អ្នកនាំពាក្យ បង្ហើបថា «គណបក្សភ្លើងទៀន» នឹងចូលរួមការបោះឆ្នោតខាងមុខ ដើម្បីប្រមូលកម្លាំងអ្នកប្រជាធិបតេយ្យឡើងវិញ បើការគំរាមកំហែងផ្នែកនយោបាយត្រូវបានបញ្ឈប់។
ប្រធានគណបក្សភ្លើងទៀន លោក ទាវ វណ្ឌុល កាលពីថ្ងៃទី៣ ខែវិច្ឆិកា ឆ្នាំ២០២១ បានតែងតាំងលោក ថាច់ សេដ្ឋា ជាអ្នកនាំពាក្យគណបក្សនេះ ដោយយោងទៅលើអតីតភាពអ្នកនយោបាយរូបនោះថាជាអតីតសមាជិកព្រឹទ្ធសភា «គណបក្សសមរង្ស៊ី» និងជាស្ថាបនិក «គណបក្សជាតិខ្មែរ» របស់លោក សម រង្ស៊ី។
អ្នកនាំពាក្យគណបក្សភ្លើងទៀន លោក ថាច់ សេដ្ឋា បានឱ្យ វីអូឌី ដឹងនៅថ្ងៃនេះថា គណបក្សនេះនឹងពិចារណាចូលរួមការប្រកួតបោះឆ្នោតនៅពេលខាងមុខ បើការគំរាមកំហែងផ្នែកនយោបាយត្រូវបានបញ្ឈប់។
លោកថា៖ «បើសិនបរិយាកាសនយោបាយ គួរយើងចូល អាហ្នឹងយើងពិចារណា! បើសិនជាបរិយាកាសដូចសព្វថ្ងៃ នៅមានការចាប់ចង គំរាមកំហែង ការបញ្ចេញមតិក៏ពិបាក យើងក៏ពិបាកក្នុងការសម្រេចថាចូលបោះឆ្នោតឬមិនចូលដែរ! [អ៊ីចឹងមានន័យថា ត្រៀមចូលបោះឆ្នោត?] ត្រូវហើយ! អាហ្នឹងយើងចាំពិនិត្យមើលបរិយាកាសទាំងអស់ហ្នឹង មើលតើវាមានការប្រែប្រួលបែបណា»។
យ៉ាងណា លោក ថាច់ សេដ្ឋា គូសបញ្ជាក់ថា ការត្រៀមខ្លួនទៅប្រកួតការបោះឆ្នោតក្នុងកាលៈទេសៈនេះ មិនមានន័យថាជាសញ្ញាបែកបាក់របស់អតីតគណបក្សសង្គ្រោះជាតិ ដែលតុលាការបានរំលាយនោះទេ តែជាដំណើរឆ្ពោះទៅប្រមូលកម្លាំងអ្នកប្រជាធិបតេយ្យ។
បន្ថែមពីនេះ លោកថា នៅពេលគណបក្សភ្លើងទៀនសម្រេចចិត្តជាផ្លូវការក្នុងការចូលរួមប្រកួតការបោះឆ្នោត គណបក្សនេះនឹងស្វែងរកការរួបរួមជាមួយអ្នកប្រជាធិបតេយ្យដែលបានចេញមកបង្កើតគណបក្សថ្មីៗផងដែរ ខណៈសកម្មជនកំពុងរងការគំរាមកំហែង។
អ្នកនាំពាក្យគណបក្សប្រជាជនកម្ពុជា លោក សុខ ឥសាន មានប្រសាសន៍ថា ការចាប់ចងអ្នកនយោបាយ វានឹងមិនកើតឡើងទេ ដរាបណាពួកគេមិនបានចូលរួមធ្វើសកម្មភាពខុសច្បាប់នោះ។
លោកថា៖ «បើគាត់ជាអ្នកនយោបាយ គាត់ធ្វើនយោបាយមាននីតិសម្បទាឡើងវិញ គាត់កុំផ្សារភ្ជាប់ជាមួយពួកក្រុមឧទ្ទាមក្រៅច្បាប់ គាត់អត់មានបញ្ហាអីទេ»។
សហការីស្និទ្ធនឹងលោក កឹម សុខា គឺលោក មាជ សុណ្ណារ៉ា បានលើកឡើងថា បើ «គណបក្សភ្លើងទៀន» ដែលជា «គណបក្សសមរង្ស៊ី» មានគម្រោងដើរលើផ្លូវនេះមែន វាជាការរំលោភលក្ខន្តិកៈនៅទីក្រុងម៉ានិល ឆ្នាំ២០១២ មុនការប្របាច់បញ្ចូលគ្នារវាងគណបក្សសមរង្ស៊ី និងគណបក្សសិទ្ធិមនុស្ស ដែលការនេះ លោកទុកឱ្យម្ចាស់ឆ្នោតជាអ្នកវិនិច្ឆយ។
លោកថា៖ «អ៊ីចឹងពលរដ្ឋជាម្ចាស់ឆ្នោត អាចនឹងដឹងថាអ្នកណាក្បត់អ្នកណា ក្នុងខណៈដែលមេបក្សកំពុងត្រូវបានញាំញីដោយតុលាការ គឺថាបណ្ដឹងនៅក្នុងប្រព័ន្ធតុលាការមិនទាន់ត្រូវបានដោះស្រាយនៅឡើយ។ អ៊ីចឹងហើយយើងឃើញថា នេះជាការក្បត់ដៃគូឬក៏យ៉ាងណា! [ស្ថិតនៅ]នៅលើប្រជាពលរដ្ឋដែលគាំទ្រជាអ្នកឱ្យពិន្ទុ ជាអ្នកវិនិច្ឆយថាអ្នកណាខុស អ្នកណាត្រូវ»។
ចំណែកអតីតមន្ត្រីជាន់ខ្ពស់គណបក្សប្រឆាំង ដែលបានចេញមកបង្កើតគណបក្សកំណែទម្រង់កម្ពុជា លោក អ៊ូ ច័ន្ទរ័ត្ន យល់ឃើញផ្ទុយពីនេះ ដោយលោកថា បើគណបក្សភ្លើងទៀនសម្រេចចូលរួមបោះឆ្នោតមែន នឹងពុះច្រៀកកម្លាំងប្រជាធិបតេយ្យឱ្យកាន់តែតូច។
លោកថា៖ «សង្គ្រោះជាតិហ្នឹងវាកើតពីសិទ្ធិមនុស្សនិងភ្លើងទៀនហ្នឹង ហើយបើភ្លើងទៀនប្រកាសបែបនេះ មានន័យថា ភ្លើងទៀនទាញយកក្រុមគាត់ទៅវិញហើយ! ទាញបានប៉ុន្មាន យើងមិនដឹង ព្រោះពលរដ្ឋដែលជាអ្នកគាំទ្របានសម្រេចចិត្តទៅហើយ ដោយចង់ឃើញការរួបរួម។ ប៉ុន្តែដល់ពេលគាត់ទាញមកវិញ ងាកទៅរកជ្រុងម្ខាងរបស់គាត់វិញហើយ អ្នកខ្លះជ្រុលដំណើរមករួបរួមហើយនោះនឹងមិនវិលត្រលប់ទៅវិញទេ»។
នាយកប្រតិបត្តិអង្គការអភិវឌ្ឍន៍ផ្នត់គំនិត លោកបណ្ឌិត សេក សុជាតិ មើលឃើញថា ការប្រកាសរបស់គណបក្សភ្លើងទៀន ដែលចង់បង្រួបបង្រួមអ្នកប្រជាធិបតេយ្យអាចនឹងមិនជោគជ័យទេ បើខ្វះការគាំទ្រពីលោក សម រង្ស៊ី និងលោក កឹម សុខា។
លោកថា៖ «ខ្ញុំគិតថា បើសិនគណបក្សភ្លើងទៀនចង់ចូលរួមវាជារឿងល្អ ក៏ប៉ុន្តែបើគ្មានការឯកភាពឬក៏ការមូលមតិគ្នារវាងអតីតមេដឹកនាំ លោក សម រង្ស៊ី និងលោក កឹម សុខា ទេគណបក្សនេះគឺមិនមានឥទ្ធិពលឬក៏មិនមានប្រយោជន៍អីសម្រាប់សង្គមប្រជាធិបតេយ្យនៅកម្ពុជាដែរ»។
អតីតគណបក្សសង្គ្រោះជាតិ ដែលកើតចេញពីការច្របាច់បញ្ចូលគ្នារវាងគណបក្សសិទ្ធិមនុស្ស របស់លោក កឹម សុខា និងគណបក្សសមរង្ស៊ី របស់លោក សម រង្ស៊ី ទទួលបានអាសនៈទាំងក្នុងរដ្ឋសភា និងឃុំ-សង្កាត់ ប្រហាក់ប្រហែលគណបក្សកាន់អំណាចដែរ តែគណបក្សនេះត្រូវបានតុលាការរំលាយផាត់ចេញពីឆាកនយោបាយអំឡុងចុងឆ្នាំ២០១៧។
យ៉ាងណា ចំណាត់ការនេះជំរុញឱ្យក្រុមប្រទេសលោកសេរីចាត់វិធានការមួយចំនួន រួមទាំងដកប្រព័ន្ធ EBA ២០ភាគរយ មុនកាលកំណត់ ដោយសារតែពួកគេមើលឃើញថាបានធ្វើឱ្យស្ថានភាពសិទ្ធិមនុស្សនិងប្រជាធិបតេយ្យធ្លាក់ចុះ។ ករណីនេះ ពួកគេបានជំរុញកម្ពុជាឱ្យស្តារឡើងវិញ ដើម្បីធានាយន្តការប្រជាធិបតេយ្យដូចមានចែងក្នុងរដ្ឋធម្មនុញ្ញ៕