ប្រធានអតីតគណបក្សសង្រ្គោះជាតិ លោក កឹម សុខា សម្រេចចិត្តលក់ផ្ទះរបស់លោកដែលស្នាក់នៅសព្វថ្ងៃ ស្ថិតនៅក្នុងខណ្ឌទួលគោក រាជធានីភ្នំពេញ ក្នុងតម្លៃជាង២លានដុល្លារអាមេរិក ខណៈរូបលោកកំពុងត្រូវហ៊ុមព័ន្ធក្នុងសំណុំរឿងពីបទ «ក្បត់ជាតិ» នៅតុលាការនៅឡើយ។
គេហទំព័រអចលនទ្រព្យមួយបានដាក់រូបម៉ូដផ្ទះជាប្រភេទវីឡា ស្ថិតក្នុងខណ្ឌទួលគោក លក់ក្នុងតម្លៃ២លាន៤សែនដុល្លារអាមេរិក ដែលវីឡានេះត្រូវគេស្គាល់ថាជាវីឡារបស់លោក កឹម សុខា។
បុគ្គលិករបស់សេវាកម្មអចលនទ្រព្យដែលមានឈ្មោះថា «Century 21 Advanced Property For Sale» ដែលថ្លែងក្នុងលក្ខខណ្ឌមិនបញ្ចេញឈ្មោះ បានប្រាប់ វីអូឌី នៅថ្ងៃចន្ទនេះថា ខ្លួនមិនអាចផ្ដល់ព័ត៌មានលម្អិតអំពីទិន្នន័យទាំងនេះបានទេ ដោយត្រូវរក្សាការសម្ងាត់សម្រាប់អតិថិជនរបស់ខ្លួន។
ប្រភពបន្តថា៖ «អធ្យាស្រ័យបង ទាក់ទងជាមួយព័ត៌មានហ្នឹង ខ្ញុំអត់ទាន់ហ៊ាននិយាយប្រាប់បងបានឡើយទេ ចាំច្បាស់សិនបង បានអាចជម្រាបបាន។ តែខាងក្រុមហ៊ុនពិតជាបានទទួលប្លង់ពីម្ចាស់ដើម្បីបានសិទ្ធិផុសលក់»។
ប៉ុន្តែប្រភពស្និទ្ធបំផុតរបស់អតីតប្រធានគណបក្សសង្រ្គោះជាតិ ដែលថ្លែងក្នុងលក្ខខណ្ឌមិនបញ្ចេញឈ្មោះ អះអាងថា វីឡាដែលបានប្រកាសលក់តាមគេហទំព័រនេះ គឺពិតជាវីឡារបស់លោក កឹម សុខា ដែលត្រូវដាក់លក់មែន។ បើទោះជាបែបណា ប្រភពអះអាងថា គេមិនបានដឹងថាតើមូលហេតុអ្វី បានជាវីឡានេះត្រូវដាក់លក់យ៉ាងដូច្នេះឡើយ។
ព័ត៌មានលម្អិត សូមរង់ចាំទស្សនាការផ្សាយផ្ទាល់ក្នុងកម្មវិធីព័ត៌មានរបស់ វីអូឌី នៅម៉ោង៧យប់នេះ។
ព័ត៌មានអាប់ដេតចុងក្រោយ៖ UPDATE៖ លោក កឹម សុខា ដាក់លក់ផ្ទះដែលស្នាក់នៅសព្វថ្ងៃក្នុងខណ្ឌទួលគោកតម្លៃជាង២លានដុល្លារ