ព្រឹទ្ធសភា សម្រេចអនុម័តសេចក្ដីព្រាងច្បាប់ស្តីពី «វិសោធនកម្មរដ្ឋធម្មនុញ្ញ» ពាក់ព័ន្ធនឹងការកំណត់ឱ្យមាន «សញ្ជាតិខ្មែរតែមួយ» សម្រាប់មេដឹកនាំស្ថាប័នកំពូលៗ ដោយសំឡេង ៥៧រូប នៃសមាជិកព្រឹទ្ធសភាទាំងមូល ៦២រូប ក្នុងកិច្ចប្រជុំពេញអង្គ នៅព្រឹកថ្ងៃអង្គារនេះ។
អ្នកនាំពាក្យព្រឹទ្ធសភា លោក ម៉ម ប៊ុននាង ប្រាប់ វីអូឌី នៅថ្ងៃទី២ ខែវិច្ឆិកានេះថា សមាជិកព្រឹទ្ធសភាបានប្រជុំពេញអង្គ នីតិកាលទី៤ អនុម័តលើសេចក្ដីព្រាងច្បាប់ធម្មនុញ្ញ ស្ដីពីវិសោធនកម្មមាត្រា១៩ថ្មី មាត្រា៨២ថ្មី មាត្រា១០៦ថ្មី(មួយ) មាត្រា១១៩ថ្មី និងមាត្រា១៣៧ថ្មី នៃរដ្ឋធម្មនុញ្ញ នៃព្រះរាជាណាចក្រកម្ពុជា និង មាត្រា៣និងមាត្រា៤ នៃច្បាប់ធម្មនុញ្ញបន្ថែម ដើម្បីសំដៅធានានូវដំណើរការជាប្រក្រតីនៃស្ថាប័នជាតិ។
អ្នកនាំពាក្យរូបនេះបញ្ជាក់ថា នៅក្នុងកិច្ចប្រជុំនោះ សមាជិកព្រឹទ្ធសភាបានលើកដៃអនុម័តសេចក្ដីព្រាងច្បាប់ស្តីពី «វិសោធនកម្មរដ្ឋធម្មនុញ្ញ» ពាក់ព័ន្ធនឹងការកំណត់ឱ្យមាន «សញ្ជាតិខ្មែរតែមួយ» សម្រាប់មេដឹកនាំស្ថាប័នកំពូលៗ រួមមាន ប្រធានរដ្ឋសភា ប្រធានព្រឹទ្ធសភា នាយករដ្ឋមន្រ្តី និងប្រធានក្រុមប្រឹក្សាធម្មនុញ្ញ ដោយសំឡេង ៥៧រូប នៃសមាជិកព្រឹទ្ធសភាទាំងមូល។
លោកមានប្រសាសន៍ថា៖ «យើងប្រជុំព្រឹកមិញ សមាជិកចូលរួមបោះឆ្នោតគាំទ្រដោយឥតកែប្រែ គឺ៥៧រូប! វាលើសពី ២ភាគ៣ នៃសមាជិកព្រឹទ្ធសភាទាំងមូល ពីព្រោះសមាជិកព្រឹទ្ធសភាទាំងមូលមានចំនួន៦២រូប»។
ក្រោយពីបោះឆ្នោតអនុម័តលើសេចក្ដីព្រាងច្បាប់ស្តីពី «វិសោធនកម្មរដ្ឋធម្មនុញ្ញ» ពាក់ព័ន្ធនឹងការកំណត់ឱ្យមាន «សញ្ជាតិខ្មែរតែមួយ» នេះ លោក ម៉ម ប៊ុននាង អះអាងថា មន្ត្រីជំនាញនឹងបញ្ជូនសេចក្ដីព្រាងនេះទៅរដ្ឋសភាវិញនៅថ្ងៃស្អែក ដើម្បីឱ្យរដ្ឋសភាបញ្ជូនទៅថ្វាយព្រះមហាក្សត្រឡាយព្រះហស្តលេខា ដាក់ឱ្យប្រើប្រាស់ជាសាធារណៈនាពេលឆាប់ៗខាងមុខនេះ។
កាលពីថ្ងៃទី៦ ខែតុលា លោកនាយករដ្ឋមន្ត្រី ហ៊ុន សែន បានបញ្ជាឱ្យរដ្ឋមន្ត្រីក្រសួងយុត្តិធម៌ លោក កើត រិទ្ធ សិក្សារៀបចំធ្វើសេចក្ដីព្រាងច្បាប់ស្ដីពី «វិសោធនកម្មរដ្ឋធម្មនុញ្ញ» កំណត់ឱ្យថ្នាក់ដឹកនាំជាតិ ដែលកាន់តួនាទីជានាយករដ្ឋមន្ត្រី ប្រធានព្រឹទ្ធសភា ប្រធានរដ្ឋសភា និងប្រធានក្រុមប្រឹក្សាធម្មនុញ្ញ ត្រូវមានសញ្ជាតិខ្មែរតែមួយ។
ការសម្រេចនេះ ធ្វើឡើងភ្លាមៗក្រោយពេលអតីតប្រធានគណបក្សសង្រ្គោះជាតិ លោក សម រង្ស៊ី បានចោទប្រកាន់លោកនាយករដ្ឋមន្ត្រី ហ៊ុន សែន ក្រោយឃើញការចុះផ្សាយរបស់កាសែតបរទេស The Guardian ថាប្រមុខរដ្ឋាភិបាលកម្ពុជាបានទិញសញ្ជាតិស៊ីប្រើស (Cyprus) ដែលជាដែនកោះមួយនៅក្នុងតំបន់អឺរ៉ុប។
យ៉ាងណា សារព័ត៌មាន The Guardian បានផ្ញើលិខិតសុំទោសជាសាធារណៈទៅក្រសួងការបរទេសកម្ពុជា ដោយបានបង្ហាញការសោកស្ដាយចំពោះកំហុសរបស់ខ្លួនដែលបានផ្សាយខុសការពិត ដែលថា លោកនាយករដ្ឋមន្ត្រី ហ៊ុន សែន ទិញសញ្ជាតិពីប្រទេសស៊ីប្រើសនេះ៕