ក្លិនគីមីស្អុយនៅក្នុងដីកសិកម្ម ត្រូវបានត្អូញត្អែរដោយកសិករនានានៅក្នុងនៅខេត្តលបប៊ុរី (Lopburi) ប្រទេសថៃ ត្រូវបានរកឃើញថា កើតមានឡើងចេញពីធុងជាច្រើន ដែលមានទម្ងន់ប្រមាណ៥០០តោន ផ្ទុកទៅដោយសារធាតុគីមីពុលនិងងាយឆាបឆេះមួយចំនួន ត្រូវបានដឹកជញ្ជូនមកកាន់ប្រទេសនេះដោយខុសច្បាប់។
តាមរយៈសំណាកនៃកាកសំណល់ដែលត្រូវបានប្រមូល បង្ហាញថា វាមានកម្រិត pH ខ្ពស់ និងអាចបង្កជាជំងឺមហារីកបាន។ មន្ត្រីមួយចំនួននៃអង្គការបរិស្ថាន បានបញ្ជាក់ថា ខេត្តនេះរងផលប៉ះពាល់ដោយការបំពុល ចាំបាច់តម្រូវឱ្យមានការចោលកាកសំណល់ផ្សេងៗឱ្យបានត្រឹមត្រូវ។ អង្គការបរិស្ថានថៃមួយបានឱ្យដឹងក្នុងឆ្នាំ២០១៨ ថាចិនបាននាំចេញកាកសំណល់គីមីក្នុងបរិមាណដ៏ច្រើនមកកាន់ប្រទេសថៃ ជាពិសេសសំណល់អេឡិចត្រូនិច និងប្លាស្ទិក។
នៅក្នុងបទសម្ភាសជាមួយសារព័ត៌មាន A24 News កសិករដាំល្ងមួយរូប លោក Sommai បានឱ្យដឹងថា៖ «ក្នុងអំឡុងពេលថ្ងៃដែលមានអាកាសធាតុក្ដៅខ្លាំង សារធាតុគីមីទាំងនេះបានសាយភាយជាក្លិនមិនល្អ ខណៈដែលខ្ញុំត្រូវជម្លៀសគ្រួសាររបស់ខ្ញុំចេញពីទីតាំងនេះ ព្រោះយើងមានកូនតូចៗច្រើន»។
ចំណែកកសិករដាំត្រសក់ លោក Gor វិញបានថ្លែងថា៖ «ខ្ញុំមិនបានដឹងថា សារធាតុគីមីនេះត្រូវបានគេយកមកបោះចោលនៅទីនេះពីពេលណានោះទេ ដោយសារតែយើងជាប់រវល់ធ្វើកិច្ចការងារក្នុងចម្ការ»។
លោក Sommai បន្ថែមថា៖ «តំណាងរដ្ឋាភិបាលធ្លាប់បានចុះមកពិនិត្យនៅក្នុងតំបន់នេះដែរ ប៉ុន្តែយើងមិនទាន់ឃើញមានដំណោះស្រាយអ្វីបន្ថែមទៀតនោះទេ»។
កសិកររូបនេះបន្តថា៖ «កាលពីពេលថ្មីៗនេះ យើងបានទៅពិនិត្យសុខភាព ដោយមានការសម្របសម្រួលពីមេភូមិរបស់យើង»។
លោក Gor បានឱ្យដឹងផងដែរថា៖ «យើងត្រូវតែបញ្ឈប់ការប្រើប្រាស់ទឹកពីស្រះក្នុងការស្រោចដំណាំនិងលាងសម្អាតខ្លួន ខណៈដែលទឹកស្រះមានភាពកខ្វក់ខ្លាំង។ ហើយយើងមិនដឹងច្បាស់ថា វាមានសារធាតុពុលប្រភេទណានោះទេ»។
ទាក់ទិននឹងករណីនេះ នាយកអង្គការបរិស្ថានផែនដី (Earth Environmental Organization) លោកស្រី Penchom SaeTang លើកឡើងថា៖ «បុគ្គលិករបស់យើងបានត្រួតពិនិត្យជារួមពីកម្រិតនៃសារធាតុគីមី ដែលហៅថា Volatile organic compounds [VOCs] និងរកឃើញថា វាមានកម្រិតខ្ពស់ដែលអាចប៉ះពាល់ដល់ហ្សែន បង្កឱ្យកើតមានជាមហារីកនិងជំងឺនៅក្នុងខ្លួន»។
នាយកអង្គការបរិស្ថានដដែលបន្តថា៖ «ក្នុងឆ្នាំ២០១៧ ប្រទេសថៃបាននាំចូលកាកសំណល់ប្លាស្ទិកយ៉ាងច្រើន ដែលមានចំនួនចាប់ពី៤ម៉ឺនទៅ៧ម៉ឺនតោន។ ក្នុងឆ្នាំ២០១៨ ចំនួននៃការនាំចូលកាកសំណល់ គឺមានលើសពី៥០ម៉ឺនតោន។ យើងបានរកឃើញថា ផ្លាស្ទិកភាគច្រើននាំចេញពីប្រទេសចិន ហុងកុង ជប៉ុន អឺរ៉ុប និងសហរដ្ឋអាមេរិក»។
លោកស្រីបន្តថា៖ «ករណីនេះបង្ហាញឱ្យឃើញថា ប្រទេសដែលធ្លាប់បញ្ជូនកាកសំណល់ទៅប្រទេសចិន បានប្ដូរទិសដៅមកកាន់ប្រទេសថៃវិញ។ ក្រៅពីសំណល់ប្លាស្ទិក សំណល់អេឡិចត្រូនិចមួយចំនួនធំក៏ត្រូវបាននាំចូលមកផងដែរ រួមមាន ទាំងសំណល់អាលុយមីញ៉ូមផ្សេងៗ ដែលបាននាំចូលសម្រាប់កែច្នៃឡើងវិញ និងបោះចោលក្នុងប្រទេសថៃ។ ជាពិសេស ផេះដែលនាំចូលក្នុងបរិមាណច្រើនពីប្រទេសជប៉ុន។ នេះជាទិដ្ឋភាពទូទៅនៃទីផ្សារនាំចូលកាកសំណល់របស់ប្រទេសថៃ ជាពិសេសបន្ទាប់ពីប្រទេសចិនបានដាក់បម្រាមលើការនាំចូលនិងការនាំចេញនៅក្នុងប្រទេសខ្លួន»៕