ប្រភពស្និទ្ធនឹងលោក កឹម សុខា មួយរូប បានឱ្យដឹងថា ប្រធានអតីតគណបក្សប្រឆាំងរូបនេះបានដាក់លក់វីឡារបស់ខ្លួននៅរាជធានីភ្នំពេញ តាំងពីអំឡុងឆ្នាំ២០២០មកម្ល៉េះ ដោយសារគាត់មានគម្រោងផ្លាស់ទៅរស់នៅតំបន់ជាយក្រុងឬខេត្តផ្សេងជំនួសវិញ។
គេហទំព័រអចលនទ្រព្យមួយដែលមានឈ្មោះថា «Century 21 Advanced Property For Sale» បានដាក់រូបម៉ូដផ្ទះជាប្រភេទវីឡា ស្ថិតក្នុងខណ្ឌទួលគោក លក់ក្នុងតម្លៃ២លាន៤សែនដុល្លារអាមេរិក ដែលវីឡានេះត្រូវបានស្គាល់ថាជាវីឡារបស់លោក កឹម សុខា។
បច្ចុប្បន្ន មេដឹកនាំអតីតគណបក្សសង្រ្គោះជាតិរូបនេះក៏កំពុងតែរង់ចាំសវនាការក្នុងសំណុំរឿង «ក្បត់ជាតិ» និងត្រូវបានដាក់ឱ្យស្ថិតនៅក្រោមការត្រួតពិនិត្យរបស់តុលាការផងដែរ ខណៈដែលសិទ្ធិធ្វើនយោបាយនិងការធ្វើដំណើរចេញទៅក្រៅប្រទេសត្រូវបានហាមឃាត់ទាំងស្រុង។
លោក មាជ សុវណ្ណារ៉ា ជាអតីតមន្រ្តីនៃអតីតគណបក្សសង្រ្គោះជាតិ និងជាមនុស្សស្និទ្ធស្នាលមួយរូបនឹងលោក កឹម សុខា ផងដែរនោះ បានឱ្យដឹងកាលពីយប់ថ្ងៃចន្ទថា ប្រធានអតីតគណបក្សប្រឆាំងរូបនេះធ្លាប់បានប្រាប់រូបលោកកាលពីឆ្នាំ២០២០កន្លងទៅ ពីគោលបំណង់ក្នុងការលក់វីឡារបស់ខ្លួនក្នុងរាជធានីភ្នំពេញ ហើយផ្លាស់ទៅកាន់តំបន់ជាយក្រុងវិញ។
នៅពេលនោះ លោក កឹម សុខា ក៏បានសួររូបលោកក្នុងករណីលោកស្គាល់អ្នកណានៅក្រៅប្រទេសដែលមានបំណងទិញវីឡានេះផងដែរ។
លោក មាជ សុវណ្ណារ៉ា ថ្លែងថា៖ «លោកប្រធានចង់លក់វីឡារបស់ខ្លួននេះ ដើម្បីយកលុយទិញដី ហើយសាងសង់ផ្ទះមួយកន្លែងនៅក្នុងតំបន់ជាយក្រុងវិញ ដែលមានខ្យល់អាកាសល្អ មិនមានការកកស្ទះចរាចរណ៍ និងរស់នៅតាមបែបសាមញ្ញក្នុងនាមជាអ្នកនយោបាយជាន់ខ្ពស់មួយរូប»។
លោកបន្តថា សម្រាប់ប្រាក់ដែលនៅសេសសល់ពីនេះ លោក កឹម សុខា គ្រោងនឹងយកទៅចំណាយសម្រាប់ការរស់នៅផ្ទាល់ខ្លួនរបស់លោក ខណៈដែលបច្ចុប្បន្នលោកមានវ័យជិត៧០ឆ្នាំទៅហើយ។
លោក មាជ សុវណ្ណារ៉ា បន្ថែមថា ការលក់នេះមិនជាប់ពាក់ព័ន្ធទៅនឹងរឿងក្ដីរបស់លោក កឹម សុខា នោះទេ ខណៈដែលនេះគឺជារឿងឯកជនរបស់លោក។
លោក កឹម សុខា និងសហមេធាវីការពារក្ដីរបស់លោក២រូប គឺលោក ចាន់ ចេន និងលោក ផែង ហេង មិនអាចទាក់ទងដើម្បីសុំការអត្ថាធិប្បាយជុំវិញករណីនេះបានទេ កាលពីថ្ងៃអង្គារ។
ទោះជាយ៉ាងណា បុគ្គលិកមួយរូបរបស់សេវាកម្មអចលនទ្រព្យ Century 21 បានបញ្ជាក់កាលពីពេលថ្មីៗនេះថា ខាងក្រុមហ៊ុនពិតជាបានទទួលប្លង់ពីម្ចាស់ដើម្បីបានសិទ្ធិផុសលក់ពិតប្រាកដមែន ខណៈដែលប្រភពស្និទ្ធបំផុតមួយទៀតរបស់លោក កឹម សុខា អះអាងថា ខ្លួនមិនបានដឹងថាតើមូលហេតុអ្វីបានជាវីឡានេះត្រូវដាក់លក់យ៉ាងដូច្នេះឡើយ។
ជាមួយគ្នានេះ អតីតនាយកខុទ្ទកាល័យលោក កឹម សុខា គឺលោក មុត ចន្ថា បានឱ្យដឹងកាលពីថ្ងៃអង្គារថា លោកក៏មិនបានដឹងអំពីគោលបំណងរបស់ប្រធានអតីតគណបក្សសង្គ្រោះជាតិរូបនេះដែលដាក់លក់វីឡារបស់ខ្លួនដែរ និងបានបដិសេធឆ្លើយថាតើករណីនះអាចជាប់ពាក់ព័ន្ធនឹងសវនាការសំណុំរឿង«ក្បត់ជាតិ»របស់លោក ដែលត្រូវបានអូសបន្លាយឬយ៉ាងណានោះទេ។
លោកបន្តថា៖ «យើងមិនអាចធ្វើការអត្ថាធិប្បាយលើបញ្ហាផ្ទាល់ខ្លួនរបស់អ្នកដទៃបាននោះទេ។ ដូច្នេះហើយ យើងត្រូវតែគោរពដល់ឯកជនភាពរបស់មនុស្សម្នាក់ៗ»។
សម្រាប់សំណួរថា តើនេះជាសញ្ញាដែលអាចបង្ហាញពីការចូលនិវត្តន៍របស់លោក កឹម សុខា ពីឆាកនយោបាយឬយ៉ាងណា លោក មុត ចន្ថា ក៏បដិសេធឆ្លើយទាក់ទងនឹងករណីនេះផងដែរ។
គួរបញ្ជាក់ថា លោក កឹម សុខា គិតរហូតមកដល់ពេលនេះនៅតែត្រូវបានហាមឃាត់ពីសកម្មភាពនយោបាយ បន្ទាប់ពីតុលាការកំពូលបានសម្រេចរំលាយគណបក្សសង្គ្រោះជាតិក្នុងឆ្នាំ២០១៧ ស្របពេលដែលអតីតមន្ត្រីគណបក្សរបស់ខ្លួនមួយចំនួន ដែលរួមមាន លោក អ៊ូ ច័ន្ទរ័ត្ន និងលោក យ៉ែម បុញ្ញឫទ្ធិ បានចាប់ផ្ដើមបង្កើតគណបក្សនយោបាយថ្មីហើយនៅឆ្នាំនេះ៕
ប្រែសម្រួលពីអត្ថបទដើមជាភាសាអង់គ្លេស ដោយលោក ភុន ច័ន្ទឧសភា
