មជ្ឈមណ្ឌលសិទ្ធិមនុស្សកម្ពុជា (CCHR) ធ្វើយុទ្ធនាការ៤ថ្ងៃ លើបណ្ដាញសង្គមចាប់ពីថ្ងៃចន្ទទៅ ដើម្បីទាមទារទៅរដ្ឋាភិបាលឱ្យលុបបំបាត់អំពើឧក្រិដ្ឋកម្មលើអ្នកសារព័ត៌មាន ខណៈអង្គការមួយនេះ កត់សម្គាល់ថា អ្នកសារព័ត៌មានជាង១០នាក់ដែលត្រូវគេសម្លាប់ក្នុងរយៈពេលប៉ុន្មានឆ្នាំកន្លងមកនេះ នៅមិនទាន់ទទួលបានយុត្តិធម៌នៅឡើយ។
យុទ្ធនាការនេះធ្វើឡើងស្របពេលការប្រារព្ធ «ទិវាអន្តរជាតិដើម្បីបញ្ចប់និទណ្ឌភាពលើឧក្រិដ្ឋកម្មប្រឆាំងអ្នកសារព័ត៌មាន» ចូលមកដល់នៅថ្ងៃអង្គារ ទី២ខែវិច្ឆិកានេះ។
CCHR បានលើកឡើងនៅក្នុងសេចក្ដីថ្លែងការណ៍របស់ខ្លួន ចុះថ្ងៃទី៣១ ខែតុលា ឆ្នាំ២០២១ ថា ទិវានេះក៏ជាឱកាសដើម្បីរម្លឹកដល់រដ្ឋាភិបាលនៅជុំវិញពិភពលោក ត្រូវបំពេញកាតព្វកិច្ចរបស់ខ្លួនក្នុងការលើកកម្ពស់និងគោរពសេរីភាពសារព័ត៌មាន ព្រមទាំងបញ្ចប់នូវអំពើនិទណ្ឌភាពលើឧក្រិដ្ឋកម្មប្រឆាំងអ្នកសារព័ត៌មានផងដែរ។
សម្រាប់កម្ពុជាវិញ អង្គការនេះលើកឡើងថា ក្នុងសង្គមប្រជាធិបតេយ្យ អ្នកសារព័ត៌មានបានដើរតួនាទីយ៉ាងសំខាន់ក្នុងការផ្ដល់ព័ត៌មានដល់សាធារណជន ដើម្បីការពារប្រយោជន៍សាធារណៈ ហើយថា ការវាយប្រហារទៅលើអ្នកសារព័ត៌មានបានបង្កផលប៉ះពាល់យ៉ាងធ្ងន់ធ្ងរដល់ការលើកកម្ពស់ការយល់ដឹងរបស់សាធារណជន ក្នុងការចូលរួមការពារប្រយោជន៍សាធារណៈ។
CCHR បានកត់សម្គាល់ទៀតថា ចាប់តាំងពីឆ្នាំ១៩៩៤មក យ៉ាងហោចណាស់មានអ្នកសារព័ត៌មាន ចំនួន១៣នាក់ត្រូវបានសម្លាប់ ក្នុងនោះ១២នាក់ត្រូវបានសម្លាប់ដោយសាររាយការណ៍ពាក់ព័ន្ធរឿងអាស្រូវពុករលួយរបស់មន្ត្រីជាន់ខ្ពស់ក្នុងជួរបក្សកាន់អំណាចនិងស្ថាប័នយោធា។
យ៉ាងណា អង្គការនេះថា បច្ចុប្បន្ន ជនល្មើសដែលបានប្រព្រឹត្តឧក្រិដ្ឋកម្មទាំងអស់នោះ ស្ថាប័នពាក់ព័ន្ធនៅមិនទាន់បាននាំខ្លួនមកជំនុំជម្រះ ដើម្បីផ្ដល់យុត្តិធម៌ដល់ជនរងគ្រោះនៅឡើយ។
បញ្ហានេះ CCHR គូសបញ្ជាក់ថា ការប្រារព្ធទិវានេះជាឱកាសជំរុញឱ្យមានការពិភាក្សាអំពីឧក្រិដ្ឋកម្មប្រឆាំងលើអ្នកសារព័ត៌មាន និងអ្នកធ្វើការនៅក្នុងវិស័យប្រព័ន្ធផ្សព្វផ្សាយ ដែលមិនទាន់បានទទួលយុត្តិធម៌ និងក៏ដើម្បីសម្ដែងនូវការគោរពដល់អ្នកសារព័ត៌មានដែលតែងតែប្រថុយប្រថានឬក៏បាត់បង់អាយុជីវិតនៅក្នុងបុព្វហេតុរាយការណ៍ព័ត៌មានរបស់ខ្លួន។
បន្ថែមពីនេះ អង្គការនោះបញ្ជាក់ថា ការធ្វើយុទ្ធនាការ៤ថ្ងៃ ក្នុងទិវាអន្តរជាតិដើម្បីបញ្ចប់និទណ្ឌភាពលើឧក្រិដ្ឋកម្មប្រឆាំងអ្នកសារព័ត៌មាននៅឆ្នាំ២០២១នេះ «គឺដើម្បីលើកកម្ពស់ការយល់ដឹងអំពីតួនាទីដ៏សំខាន់របស់អ្នកសារព័ត៌មាននៅក្នុងសង្គមប្រជាធិបតេយ្យ និងអំពើនិទណ្ឌភាពដែលកំពុងបន្តញាំញីក្នុងប្រទេសកម្ពុជា រួមទាំងអំពើឧក្រិដ្ឋកម្មប្រឆាំងអ្នកសារព័ត៌មានផងដែរ»។
អគ្គស្នងការនគរបាលជាតិ លោក ឆាយ គឹមខឿន មានប្រសាសន៍យ៉ាងខ្លីថា លោកមិនចាប់អារម្មណ៍នឹងការធ្វើយុទ្ធនាការរបស់អង្គការនេះទេ ដោយថា សមត្ថកិច្ចអនុវត្តតួនាទីរបស់ខ្លួនតាមច្បាប់តែប៉ុណ្ណោះ ។
លោកមានប្រសាសន៍ថា៖ «ពូមន្ត្រីអនុវត្តច្បាប់ ពូអនុវត្តតាមតែច្បាប់ទេ បកស្រាយបានសម្រាប់ព័ត៌មានរបាយការណ៍ធ្វើការពាក់ព័ន្ធនឹងបទល្មើសអី ពូផ្ដល់ព័ត៌មានជូនប្អូនបាន! ឱ្យពូវិភាគ [លើការយុទ្ធនាការរបស់ CCHR] នោះ ពូមិនវិភាគទេ»។
អ្នកនាំពាក្យក្រសួងព័ត៌មាន លោក មាស សោភ័ណ្ឌ មានប្រសាសន៍ថា ដើម្បីស្វែងរកយុត្តិធម៌ជូនអ្នកសារព័ត៌មានដែលគេបាញ់សម្លាប់នាប៉ុន្មានឆ្នាំចុងក្រោយនេះបាន លុះត្រាតែគ្រប់ភាគីត្រូវចូលរួមឱ្យគ្រប់ដំណើរការនីតិវិធីទាំងអស់របស់សមត្ថកិច្ចនិងតាមនីតិវិធីច្បាប់។ លោកក៏បានលើកទឹកចិត្តដល់ជនរងគ្រោះឬសាច់ញាតិដែលត្រូវការសេវាផ្នែកច្បាប់ ត្រូវទំនាក់ទំនងទៅក្រសួងព័ត៌មាន ដើម្បីជួយរកយុត្តិធម៌ជូនពួកគេផងដែរ ។
លោកមានប្រសាសន៍ថា៖ «ក្រសួងបានប្រកាសជាសាធារណៈហើយ បើសិនជាអ្នកសារព័ត៌មានមានវិវាទផ្នែកសារព័ត៌មាន គឺអាចដាក់ពាក្យស្នើសុំមកក្រសួង ហើយក្រុមការងារទទួលបន្ទុក [នៅក្រសួង] នឹងពិនិត្យលើករណីនីមួយៗទៅតាមអង្គហេតុនិងអង្គច្បាប់ ហើយក្រសួងនឹងឆ្លើយតបថាអាចផ្ដល់ជំនួយផ្នែកផ្លូវច្បាប់បានឬក៏យ៉ាងណា»។
នាយកប្រតិបត្តិសម្ព័ន្ធអ្នកសារព័ត៌មានកម្ពុជា ហៅកាត់ថា «ខេមបូចា» លោក ណុប វី ជំរុញដល់រដ្ឋាភិបាលនិងសមត្ថកិច្ចបន្តស្រាវជ្រាវវែកមុខរកជនដៃដល់ដែលបាញ់សម្លាប់និងបង្កហិង្សាលើអ្នកសារព័ត៌មានកន្លងមក ដើម្បីយកមកផ្ដន្ទាទោសតាមច្បាប់។ លោកបន្តថា បើរដ្ឋាភិបាលនិងសមត្ថកិច្ច មិនចាប់ជនល្មើសមកផ្ដន្ទាទោសតាមច្បាប់ទេ នឹងធ្វើឱ្យមានវប្បធម៌និទណ្ឌភាព និងប៉ះពាល់ដល់មុខមាត់រដ្ឋាភិបាលជាដើម ។
លោកថា៖ «បើសិនជាក្នុងករណីអំពើនិទណ្ឌភាព ហើយករណីដែលកើតពីមុនមក ហើយមិនត្រូវបានដោះស្រាយទេ វាជាឧបសគ្គរាំងស្ទះទៅដល់ដំណើរការនៃការប្រឹងប្រែងបំពេញការងាររបស់បងប្អូនអ្នកសារព័ត៌មាននៅក្នុងពេលបច្ចុប្បន្ន។ ហើយវាក៏អាចក្លាយទៅជាឧបសគ្គនៅក្នុងការជំរុញឱ្យមានតម្លាភាពនៅក្នុងសង្គមយើង ជំរុញឱ្យមានយុត្តិធម៌នៅក្នុងសង្គមរបស់យើងផងដែរ។ ហើយវាអាចធ្វើឱ្យប៉ះពាល់ទៅដល់មុខមាត់ប្រទេសជាតិយើងផងដែរ នៅក្នុងករណីហ្នឹង» ។
ការសិក្សាថ្មីមួយរបស់គម្រោងនីតិរដ្ឋពិភពលោក (World Justice Project) ចេញផ្សាយកាលពីថ្ងៃទី១៤ ខែតុលា ឆ្នាំ២០២១ បានវាយតម្លៃថា នីតិរដ្ឋនៅកម្ពុជាទាបជាងគេនៅតំបន់អាស៊ីប៉ាស៊ីហ្វិក ស្ថិតក្នុងចំណាត់ថ្នាក់ទី១៣៨ ក្នុងចំណោមប្រទេស១៣៩ នៃគម្រោងដែលបានសិក្សា៕
