រដ្ឋបាលខេត្តកំពង់ឆ្នាំង បានសម្រេចបង្កើតក្រុមការងារដោះស្រាយបញ្ហាទំនាស់និងសំណូមពររបស់ប្រជាពលរដ្ឋ ដែលភាគច្រើនពាក់ព័ន្ធបញ្ហាវិវាទដីធ្លី តាមការណែនាំរបស់រដ្ឋមន្រ្តីក្រសួងមហាផ្ទៃ ដោយយកគំរូតាមអភិបាលខេត្តកំពត លោក ម៉ៅ ធនិន។
អភិបាលរងខេត្តកំពង់ឆ្នាំង លោក ស្រ៊ន សំឫទ្ធី ថ្លែងនៅថ្ងៃទី២ ខែវិច្ឆិកា ថាកិច្ចការនេះបានចាប់អនុវត្តនៅដើមខែវិច្ឆិកានេះ ដោយអភិបាលរងស្រុកនីមួយៗដើរតួនាទីជាប្រធានដឹកនាំក្រុមការងារទទួលបណ្ដឹង សំណូមពរ និងរៀបចំវេទិកាសាធារណៈ ជួបជជែកដោះស្រាយទំនាស់និងសំណូមពររបស់ពលរដ្ឋ។
លោកថា ចាប់តាំងពីរដ្ឋបាលខេត្តចេញសេចក្ដីសម្រេចនៅថ្ងៃទី២៧ ខែតុលាមក អាជ្ញាធរបានទទួលបណ្ដឹងពី៦០ទៅ៧០ភាគរយ ពាក់ព័ន្ធរឿងដីធ្លី ហើយក្រៅពីនេះជាសំណូមពរផ្សេងៗរបស់ពលរដ្ឋ។ មន្រ្តីរដ្ឋបាលខេត្តរូបនេះបញ្ជាក់ថា អាជ្ញាធរប្រើប្រាស់យន្តការដោះស្រាយដោយផ្អែកលើគោលការណ៍ច្បាប់និងការឯកភាពគ្នា ហើយដោះស្រាយករណីទំនាស់ណាដែលមិនទាន់បញ្ជូនទៅដល់ដៃតុលាការ។
លោក ស្រ៊ន សំឫទ្ធី ថ្លែងបន្ថែមថា៖ «បើកវេទិកាអញ្ជើញភាគីទាំងសងខាងមកជជែក។ យើងផ្អែកលើទិដ្ឋភាពច្បាប់និងលើភាពជាក់ស្តែង ធ្វើម៉េចឱ្យភាគីទាំងសងខាងឈ្នះទាំងសងខាង។ អត់ឱ្យដោះ ឱ្យមួយវេទនា មួយសប្បាយចិត្ត អត់ទេ! យើងប្រឹងប្រែងដោះយ៉ាងម៉េចឱ្យភាគីទាំង២សប្បាយចិត្តទទួលយកបាន អត់មានថាចប់ហើយបែរទម្លាក់កំហុសខាងនេះខាងនោះ អត់ទេ»។
ប្រភពដដែលបន្ថែមថា រដ្ឋបាលខេត្តរំពឹងខ្ពស់ចំពោះយន្តការដោះស្រាយទំនាស់ក្រៅប្រព័ន្ធតុលាការនេះ ហើយសង្ឃឹមថា បញ្ហារបស់ពលរដ្ឋដែលរដ្ឋបាលក្រុង-ស្រុកទទួលបាននឹងអាចដោះស្រាយបានភាគច្រើននៅរយៈពេល១សប្ដាហ៍ឬមុនដំណាច់ខែវិច្ឆិកានេះ។
ពលរដ្ឋមួយរូបរស់នៅភូមិឡពាង ឃុំតាជេស ស្រុកកំពង់ត្រឡាច ខេត្តកំពង់ឆ្នាំង លោក ស្ងួន ញៀន គាំទ្រចំពោះការដែលអភិបាលខេត្តថ្មីបានបង្កើតក្រុមការងារដោះស្រាយបញ្ហារបស់ពលរដ្ឋ ដោយយកគំរូតាមអភិបាលខេត្តកំពតថ្មី ដែលលោកផ្ដល់រហ័សនាមថាជាតុលាការយុត្តិធម៌។
លោកថា សហគមន៍របស់លោកមានពលរដ្ឋជិត៧០០គ្រួសារ មានទំនាស់ដីធ្លីជាមួយក្រុមហ៊ុន KDC ជាច្រើនឆ្នាំមកហើយ ហើយលោកកំពុងទាមទារឱ្យអាជ្ញាធរដាក់បឹងពោធិ៍ ដែលមានទំហំ២០ហិកតា ទៅជាបឹងអភិរក្សធនធានធម្មជាតិ ដើម្បីទប់ស្កាត់ការគប់គិតគ្នាកាត់ដីបឹងលក់ទៅឱ្យក្រុមហ៊ុនឯកជន។
លោក ស្ងួន ញៀន បន្តទៀតថា លោកបានដាក់សំណើទៅលោកនាយករដ្ឋមន្រ្តី ហ៊ុន សែន បន្ទាប់ពីអាជ្ញាធរបដិសេធសំណើរបស់លោក ខណៈអ្នកភូមិមួយចំនួនត្រូវរងការគំរាមកំហែងតាមផ្លូវតុលាការ។ ប្រភពដដែលបន្ថែមថា លោកក៏កំពុងត្រៀមរៀបចំឯកសារដាក់បណ្ដឹងទៅអភិបាលខេត្តថ្មី។
លោកនិយាយថា៖ «ខ្ញុំសប្បាយចិត្តពេលអភិបាលខេត្តឡើងថ្មី គាត់មានចិត្តមួយ បានន័យថា ចិត្តរបស់គាត់ចង់ជួយប្រជាពលរដ្ឋ។ អត់ដូចអភិបាលខេត្តមុនទេ! ខ្ញុំសង្ឃឹមថា អភិបាលខេត្តថ្មីនេះឈរលើគោលការណ៍យុត្តិធម៌ ត្រឹមត្រូវ និងដើរតាមអភិបាលខេត្ត លោក ម៉ៅ ធនិន ដែលលោកជាគំរូផ្ទាល់។ ខ្ញុំដាក់រហស្សមានអភិបាលនោះ ថាជាតុលាការមុខដែក ហើយជាតុលាការមួយដែលផ្ដល់យុត្តិធម៌ជូនពលរដ្ឋ»។
អ្នកសម្របសម្រួលគម្រោងធុរកិច្ច និងសិទ្ធិមនុស្សនៃមជ្ឈមណ្ឌលសិទ្ធិមនុស្សកម្ពុជា (CCHR) លោក វណ្ណ សុផាត គាំទ្រចំពោះឆន្ទៈដោះស្រាយបញ្ហាដីធ្លីរបស់អភិបាលខេត្តកំពង់ឆ្នាំងថ្មី តាមគំរូអភិបាលខេត្តកំពត លោក ម៉ៅ ធនិន ដែលលោកសង្កេតឃើញថាជារូបភាពមួយល្អ និងមានការគាំទ្រខ្លាំងពីប្រជាពលរដ្ឋ។
យ៉ាងណា លោកថា យន្តការនេះមានប្រសិទ្ធភាពសម្រាប់តែករណីវិវាទតូចៗមួយចំនួន ប៉ុន្តែចំពោះករណីវិវាទធំៗរវាងក្រុមហ៊ុនធំៗ ឬជាមួយបុគ្គលអ្នកមានអំណាចវិញ គឺនៅតែមិនអាចដោះស្រាយ និងកំពុងកើនឡើងក្នុងរយៈពេលចុងក្រោយអំឡុងវិបត្តិកូវីដ-១៩។
លោក វណ្ណ សុផាត ថ្លែងថា៖ «ដោះស្រាយហ្នឹងក៏យើងសង្កេតឃើញដែរថា ដោះស្រាយបញ្ហាជាលក្ខណៈគ្រួសារ ឬជាមួយក្រុមហ៊ុនអីដែរ ប៉ុន្តែជាលក្ខណៈរឿងមិនសូវរសើប រឿងលក្ខណៈធម្មតាៗមួយចំនួន តែបើសិនជាការដោះស្រាយហ្នឹងទាក់ទងនឹងក្រុមហ៊ុនធំៗដែលរំលោភសិទ្ធិមនុស្ស រំលោភសិទ្ធិដីធ្លីរបស់ប្រជាពលរដ្ឋ ដូចជា ក្រុមហ៊ុន OCIC ដូចជាក្រុមហ៊ុនចិនមួយចំនួនដូចជា UDG»។
បុគ្គលិកអង្គការសង្គមស៊ីវិល ធ្វើការផ្ដោតលើសិទ្ធិដីធ្លីរូបនេះបន្តថា រដ្ឋាភិបាលគួរតែបង្កើតយន្តការ និងគោលនយោបាយជាលក្ខណៈប្រព័ន្ធនៅទូទាំងប្រទេស សម្រាប់ឱ្យអាជ្ញាធរថ្នាក់ក្រោមជាតិយកទៅអនុវត្តតាម ទើបបញ្ហារំលោភបំពានសិទ្ធិដីធ្លីទៅលើប្រជាពលរដ្ឋត្រូវបានដោះស្រាយប្រកបដោយប្រសិទ្ធភាព។
រដ្ឋមន្ត្រីក្រសួងមហាផ្ទៃ លោក ស ខេង ថ្លែងកាលពីដើមខែកក្កដា ក្នុងពិធីប្រកាសចូលកាន់តំណែងអភិបាលខេត្តកំពង់ឆ្នាំងថ្មី លោក ស៊ុន វុណ្ណារិទ្ធិ ដោយណែនាំមន្ត្រីរបស់លោកឱ្យព្យាយាមដោះស្រាយបញ្ចប់វិវាទដីធ្លីដោយស្មារតីទទួលខុសត្រូវមុនការបោះឆ្នោតមកដល់ ដោយកុំទម្លាក់កំហុសទៅក្រុមប្រឆាំង៕