ប្រធានគណបក្សខ្មែរឈ្នះ ដែលជាប់ចោទក្នុងសំណុំរឿងព្រំដែន បានស្នើទៅតុលាការសាលាឧទ្ធរណ៍ឱ្យបន្ធូរបន្ថយទោស និងលុបចោលប្រាក់សំណង ដោយអះអាងថា ការធ្វើសកម្មភាពរបស់លោកនាពេលកន្លងមក គ្រាន់តែបំពេញតួនាទីក្នុងនាមជាអ្នកនយោបាយដើម្បីបម្រើប្រជាពលរដ្ឋ និងគ្មានចេតនាបង្កបញ្ហាដល់សង្គមជាតិនោះឡើយ។
ការស្នើនេះធ្វើឡើងអំឡុងពេលសាលាឧទ្ធរណ៍បើកសវនាការជំនុំជម្រះលើបណ្ដឹងឧទ្ធរណ៍របស់ប្រធានគណបក្សខ្មែរឈ្នះ លោក សួង សុភ័ណ្ឌ នៅថ្ងៃទី៣ ខែវិច្ឆិកានេះ ក្រោយពីចៅក្រមសាលាដំបូងរាជធានីភ្នំពេញបានកាត់ទោសលោកឱ្យជាប់ពន្ធនាគារ២០ខែ និងបង្គាប់ឱ្យបង់ប្រាក់២ ០០០លានរៀល ឬប្រហែល៥០ម៉ឺនដុល្លារ ដល់គណៈកម្មការព្រំដែន កាលពីថ្ងៃទី១០ ខែកុម្ភៈ ឆ្នាំ២០២១។
ឈរនៅក្នុងរង្វង់ក្រចកសេះ ក្នុងសម្លៀកបំពាក់ពណ៌ស្លាទុំ ទឹកមុខមាំ លោក សួង សុភ័ណ្ឌ បានបា្រប់ទៅប្រធានក្រុមប្រឹក្សាសាលាឧទ្ធរណ៍ លោក ប្លង់ សំណាង ថាមូលហេតុដែលលោកដាក់បណ្ដឹងមកសាលាឧទ្ធរណ៍ ដោយសារលោកមិនសុខចិត្តចំពោះសេចក្ដីសម្រេចរបស់ចៅក្រមសាលាដំបូងរាជធានីភ្នំពេញ។
លោកបន្តថា សកម្មភាពដែលលោកបានធ្វើកន្លងមក ដើម្បីបម្រើប្រជាពលរដ្ឋនិងការពារផលប្រយោជន៍របស់ប្រទេសជាតិ ក្នុងនាមលោកជាអ្នកនយោបាយម្នាក់តែប៉ុណ្ណោះ ដោយមិនមានចេតនាទុច្ចរិតបង្កផលប៉ះពាល់ដល់សង្គមជាតិឡើយ។
ករណីនេះ លោកបានស្នើទៅប្រធានក្រុមប្រឹក្សាជំនុំជម្រះឱ្យបន្ធូរបន្ថយទោសពី២០ខែមកត្រឹម១៥ខែវិញ និងលើកលែងបង់សំណងប្រាក់ជំងឺចិត្ត២ ០០០លានរៀលដល់គណៈកម្មការព្រំដែនកម្ពុជា។
លោក សួង សុភ័ណ្ឌ និយាយថា៖ «ធម្មតា ក្នុងនាមជាអ្នកច្បាប់ផង ក្នុងនាមជាអ្នកនយោបាយផង ខ្ញុំធ្វើសកម្មភាពកន្លងមក ដើម្បីការពារប្រជាពលរដ្ឋនិងទឹកដីខ្មែរ ហើយសកម្មភាពនេះ វាជាតួនាទីរបស់ខ្ញុំក្នុងនាមជាអ្នកនយោបាយម្នាក់។ បើខ្ញុំចូលធ្វើនយោបាយហើយ ខ្ញុំគ្មានសិទ្ធិការពារនិងបម្រើប្រជាពលរដ្ឋ តើខ្ញុំចូលធ្វើនយោបាយធ្វើអីទៅ? ខ្ញុំទទួលយកការសម្រេចរបស់ចៅក្រមសាលាដំបូងអត់បានទេ ទើបខ្ញុំប្ដឹងមកសាលាឧទ្ធរណ៍ឱ្យជួយរកយុត្តិធម៌»។
ក្រោយពីសួរដេញដោលពីមូលហេតុរួច ប្រធានប្រឹក្សាជំនុំជម្រះសាលាឧទ្ធរណ៍ លោក ប្លង់ សំណាង បានលើកពេលប្រកាសសាលដីកាទៅថ្ងៃទី១២ ខែវិច្ឆិកា ឆ្នាំ២០២១ ខាងមុខ។
អ្នកនាំពាក្យសមាគមការពារសិទ្ធិមនុស្សអាដហុក លោក ស៊ឹង សែនករុណា មានប្រសាសន៍ថា ការស្នើសុំរបស់លោក សួង សុភ័ណ្ឌ ជាសិទ្ធិសេរីភាពរបស់លោក ប៉ុន្តែសម្រាប់អង្គការសង្គមស៊ីវិលវិញ យល់ថា ការចាប់ខ្លួនសកម្មជនអតីតគណបក្សប្រឆាំង សកម្មជនបរិស្ថាន និងសិទ្ធិមនុស្ស រួមទាំងប្រធានគណបក្សខ្មែរឈ្នះរូបនេះដាក់ពន្ធនាគារនោះ ជារឿងនយោបាយ ដោយមិនមែនជាការអនុវត្តច្បាប់ឡើយ។
លោកបន្តថា បើសិនតុលាការទម្លាក់ចោលបទចោទប្រកាន់និងដោះលែងពួកគាត់ទាំងអស់គ្នាឱ្យមានសេរីភាពវិញ វាជាសញ្ញាវិជ្ជមានមួយសម្រាប់កម្ពុជា ព្រោះកន្លងមក កម្ពុជាបានរងនូវការរិះគន់កាន់តែខ្លាំងពីសហគមន៍អន្តរជាតិ ពាក់ព័ន្ធនឹងចំណាត់ការលើសកម្មជននយោបាយ បរិស្ថាន សិទ្ធិមនុស្ស និងប្រធានគណបក្សខ្មែរឈ្នះនេះ។
លោកថា៖ «បង្កើតជំនឿឡើងវិញអំពីឯករាជ្យភាពតុលាការ ពាក់ព័ន្ធនឹងការផ្ដល់ជំនឿចិត្តឡើងវិញទៅដល់រដ្ឋាភិបាលដែលរងការរិះគន់ ដែលប្រជាពលរដ្ឋមើលឃើញថា ស្ថានភាពសិទ្ធិមនុស្ស ហើយនិងនយោបាយមានភាពល្អប្រសើរ។ ហើយសហគមន៍អន្តរជាតិ គេងាកបន្ធូរបន្ថយសម្ពាធផ្សេងៗដែរ បើសិនជាគេមើលឃើញថា រឿងទាំងអស់ហ្នឹងត្រូវបានតុលាការពិចារណាដោះលែងនិងទម្លាក់ចោលបទប្រកាន់ តាមខាងសកម្មជនដែលបានលើកឡើងអីជាដើមហ្នឹង»។
លោក សួង សុភ័ណ្ឌ ត្រូវបានសមត្ថកិច្ចរាជធានីភ្នំពេញចាប់ខ្លួនកាលពីថ្ងៃទី១៤ ខែសីហា ឆ្នាំ២០២០ ក្រោយពីប្រធានគណបក្សមួយនេះបានចុះទៅពិនិត្យមើលបង្គោលព្រំដែនកម្ពុជា-វៀតណាម នៅខេត្តត្បូងឃ្មុំ។ ការចុះទៅពិនិត្យនោះ គឺបន្ទាប់ពីអាជ្ញាធរកម្ពុជាបានចាប់ខ្លួនលោក រ៉ុង ឈុន មេដឹកនាំសហជីព និងជាតំណាងក្រុមប្រឹក្សាឃ្លាំមើលកម្ពុជា បន្ទាប់ពីលោកបានលើកឡើងពីរបាយការណ៍របស់ពលរដ្ឋថា មានការបាត់បង់ទឹកដីកម្ពុជាទៅលើវៀតណាមក្រោយការបោះបង្គោលព្រំដែន។ ទាំងលោក សួង សុភ័ណ្ឌ និងលោក រ៉ុង ឈុន កំពុងជាប់ឃុំឃាំងនៅក្នុងពន្ធនាគារព្រៃសនៅឡើយ៕
