តំណាងប្រជាសហគមន៍ឡពាង កំពុងត្រៀមដាក់ពាក្យបណ្ដឹងស្នើសុំទៅអភិបាលខេត្តកំពង់ឆ្នាំងថ្មី ឱ្យជួយអន្តរាគមន៍ដោះស្រាយបញ្ហាវិវាទដីធ្លី និងដាក់ដីបឹងក្នុងសហគមន៍ជាតំបន់អភិរក្សធនធានធម្មជាតិសម្រាប់ទុកជាសម្បត្តិរួម និងដើម្បីការពារការកាត់លក់ទៅក្រុមហ៊ុនឯកជន។
លោក ស្ងួន ញឿន តំណាងប្រជាសហគមន៍មួយរូប បានថ្លែងនៅថ្ងៃទី០៤ ខែវិច្ឆិកានេះថា លោកកំពុងរៀបចំឯកសារនិងប្រមូលស្នាមមេដៃពីប្រជាសហគមន៍ដាក់ទៅអភិបាលខេត្តថ្មី លោក ស៊ុន សុវណ្ណារិទ្ធិ នៅសប្ដាហ៍ក្រោយ ដើម្បីឱ្យលោកជួយរកយុត្តិធម៌ក្នុងវិវាទដីធ្លីដ៏រ៉ាំរ៉ៃជាមួយក្រុមហ៊ុន និងដាក់ដីបឹងធម្មជាតិរបស់សហគមន៍ឱ្យពួកគេអភិរក្សនិងអាស្រ័យផល។
លោកថា បញ្ហាទំនាស់ដីធ្លីសហគមន៍ភូមិឡពាង ជាមួយនឹងក្រុមហ៊ុន KDC លើដីទំហំជាង ១៨០ហិកតា បានបន្តអូសបន្លាយជិត២០ឆ្នាំហើយ ហើយប្រជាសហគមន៍ដែលបានចូលរួមតវ៉ា ត្រូវបានចោទប្រកាន់ដាក់ពន្ធនាគារជាបន្តបន្ទាប់យ៉ាងអយុត្តិធម៌ ក្រោមការគប់គិតគ្នាជាប្រព័ន្ធ។
លោកបន្ថែមថា៖ «ខ្ញុំសង្ឃឹមហើយ! សង្ឃឹមថាអភិបាលខេត្តថ្មីហ្នឹងនឹងដោះស្រាយករណីដីធ្លីរបស់ខ្ញុំ និងរឿងបឹងផង! គាត់នឹងអន្តរាគមន៍រឿងហ្នឹង ព្រោះបើសិនគាត់ឈរលើគោលការណ៍មួយដោយត្រឹមត្រូវនិងយុត្តិធម៌ មិនលម្អៀង គាត់ស្រឡាញ់ប្រជារាស្រ្ត គាត់មិនស្រឡាញ់ក្រុមហ៊ុន។ តែបើគាត់មិនឈរលើគោលការណ៍ត្រឹមត្រូវនិងយុត្តិធម៌ ឈរតែលើក្រុមហ៊ុនទេ ទោះអភិបាលខេត្ត១០ ក៏ដោះស្រាយរឿងដីធ្លីហ្នឹងអត់ចេញដែរ»។
ប្រភពដដែលបន្តថា ប្រជាសហគមន៍នេះបានបាត់បង់ផ្ទះ ដីស្រែ និងដីព្រៃធ្លាប់អាស្រ័យផល ក្រោមការរំលោភយកពីក្រុមហ៊ុនតាំងពីឆ្នាំ២០០៨មក រហូតដល់បច្ចុប្បន្ន ពួកគេប្រមាណ៦០គ្រួសារកំពុងបន្តជាប់ក្នុងជម្លោះនេះនៅឡើយ ខណៈដីបឹងសហគមន៍ជាង៤៧ហិកតាដែលជាប្រភពធនធានត្រី ខ្ចៅខ្យង ផ្ដល់ដីដាំបន្លែបង្ការផ្សេងៗ ក៏កំពុងរងការគំរាមកំហែងជីកនិងចាក់ដីលុប។
តំណាងប្រជាសហគមន៍ដែលធ្លាប់ជាប់ពន្ធនាគាររូបនេះ បន្តទៀតថា ពួកគេបានស្នើសុំអាជ្ញាធរពាក់ព័ន្ធដាក់បឹងក្នុងតំបន់អភិរក្ស និងស្ដារនិងធ្វើទំនប់ទប់ទឹកស្តុកទុកប្រើប្រាស់ តែត្រូវមេភូមិឡពាង ភូមិសំរោង និងភូមិសូវង្សបដិសេធ ប៉ុន្តែចុងក្រោយ មេភូមិបែរជាដើរប្រមូលស្នាមមេដៃពលរដ្ឋឱ្យគាំទ្រការស្ដារបឹង ដោយជ្រើសយកក្រុមហ៊ុនកូនលោក ថៃ ហ៊ី ជាម្ចាស់ក្រុមហ៊ុនដែលបានរំលោភយកដីពួកគេទៅវិញ។
លោកបន្តថា លោកមិនជំទាស់នឹងផែនការនេះទេ ប៉ុន្តែអាជ្ញាធរត្រូវផ្ដល់ព័ត៌មានពាក់ព័ន្ធគម្រោងនោះឱ្យបានច្បាស់លាស់ និងត្រូវមានការចូលរួមពីប្រជាពលរដ្ឋ ដើម្បីធានាពីតម្លាភាព ចៀសវាងការចោទប្រកាន់ពីប្រជាពលរដ្ឋ។
លោក ស្ងួន ញឿន ថ្លែងថា៖ «កន្លែងសម្ដេច ស ខេង អីក៏ខ្ញុំចូលអស់ហើយ! ខេត្តក៏ខ្ញុំចូលអស់ដែរ មន្ទីរ ស្រុកអីហ្នឹងចូលអស់ហើយ ឃុំអីហ្នឹងខ្ញុំចូលអស់ហើយ គេចាំតែអ្នកទាំង៣ហ្នឹងស៊ីញ៉េទេ។ និយាយត្រង់ទៅ គេចាំតែមេភូមិទាំង៣ហ្នឹងស៊ីញ៉េទេ គឺរារាំងបឹងហ្នឹងសព្វថ្ងៃ គឺមកពីមេភូមិតែម្តង។ មេភូមិទាំង៣ហ្នឹងកំពុងតែគប់គិតគ្នាហើយ»។
លោកបន្ថែមទៀតថា ប្រសិនបើអាជ្ញាធររដ្ឋាភិបាលបណ្ដោយឱ្យអាជ្ញាធរមូលដ្ឋានបន្តធ្វើបែបនេះចំពោះប្រជាពលរដ្ឋ ហើយមិនព្រមដោះស្រាយទៀតនោះ ពួកគេនឹងបាត់ការគាំទ្រពីប្រជាពលរដ្ឋក្នុងការបោះឆ្នោតនាពេលខាងមុខ ហើយគណបក្សដឹកនាំរដ្ឋាភិបាលនឹងបាត់បង់សំឡេងឆ្នោត។
ពលរដ្ឋរស់នៅភូមិសូវង្សមួយរូបដែលកំពុងជាប់បណ្ដឹងនៅតុលាការ អ្នកស្រី ស៊ុំ ភន់ ថ្លែងថា អ្នកស្រីនឹងចូលរួមផ្ដិតមេដៃដាក់ពាក្យបណ្ដឹងស្នើឱ្យអភិបាលខេត្តថ្មីជួយផ្ដល់យុត្តិធម៌លើបញ្ហាវិវាទដីធ្លីជាមួយក្រុមហ៊ុន KDC និងជួយរក្សាបឹងធម្មជាតិក្នុងសហគមន៍។
អ្នកស្រីថា គាត់កំពុងរងបណ្ដឹងព្រហ្មទណ្ឌពីបទ «ប្រើប្រាស់ហិង្សាលើម្ចាស់កម្មសិទ្ធិអចលនទ្រព្យសុចរិត» បន្ទាប់ពីអ្នកស្រីនិងបងប្អូនជីដូនមួយរបស់គាត់បន្តធ្វើស្រែលើដីទំហំកន្លះហិកតាដែលក្រុមហ៊ុនសន្យាទិញក្នុងតម្លៃ១ម៉ឺនដុល្លារ មុនធ្វើរបងនៅឆ្នាំ២០១៣ ប៉ុន្តែក្រុមហ៊ុនបានក្រឡាស់សម្ដីវិញ។
អ្នកស្រីនិយាយថា៖ «គាត់[តុលាការ]សួរថា ដីអត់ទាន់ដោះស្រាយហើយ ម៉េចបានធ្វើស្រែលើដីនោះ គេអត់ឱ្យធ្វើទេ គាត់ថា! ខ្ញុំថា ខ្ញុំក្រអ៊ីចឹង បើអត់ឱ្យខ្ញុំធ្វើស្រែ ខ្ញុំបានស្រូវឯណាឱ្យកូនហូប ហើយក៏អត់ទាន់មានក្រដាសរក្សាការពារពីតុលាការដែរ ដីហ្នឹង ខ្ញុំថាអ៊ីចឹង»។
អ្នកស្រីបន្ថែមថា អ្នកស្រីនិងអ្នកភូមិដទៃទៀតក៏កំពុងបារម្ភពីការបាត់បង់បឹងធម្មជាតិរបស់សហគមន៍ផងដែរ បន្ទាប់ពីអាជ្ញាធរចង់ប្រគល់ឱ្យក្រុមហ៊ុនឯកជនគ្រប់គ្រង ខណៈអ្នកស្រីតែងអាស្រ័យផលត្រី ខ្ចៅខ្យង និងបន្លែជាដើម នៅរដូវវស្សា ទោះមិនមានដីស្រែឬដីចម្ការក្បែរបឹងក្ដី។
អភិបាលរងខេត្តកំពង់ឆ្នាំង លោក ស្រ៊ន សំឫទ្ធី លើកឡើងថា រដ្ឋបាលខេត្តនឹងទទួលយកសំណើរបស់ប្រជាសហគមន៍ ហើយនឹងចាត់ក្រុមការងារថ្នាក់ស្រុកដើម្បីពិនិត្យនិងដោះស្រាយ។
លោកថា៖ «បើគាត់ដាក់ទៅថ្នាក់ស្រុកក៏ល្អដែរ ព្រោះយើងបានចាត់ក្រុមការងារ៨ក្រុម ដូចខ្ញុំបានប្រាប់បងពីថ្ងៃមុនហ្នឹង ក្នុងការធ្វើកិច្ចការហ្នឹងឱ្យបាន។ អ៊ីចឹងប្រជាពលរដ្ឋអាចយកបណ្ដឹងតវ៉ាទៅដាក់នៅរដ្ឋបាលស្រុកកំពង់ត្រឡាចក៏បានដែរ»។
ប្រធានភូមិឡពាង លោក ឌុច ប៊ុតហេង ច្រានចោលការលើកឡើងរបស់ពលរដ្ឋដែលចោទអាជ្ញាធរថាគប់គិតគ្នាលក់ដីបឹងទៅក្រុមហ៊ុនឯកជន។ លោកថា លោកមានទាំងឯកសារបញ្ជាក់ពីគម្រោងស្ដារបឹងទាំងជម្រៅ២ម៉ែត្រ និងរយៈពេល៥ឆ្នាំក្នុងកុងត្រា ដែលអាជ្ញាធរអនុញ្ញាតឱ្យក្រុមហ៊ុនស្ដារ បើសិនពលរដ្ឋចង់ពិនិត្យ។
លោកថ្លែងថា៖ «អត់មានប៉ះពាល់ទេ បឹងដែលយើងបំព្រួញនៃការស្ដារនេះ យើងទុកគែមៗបឹង ទុកឱ្យប្រជាពលរដ្ឋអាស្រ័យផល បង្កើតកសិកម្ម ទាំងធ្វើស្រូវ ទាំងធ្វើបន្លែ ឱ្យគាត់បានអាស្រ័យផលរហូត។ យើងគ្រាន់ជួយបំព្រួញតែប៉ុណ្ណឹង ហើយផ្ទៃបឹងវិញមិនមែន២៤ហិកតាទេ វាធំជាងហ្នឹងទៀត។ ប៉ុន្តែដើម្បីប្រជាពលរដ្ឋទាំងអស់គ្នា ទាំង៣ភូមិ ឱ្យគាត់អាស្រ័យផលទៅ ផ្ទៃបឹងដែលមានប៉ុន្មានទុកឱ្យយកទឹកខួបប្រាំង ខួបវស្សា សត្វពាហនៈ និងបង្កបង្កើនផលផ្នែកកសិកម្មផង»។
កាលពីថ្ងៃទី២៧ ខែតុលា ឆ្នាំ២០២១ អភិបាលខេត្តកំពង់ឆ្នាំងបានចេញលិខិតសម្រេចបង្កើតក្រុមការងារដោះស្រាយទំនាស់ និងសំណូមពររបស់ប្រជាពលរដ្ឋ ដោយមានអភិបាលរងតាមស្រុកនីមួយៗជាប្រធានសម្រាប់ទទួលពាក្យបណ្ដឹង ពិនិត្យ និងរៀបចំវេទិកាជជែកដោះស្រាយជាមួយភាគីទំនាស់និងប្រជាពលរដ្ឋ ដោយយកលំនាំតាមអភិបាលខេត្តកំពតថ្មី លោក ម៉ៅ ធនិន តាមសំណើរបស់រដ្ឋមន្រ្តីក្រសួងមហាផ្ទៃ លោក ស ខេង។
រដ្ឋមន្ត្រីក្រសួងមហាផ្ទៃបានថ្លែងកាលពីដើមខែកក្កដា ក្នុងពិធីប្រកាសចូលកាន់តំណែងអភិបាលខេត្តកំពង់ឆ្នាំងថ្មី លោក ស៊ុន វុណ្ណារិទ្ធិ ដោយណែនាំមន្ត្រីរបស់លោកត្រូវព្យាយាមដោះស្រាយបញ្ចប់វិវាទដីធ្លីក្រោមស្មារតីទទួលខុសត្រូវ ដោយកុំទម្លាក់កំហុសទៅក្រុមប្រឆាំង ដោយលោកថា បញ្ហានេះនឹងធ្វើប៉ះពាល់ដល់សន្លឹកឆ្នោតរបស់គណបក្សប្រជាជនកម្ពុជានៅក្នុងការបោះឆ្នោតនាពេលខាងមុខ៕
