នាយករដ្ឋមន្ត្រីជប៉ុន លោក Fumio Kishida នៅថ្ងៃព្រហស្បតិ៍នេះ ថ្លែងថា លោកអាចនឹងត្រូវរ៉ាប់រងតួនាទីជារដ្ឋមន្ត្រីការបរទេស រហូតដល់គណៈរដ្ឋមន្ត្រីថ្មីត្រូវបានបង្កើតឡើងក្នុងខែនេះ ខណៈដែលរដ្ឋមន្ត្រីការបរទេសបច្ចុប្បន្នត្រូវចូលកាន់តំណែងសំខាន់មួយរបស់គណបក្សកាន់អំណាច។
គណបក្សប្រជាធិបតេយ្យសេរី (LDP) ដែលកំពុងតែកាន់អំណាច នៅថ្ងៃព្រហស្បតិ៍នេះ បានបញ្ជាក់ឱ្យដឹងជាផ្លូវការថា រដ្ឋមន្រ្តីការបរទេសជប៉ុន លោក Toshimitsu Motegi គឺជាអគ្គលេខាធិការបក្ស ដែលជាតំណែងលេខ២របស់គណបក្ស និងជាតួនាទីដ៏មានឥទ្ធិពលមួយផងដែរ។
ទីភ្នាក់ងារសារព័ត៌មាន Reuters បានស្រង់សម្ដីនាយករដ្ឋមន្ត្រីជប៉ុន ដែលបានថ្លែងប្រាប់អ្នកសារព័ត៌មានថា៖ «រហូតដល់គណៈរដ្ឋមន្ត្រីថ្មីត្រូវបានបង្កើតឡើង ខ្ញុំក៏បានគិតពីការរ៉ាប់រងតួនាទីជារដ្ឋមន្ត្រីការបរទេសផងដែរ»។
លោក Fumio Kishida បានដឹកនាំគណបក្ស LDP របស់ខ្លួនឱ្យទទួលបានលទ្ធផលបោះឆ្នោតដ៏ល្អប្រសើរជាងការរំពឹងទុក កាលពីថ្ងៃអាទិត្យកន្លងទៅ ដោយគណបក្សនេះអាចរក្សាបាននូវសំឡេងភាគច្រើនរបស់ខ្លួននៅក្នុងសភាជាន់ទាប។
ទាក់ទិននឹងករណីនេះ លោក Toshimitsu Motegi ដែលទទួលបានតំណែងថ្មីនៅក្នុងគណបក្ស បានឱ្យដឹងផងដែរថា លោកនឹងផ្ដោតលើការងារនានា ដូចជា ការស្ដារឡើងវិញនៃសេដ្ឋកិច្ចដែលរងផលប៉ះពាល់ដោយជំងឺរាតត្បាត និងការកែទម្រង់គណបក្ស ដើម្បីបង្កើនភាពចម្រុះឆ្ពោះទៅរកគោលនយោបាយដែលកាន់តែប្រសើរឡើងបន្ថែមទៀត។
លោកបន្ថែមថា៖ «វាពិតជាមានសារៈសំខាន់ខ្លាំងណាស់ក្នុងការបង្ហាញថា LDP កំពុងតែមានការផ្លាស់ប្តូរ ហើយយើងនឹងអនុវត្តនូវអ្វីដែលយើងអាចធ្វើទៅបាន ដើម្បីបង្ហាញពីរូបភាពវិជ្ជមានដ៏ធំមួយ»។
ជាមួយគ្នានេះ លោកបន្តថា គណបក្សកាន់អំណាចក៏នឹងពិភាក្សាលម្អិតអំពីថវិកាបន្ថែមជាមួយដៃគូថ្នាក់ក្រោមផ្សេងៗផងដែរ ដើម្បីបង្កើតវិធានការសេដ្ឋកិច្ចដ៏សម្បូរបែបនិងគ្រប់ជ្រុងជ្រោយ។
គួរបញ្ជាក់ថា សភាគ្រោងនឹងបើកសម័យប្រជុំពិសេសនៅថ្ងៃទី១០ ខែវិច្ឆិកាខាងមុខនេះ ដើម្បីបញ្ជាក់ថា លោក Fumio Kishida ជានាយករដ្ឋមន្ត្រី ខណៈដែលលោកក៏នឹងត្រូវប្រកាសគណៈរដ្ឋមន្ត្រីថ្មីផងដែរ៕
