អ្នកនាំពាក្យការបរទេសចិន លោក Wang Wenbin បានឱ្យដឹងនៅក្នុងសេចក្ដីថ្លែងការណ៍មួយកាលពីថ្ងៃអាទិត្យ ថារបាយការណ៍ស៊ើបការណ៍របស់សហរដ្ឋអាមេរិកដែលលើកឡើងថា ជំងឺរាតត្បាតកូវីដ-១៩មានប្រភពដើមចេញពីមន្ទីរពិសោធន៍មួយក្នុងប្រទេសចិន គឺត្រូវបានធ្វើឡើងដោយគ្មានមូលដ្ឋានច្បាស់លាស់។
របាយការណ៍របស់សហរដ្ឋអាមេរិកដែលបានធ្វើបច្ចុប្បន្នភាព និងបានចេញផ្សាយកាលពីថ្ងៃសៅរ៍កន្លងទៅ បានលើកឡើងថា ប្រភពដើមនិងការលេចធ្លាយនៃមេរោគចេញពីមន្ទីរពិសោធន៍មួយ គឺជាសម្មតិកម្មដែលអាចជឿជាក់បាន ដើម្បីពន្យល់ពីរបៀបដែលមេរោគកូវីដ-១៩ (SARS-CoV-2) បានឆ្លងដំបូងមកកាន់មនុស្ស។
នៅក្នុងការឆ្លើយតបកាលពីថ្ងៃអាទិត្យម្សិលមិញ នៅលើគេហទំព័ររបស់ក្រសួងការបរទេសចិន លោក Wang Wenbin ថ្លែងថា៖ «ការកុហកដែលលើកឡើងម្ដងហើយម្ដងទៀត នៅតែជាការកុហក។ ការស៊ើបការណ៍របស់សហរដ្ឋអាមេរិក កាលពីពេលកន្លងទៅ ក៏ធ្លាប់មានការជាប់ពាក់ព័ន្ធទៅនឹងការក្លែងបន្លំនិងបោកប្រាស់ផងដែរ»។
ទីភ្នាក់ងារសារព័ត៌មាន Reuters បានស្រង់សម្ដីអ្នកនាំពាក្យការបរទេសរូបនេះ បន្ថែមថា៖ «ការតាមដានពីប្រភពដើមនៃវីរុសកូរ៉ូណា គឺជាបញ្ហាដ៏ស៊ីជម្រៅនិងស្មុគស្មាញមួយ ដែលមានតែតាមរយៈកិច្ចសហប្រតិបត្តិការរបស់អ្នកវិទ្យាសាស្ត្រពិភពលោកប៉ុណ្ណោះ ដែលអាចស្រាវជ្រាវបាន»។
ប្រទេសចិន បានច្រានចោលម្ដងហើយម្ដងទៀតនូវការលើកឡើង ដែលថាមេរោគនេះបានលេចធ្លាយចេញពីមន្ទីរពិសោធន៍មួយរបស់ខ្លួនក្នុងទីក្រុង Wuhan ជាកន្លែងដែលករណីដំបូងបានផ្ទុះឡើងនៅចុងឆ្នាំ២០១៩។
ទាក់ទិននឹងករណីនេះ លោក Wang Wenbin ក៏បានបញ្ជាក់ពីការអំពាវនាវរបស់ប្រទេសចិនសារជាថ្មីម្តងទៀតដល់សហរដ្ឋអាមេរិកឱ្យមានការបើកទូលាយនូវបន្ទប់ពិសោធន៍ Fort Detrick ផ្ទាល់ខ្លួនរបស់ពួកគេដល់អ្នកជំនាញអន្តរជាតិផងដែរ៕
