមួយគាត់ តែអ្នកស្រីមិនព្រមឡើយ ដោយថាទុកឱ្យច្បាប់ដោះស្រាយនិងចង់បានយុត្តិធម៌ជុំវិញរឿងនេះ ។
អ្នកស្រីនិយាយថា៖ «សូមឱ្យជួយរកយុត្តិធម៌ឱ្យកូននាងខ្ញុំ ឱ្យផ្តន្ទាទោសអ្នកប្រព្រឹត្តតាមច្បាប់ ព្រោះខ្ញុំជាជនក្រីក្រ ជាជនរងគ្រោះ ហើយខ្ញុំក៏មិនដឹងថាហេតុអីគេធ្វើបាបកូនខ្ញុំបែបហ្នឹងទេ»។
មន្ត្រីស៊ើបអង្កេតជាន់ខ្ពស់នៅសមាគមអាដហុក លោក សឹង សែនករុណា ដែលតាមដានករណីនេះ ជំរុញទៅអាជ្ញាធរពាក់ព័ន្ធត្រូវធ្វើការស្រាវជ្រាវ និងប្រមូលភស្តុតាងឱ្យបានគ្រប់ជ្រុងជ្រោយ មុននឹងធ្វើការចោទប្រកាន់លើឈ្មោះ ទេព ហ៊ុយ និងគូកន ។
លោក ករុណា បញ្ជាក់ថា បើរកឃើញថា បុគ្គលនោះពិតជាបានប្រព្រឹត្តអំពើល្មើសមែន អាជ្ញាធរត្រូវអនុវត្តច្បាប់ឱ្យបានតឹងរឹង ដើម្បីកុំឱ្យអ្នកផ្សេងយកគំរូតាមអ្នកដែលប្រព្រឹត្តអំពើល្មើសនោះ។
លោកមានប្រសាសន៍ថា៖ «ករណីនេះគួរតែពិនិត្យឱ្យបានម៉ត់ចត់បន្តិច ព្រោះវាកើតឡើងលើអនីតិជន (អាយុប្រហែល១២ឆ្នាំ) ដែលជាអ្នកបម្រើនៅតាមផ្ទះ ហើយយើងមិនដឹងថាពីមុនមកគាត់ធ្លាប់រងនូវការធ្វើទារុណកម្មបែបណាខ្លះទៀត។ បើរកឃើញប្រព្រឹត្តអំពើល្មើសកប្បីចាត់វិធានការផ្តន្ទាទោសឱ្យបានតឹងរឹង ជៀសវាងផ្តន្ទាទោសធូររលុង អាចធ្វើឱ្យមានអ្នកប្រព្រឹត្តអំពើបែបនេះបន្តទៀត ព្រោះអាងខ្លួនជាសមត្ថកិច្ចនិងមានអំណាច»។
កាលពីចុងឆ្នាំ២០១៩ សង្គមស៊ីវិលបានចេញសេចក្តីថ្លែងការរួម ស្នើសុំជាថ្មីនូវដំណោះស្រាយលើបញ្ហាអាទិភាពចំនួន១១ចំណុច ដើម្បីបញ្ឈប់អំពើហិង្សាដោយផ្អែកលើយេនឌ័រក្នុងពិភពការងារ និងការពារសិទ្ធិសេរីភាពមូលដ្ឋានរបស់កម្មករ ពីព្រោះនៅកម្ពុជា មានអ្នកធ្វើការងារតាមផ្ទះចំនួន២៥ម៉ឺននាក់ ភាគច្រើនជាស្ត្រី ហើយពួកគេមិនទាន់ទទួលបានការការពារពីច្បាប់ ស្តីពីការងារនៅឡើយ ។
សេចក្តីថ្លែងការណ៍ដដែលឱ្យដឹងទៀតថា និយោជក (ម្ចាស់ផ្ទះ) ភាគច្រើនមិនទាន់បានអនុវត្ត តាមប្រកាសលេខ ២៣៥ ចុះថ្ងៃទី២៩ ខែឧសភា ឆ្នាំ២០១៨ របស់ក្រសួងការងារស្តីពីលក្ខខណ្ឌការងារសម្រាប់អ្នកធ្វើការតាមផ្ទះ ជាពិសេសប្រការ១៣ ចែងថា អំពីកាតព្វកិច្ចរបស់និយោជក ក្នុងការចុះបញ្ជីរបបបេឡាជាតិសន្តិសុខសង្គមលើគ្រោះថ្នាក់ការងារ ការថែទាំសុខភាព និងសោធន៍និវត្តន៍។
យ៉ាងសង្គមស៊ីវិលថា សេចក្តីប្រកាសលេខ ២៣៥ នៅមានចំណុចខ្វះខាតមួយចំនួនទៀត ដូចជា មិនទាន់បញ្ជាក់ពីប្រាក់ខែគោលកិច្ចសន្យាការងាររវាងម្ចាស់ផ្ទះ និងកម្មករ រួមទាំងមិនបានបញ្ចូលនូវការឈប់សម្រាកលំហែមាតុភាព និងសម្រាកបុណ្យជាតិផ្សេងៗទៀតជាដើម ដែលទាមទារឱ្យរដ្ឋត្រូវគិតគូរផងដែរ៕