មន្ត្រីជាន់ខ្ពស់នៃស្នងការដ្ឋាននគរបាលខេត្តក្រចេះ បានឱ្យដឹងថា កម្លាំងសមត្ថកិច្ចនៃកងរាជអាវុធហត្ថខេត្តបានបញ្ជូនខ្លួនមេបញ្ជាការ និងមេបញ្ជាការរងកងរាជអាវុធហត្ថក្រុងក្រចេះទៅសាលាដំបូងខេត្ត ដើម្បីបន្តនិតិវិធីក្នុងសំណុំរឿងហិង្សាដោយចេតនា ទៅលើក្មេងស្រី ២នាក់ ដែលជាអ្នកបម្រើការងារនៅក្នុងផ្ទះ។
សមត្ថកិច្ចខេត្តក្រចេះ កាលពីថ្ងៃទី៣០ ខែតុលា បានឃាត់ខ្លួនមេប៉េអឹមក្រុង ឈ្មោះ ទេព ហ៊ុយ និងគូកន ពាក់ព័ន្ធនឹងប្រើហិង្សាទៅលើក្មេងស្រីចំនួន២នាក់ ដែលជាអ្នកធ្វើការនៅក្នុងផ្ទះរបស់ខ្លួន បណ្ដាលឱ្យរងរបួស ហើយត្រូវសម្រាកព្យាបាលនៅមន្ទីរពេទ្យ។
ស្នងការនគរបាលខេត្តក្រចេះ លោក លន់ សុផាត ប្រាប់វីអូឌីនៅថ្ងៃចន្ទនេះថា ករណីមេប៉េអឹមប្រើហិង្សាលើកុមារនេះ ត្រូវបានបញ្ជូនទៅតុលាការហើយ តែលោកមិនបានបញ្ជាក់ថាបញ្ជូនទៅពេលណានោះទេ។
លោកថា៖ «ខាងបញ្ជាការកងរាជអាវុធហត្ថខេត្ត គេបញ្ជូនទៅតុលាការហើយ។ ចាំទាក់ទងទៅកាន់ខាងមេបញ្ជាការកងរាជអាវុធហត្ថខេត្ត ហើយព្រះរាជអាជ្ញាទៅ។ (ករណីនេះ) ផុតពីខ្ញុំហើយ»។
ចំណែក អ្នកនាំពាក្យសាលាដំបូងខេត្តក្រចេះ លោកស្រី ឆាន់ ស្រីមុំ ថ្លែងថា សមត្ថកិច្ចបានបញ្ជូននីតិវិធីនៃករណីខាងលើមកដល់អយ្យការហើយ ប៉ុន្តែមិនទាន់បញ្ជូនដល់ដៃតុលាការនៅឡើយ។
លោកស្រីថា៖ «នីតិវិធីខាងនេះគាត់បានបញ្ជូនមកដល់អយ្យការហើយ ប៉ុន្តែអត់ទាន់បញ្ជូនមកខាងសាលាដំបូងទេ! នៅអយ្យការកំពុងតែធ្វើការ»។
វីអូឌី មិនអាចសុំការបកស្រាយពីព្រះរាជអាជ្ញារង និងជាអ្នកនាំពាក្យអយ្យការអមសាលាដំបូងខេត្តក្រចេះ លោក រ៉ា បូរ៉ាន់ឌី បានទេនៅថ្ងៃទី១ ខែវិច្ឆិកានេះ ដោយលោកប្រាប់ថាកំពុងជាប់រវល់។
អ្នកនាំពាក្យកងរាជអាវុធហត្ថលើផ្ទៃប្រទេស លោក អេង ហ៊ី ថ្លែងថា កាលណា មន្ត្រីអាវុធហត្ថប្រព្រឹត្តបទល្មើសបែបនេះ គឺត្រូវតែបង្ក្រាបដោយការអនុវត្តច្បាប់ មិនមែនវិន័យទេ ដោយសារការដាក់វិន័យ សម្រាប់តែអ្នកដែលធ្វើខុសវិជ្ជាជីវៈកងទ័ពប៉ុណ្ណោះ។
លោកបន្តថា៖ « ដោយសារមានបញ្ហាបែបនេះកើតឡើង ក៏យើងយកបញ្ហានេះយកទៅធ្វើការអប់រំអាវុធហត្ថរបស់យើងដើម្បីឱ្យគាត់ជ្រួតជ្រៀបថែមទៀតថា នេះហើយដែលជាការសិក្សារៀនសូត្រហើយ មានឋានៈតួនាទីដល់ប៉ុណ្ណឹងហើយ ដោយសារយកទោសៈមកប្រើ ដែលខឹងក្រេវក្រោធមួយភ្លែតហ្នឹង គឺអស់ដំណែងហើយជាប់គុកទៀត»។
នាយករងអង្គការការពារសិទ្ធិមនុស្សលីកាដូ លោក អំ សំអាត មានប្រសាសន៍ថា អំពើហិង្សាបែបនេះ ជាអំពើឃោរឃៅ អមនុស្សធម៌ទៅលើកុមារ ខណៈពួកគេទើបតែមានអាយុ ១២ឆ្នាំ។ លោកបន្ថែមថា បើនិយាយពីពលកម្មកុមារវិញនោះ ជនសង្ស័យកាន់តែមានកំហុសបន្ថែមទៀត ដោយសារកុមារីទាំង២នាក់ ជាអនីតិជនដែលត្រូវបានគេយកមកធ្វើពលកម្មក្នុងផ្ទះ ហើយករណីនេះ ក៏ជាទម្រង់ពលកម្មកុមារមួយ ដែលអាចប៉ះពាល់ដល់ការសិក្សារបស់ពួកគេ។
លោក អំ សំអាត មានប្រសាសន៍ថា៖ «ឋានៈគាត់ដល់ជាមេបញ្ជាការកងរាជអាវុធហត្ថក្រុងមួយទាំងមូលហើយ ចឹងគាត់ឆ្លងកាត់ការរៀនសូត្រច្រើន មិនគួរឡើយគាត់យកវិធីហិង្សា វិធីឃោរឃៅ អមនុស្សធម៌នេះមកប្រើប្រាស់ទេ សម័យនេះទៅហើយ វាហួសសម័យ វាជារឿងមួយដែលគួរឱ្យអនោចអធមបំផុតចំពោះកុមារ»។
លោកថា បើមិនចាត់វិធានការឱ្យបានតឹងរ៉ឹងទេ នោះនឹងជះឥទ្ធិពលអាក្រក់ដល់សង្គម និងកងកម្លាំងផងដែរ។
ក្មេងស្រីដែលរងអំពើហិង្សាទាំង២នាក់នោះ ទើបតែមានអាយុ១២ឆ្នាំប៉ុណ្ណោះ ហើយត្រូវជាបងប្អូនជីដូនមួយនឹងគ្នា រស់នៅឃុំកញ្ជរ ស្រុកឆ្លូង ខេត្តក្រចេះ និងបានមកស៊ីស្មួលបម្រើការងារនៅផ្ទះមេបញ្ជាការអាវុធហត្ថក្រុងក្រចេះ ដោយក្នុងម្នាក់ទទួលបានប្រាក់ខែ ១០០ដុល្លារក្នុងខែ។
ក្នុងសេចក្តីប្រកាសព័ត៌មានរបស់អ្នកនាំពាក្យកងរាជអាវុធហត្ថលើផ្ទៃប្រទេស បានឱ្យដឹងកាលពីថ្ងៃទី៣០ ខែតុលា ឆ្នាំ២០២១នេះថា មន្ត្រីនគរបាលយុត្តិធម៌ នៃកងរាជអាវុធហត្ថខេត្តក្រចេះ បានឃាត់ខ្លួន ឈ្មោះ ទេព ហ៊ុយ ភេទប្រុស អាយុ៤២ឆ្នាំ ឋានន្តរសក្តិវរសេនីយ៍ត្រី មុខងារមេបញ្ជាការមូលដ្ឋាន កងរាជអាវុធហត្ថក្រុងក្រចេះ និងគូកន។
ស្ត្រីម្នាក់ដែលអះអាងថា ជាម្តាយក្មេងស្រីរងអំពើហិង្សា បាននិយាយក្នុងវីដេអូឃ្លីបមួយរៀបរាប់ថា ដើមចមដែលនាំឱ្យ ឈ្មោះ ទេព ហ៊ុយ ប្រើហិង្សាបោចសក់ និងយកជើងម៉ាវាយក្បាលកូននិងក្មួយរបស់ខ្លួនចំនួន២ជើងម៉ា ហើយកូនចៅលោកបានវាយលើកូនស្រីគាត់ចំនួន៣កំភ្លៀង ថែមទាំងបង្ខំឱ្យស៊ីលាមកឆ្កែ និងដេកឱបផ្នូរឆ្កែចំនួន១យប់ ដោយសារតែពួកគេធ្វើឱ្យកូនឆ្កែរបស់មន្ត្រីអាវុធហត្ថនោះងាប់។
ប្រភពដដែលបន្តថា ក្រោយពីប្រើអំពើហិង្សា លោក ហ៊ុយ ចង់សម្របសម្រួលជាមួយគាត់ តែអ្នកស្រីមិនព្រមឡើយ ដោយថាទុកឱ្យច្បាប់ដោះស្រាយនិងចង់បានយុត្តិធម៌ជុំវិញរឿងនេះ។
អ្នកស្រីនិយាយថា៖ «សូមឱ្យជួយរកយុត្តិធម៌ឱ្យកូននាងខ្ញុំ ឱ្យផ្តន្ទាទោសអ្នកប្រព្រឹត្តតាមច្បាប់ ព្រោះខ្ញុំជាជនក្រីក្រ ជាជនរងគ្រោះ ហើយខ្ញុំក៏មិនដឹងថាហេតុអីគេធ្វើបាបកូនខ្ញុំបែបហ្នឹងទេ»៕