រដ្ឋាករស្វយ័តដឹកជញ្ជូនសាធារណៈរថយន្តក្រុងរាជធានីភ្នំពេញ (CITY Bus) បានដាក់ឱ្យដំណើរឡើងវិញនូវសេវាដឹកជញ្ជូនរថយន្តក្រុងសាធារណៈនិងកាណូតឡើងវិញ និងដោយឥតគិតថ្លៃរយៈពេល៦ថ្ងៃ ចាប់ពីថ្ងៃទី២ ខែវិច្ឆិកា ឆ្នាំ២០២១នេះតទៅ។
យោងតាមសេចក្ដីជូនដំណឹងរបស់រដ្ឋាករស្វយ័ត្នដឹកជញ្ជូនសាធារណៈរថយន្តក្រុងរាជធានីភ្នំពេញ (CITY Bus) កាលពីថ្ងៃទី១ ខែវិច្ឆិកា ឱ្យដឹងថា ការដាក់ឱ្យដំណើរការរថយន្តក្រុងសាធារណៈឡើងវិញ ដោយចាប់ផ្ដើមដាក់ឱ្យសាកល្បងចំនួន៥ខ្សែ។
សេចក្ដីជូនដំណឹងដដែលបន្តថា ខ្សែទី១ ចេញពីស្ថានីយចំណតរថយន្តក្រុងព្រែកព្នៅ ដល់ស្ថានីយចំណតរថយន្តក្រុងវាលស្បូវ។ ខ្សែទី២ ចេញពីស្ថានីយចំណតរថយន្តក្រុងរង្វង់មូលកួចកាណុង ដល់ស្ថានីយចំណតរថយន្តក្រុងស្ពានព្រែកសំរោង ក្រុងតាខ្មៅ ខេត្តកណ្ដាល។ ខ្សែទី៣ ចេញពីចំណតរថយន្តក្រុងសួនឫស្សីកែវ ដល់ស្ថានីយចំណតរថយន្តក្រុងបុរីសន្តិភាព២ តាមមហាវិថីសហព័ន្ធរុស្ស៊ី។ ខ្សែទី៤ (៤A) ចេញពីស្ថានីយចំណតរថយន្តក្រុងសួនឫស្សីកែវ ដល់ស្ថានីយចំណតរថយន្តក្រុងបុរីសន្តិភាព២ តាមមហាវិថីសហព័ន្ធរុស្ស៊ី និងខ្សែទី៥ (៤B) ចេញពីស្ថានីយចំណតរថយន្តក្រុងសួនឫស្សីកែវ ដល់ស្ថានីយចំណតរថយន្តក្រុងបុរីសន្តិភាព២ តាមមហាវិថីចោមចៅ។
ចំពោះដំណើរការដឹកជញ្ជូនតាមកាណូតវិញ នឹងចេញពីស្ថានីយចំណតសួនឫស្សីកែវ ដល់ស្ថានីយចំណតក្រុងតាខ្មៅ ខេត្តកណ្ដាល។
ការដាក់ឱ្យដំណើរការឡើងវិញនូវសេវាដឹកជញ្ជូនសាធារណៈរថយន្តក្រុងនិងកាណូតនេះ គឺនៅមួយថ្ងៃបន្ទាប់ពីការប្រកាសបើកប្រទេសឡើងវិញលើគ្រប់វិស័យរបស់លោកនាយករដ្ឋមន្ត្រី ហ៊ុន សែន ចាប់ពីថ្ងៃទី១ ខែវិច្ឆិកា ឆ្នាំ២០២១នេះ៕
