ពលករខ្មែរជាច្រើននាក់ត្រូវបានរាយការណ៍ថា បានស្លាប់និងរងរបួសក្នុងហេតុការណ៍គ្រោះថ្នាក់ក្រឡាប់រថយន្តមួយ ពេលពួកគេលួចធ្វើដំណើរឆ្លងដែនដោយខុសច្បាប់ទៅធ្វើការក្នុងប្រទេសថៃ ត្រង់ចំណុចទីប្រជុំជនមួយក្នុងខេត្តស្រះកែវ។
តាមប្រភពពីកាសែតថៃ 77kaoded បានឱ្យដឹងថា នៅវេលាម៉ោង៨និង៥០នាទីយប់ ថ្ងៃអង្គារម្សិលមិញ រថយន្តមួយគ្រឿងដែលដឹកពលករខ្មែរចំនួន១២នាក់ បានបើកក្នុងល្បឿនយ៉ាងលឿន រួចក៏បាត់ម្ចាស់ការ រេចង្កូតទៅបុកបង្គោលភ្លើងពេញមួយទំហឹង បណ្ដាលឱ្យរថយន្តនោះក្រឡាប់ជាច្រើនត្រឡប់ ត្រង់ផ្លូវបំបែករង្វង់មូល ភូមិខ្លងយាយឥន្ទ ឃុំវ៉ាំងថង ស្រុកវ៉ាំងស៊ុមប៊ូន ខេត្តស្រះកែវ។
តាមប្រភពដដែល ហេតុការណ៍នេះបានបណ្ដាលឱ្យអ្នកដំណើរជាពលករខ្មែរចំនួន៤នាក់ (ស្រី៣នាក់) និងអ្នកបើកបរជនជាតិថៃម្នាក់ស្លាប់ភ្លាមៗនៅនឹងកន្លែង ហើយពលករខ្មែរ៨នាក់ផ្សេងទៀតបានរងរបួសធ្ងន់និងស្រាល និងត្រូវបានបញ្ជូនទៅសង្គ្រោះបន្ទាន់នៅមន្ទីរពេទ្យក្នុងតំបន់។
ប្រភពដដែលបញ្ជាក់ថា ពលករខ្មែរម្នាក់ក្នុងចំណោម៤នាក់ដែលបានស្លាប់បាត់បង់ជីវិត ត្រូវបានតេស្តឃើញវិជ្ជមានកូវីដ-១៩ តម្រូវឱ្យបូជាក្នុងរយៈពេល២៤ម៉ោង ហើយអ្នកដែលរបួសស្រាលម្នាក់ បានសារភាពប្រាប់សមត្ថកិច្ចថា ពួកគេបានលួចឆ្លងដែនដោយខុសច្បាប់ដើម្បីរកការងារធ្វើ។
វីអូឌី មិនអាចទាក់ទងសុំការបញ្ជាក់ពីស្ថានកុងស៊ុលកម្ពុជា ប្រចាំខេត្តស្រះកែវ បានទេ នៅថ្ងៃនេះ ខណៈអ្នកនាំពាក្យក្រសួងការបរទេសកម្ពុជា លោក កុយ គួង ថ្លែងថា លោកនឹងសួរបញ្ជាក់ព័ត៌មាននេះពីស្ថានកុងស៊ុលតំណាងប្រទេសកម្ពុជាប្រចាំប្រទេសថៃ។
មន្ត្រីកម្មវិធីសិទ្ធិពលករចំណាកស្រុក នៃអង្គការសង់ត្រាល់ លោក ឌី ថេហូយ៉ា លើកឡើងថា បញ្ហាគ្រោះថ្នាក់នេះមិនមែនទើបតែកើតឡើងជាលើកទី១នោះទេ សម្រាប់ពលករខ្មែរដែលប្រថុយលួចឆ្លងដែនដោយខុសច្បាប់ទៅរកការងារធ្វើក្នុងប្រទេសក្បែរខាងកម្ពុជាមួយនេះ។
ករណីនេះ លោកបានអំពាវនាវដល់ប្រជាពលរដ្ឋខ្មែរត្រូវបន្តការអត់ធ្មត់ ចៀសវាងការប្រថុយប្រថានធ្វើចំណាកស្រុកឆ្លងដែនដោយខុសច្បាប់ទៅប្រទេសថៃដើម្បីរកការងារធ្វើ ក្នុងកាលៈទេសៈដែលព្រំដែនប្រទេសទាំង២មិនទាន់បើកដំណើរការឡើងវិញ ដែលងាយធ្វើឱ្យពួកគេប្រឈមនឹងគ្រោះថ្នាក់ជាយថាហេតុផ្សេងៗ។
លោក ឌី ថេហូយ៉ា បន្ថែមថា៖ «ប្រថុយប្រថានទី១ គឺជាប់ពន្ធនាគារនៅពេលដែលគេចាប់ខ្លួន ហើយប្រថុយប្រថានទី២ វាពាក់ព័ន្ធនឹងការគ្រោះថ្នាក់ដល់អាយុជីវិតក្នុងការធ្វើដំណើរ ទី៣ គាត់មិនប្រាកដថាគាត់បានការងារដូចដែលមេខ្យល់នាំទៅទេ អាចនឹងចាញ់បោកគេហ្នឹង»។
តាមរបាយការណ៍ចុងក្រោយពីមន្រ្តីទេសន្តប្រវេសន៍នៃអង្គការសង់ត្រាល់ កញ្ញា ព្រំ សុភា គិតត្រឹម១៧ថ្ងៃដើមខែតុលា ឆ្នាំ២០២១ ពលករខ្មែរយ៉ាងហោចចំនួន៥៣៦នាក់ត្រូវបានសមត្ថកិច្ចយាមកាមតាមព្រំដែនខ្មែរនិងថៃឃាត់ខ្លួនបានក្នុង២១ករណី អំឡុងពេលពួកគេព្យាយាមលួចឆ្លងដែនដោយខុសច្បាប់ទៅរកការងារធ្វើនៅថៃ ដែលតួលេខនេះគឺកើនខ្ពស់ជាងរយៈពេលក្នុងខែកញ្ញា និងសីហា៕
