ប្រទេសបារាំង តាមរយៈទីភ្នាក់ងារបារាំងសម្រាប់ការអភិវឌ្ឍ (AFD) បានចុះហត្ថលេខាផ្តល់ហិរញ្ញប្បទានប្រមាណជាង២៣លានដុល្លារអាមេរិក ដើម្បីជួយស្ដារប្រព័ន្ធធារាសាស្ត្រនៅខេត្តចំនួន២ ដែលរងផលប៉ះពាល់ពីគ្រោះទឹកជំនន់នៅកម្ពុជា កាលពីឆ្នាំ២០២០។
យោងតាមសេចក្ដីប្រកាសព័ត៌មានរបស់ក្រសួងសេដ្ឋកិច្ច និងហិរញ្ញវត្ថុ នៅថ្ងៃទី៣ ខែវិច្ឆិកានេះ ឱ្យដឹងថា ក្នុងនោះ ទឹកប្រាក់២០លានអឺរ៉ូ ឬប្រមាណជា២៣,១៣លានដុល្លារ គឺសម្រាប់ការស្ដារឡើងវិញនូវប្រព័ន្ធធារាសាស្ត្រដែលបានខូចខាតដោយសារគ្រោះទឹកជំនន់ កាលពីខែតុលា ឆ្នាំ២០២០ ក្នុងខេត្តបាត់ដំបង និងខេត្តបន្ទាយមានជ័យ និងទឹកប្រាក់ចំនួន៣០០ ០០០អឺរ៉ូ ឬប្រមាណជា៣៤៦ ៨០០ដុល្លារអាមេរិក ពីមូលនិធិ Facility for Support, Preparation and Implementation of Project (FAPS) សម្រាប់ការសិក្សាសមិទ្ធិលទ្ធភាពគម្រោងស្ដារឡើងវិញស្ទឹងស្វាយចេក ក្នុងខេត្តបន្ទាយមានជ័យ។
ពិធីចុះហត្ថលេខានេះបានធ្វើឡើងនៅថ្ងៃទី៣ ខែវិច្ឆិកានេះ រវាងរដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ លោក អូន ព័ន្ធមុនីរ័ត្ន និងលោក FABRICE Etlenne លេខាទី១ ស្ថានទូតបារាំងប្រចាំនៅកម្ពុជា និងលោកស្រី Ophe’lle BOURHIS នាយកទីភ្នាក់ងារបារាំងសម្រាប់ការអភិវឌ្ឍប្រចាំនៅកម្ពុជា តាមរយៈប្រព័ន្ធ Video Conference។
លោក អូន ព័ន្ធមុនីរ័ត្ន បានលើកឡើងថា ការផ្ដល់ហិរញ្ញប្បទានដល់គម្រោងឬកម្មវិធីខាងលើនេះ គឺបានឆ្លើយតបយ៉ាងជាក់ច្បាស់ទៅនឹងសេចក្ដីត្រូវការជាអាទិភាពក្នុងការរួមចំណែកការអភិវឌ្ឍនិងស្ដារសេដ្ឋកិច្ចកម្ពុជា បន្ទាប់ពីវិបត្តិជំងឺកូវីដ-១៩។
សេចក្ដីប្រកាសព័ត៌មានបានចាត់ទុកថា ប្រទេសបារាំង មិនត្រឹមជាប្រទេសដែលបានចូលរួមយ៉ាងសកម្មក្នុងការនាំមកនូវសុខសន្តិភាពដល់ប្រទេសកម្ពុជាប៉ុណ្ណោះទេ តែក៏ជាប្រទេសដែលតែងតែជួយគាំទ្រទាំងផ្នែកបច្ចេកទេសនិងហិរញ្ញវត្ថុដល់ការអភិវឌ្ឍកម្ពុជាផងដែរ៕