តុលាការបានដោះលែងសកម្មជនសង្គម និងសមាជិកអតីតគណបក្សប្រឆាំង ៥នាក់ នៅថ្ងៃសុក្រនេះ បន្ទាប់ពីពួកគេបានអនុវត្តទោសក្នុងពន្ធនាគារប្រមាណជាង១ឆ្នាំរួចមក។
យោងតាមប្រភពពីសាច់ញាតិរបស់ពួកគេបានឱ្យដឹងថា សកម្មជនដែលត្រូវតុលាការសម្រេចដោះលែងឱ្យមានសេរីភាពវិញនោះ រួមមាន សកម្មជនសង្គមនិងបរិស្ថាន លោក កើត សារ៉ាយ លោក ថា ឡាវី លោក មាន ព្រហ្មមុន្នី រួមទាំងសមាជិកអតីតបក្សប្រឆាំងពីរនាក់ គឺលោក ជុំ ពុទ្ធី និងលោក ឈួរ ផេង។
តុលាការក្រុងភ្នំពេញ កាលពីថ្ងៃទី២៦ ខែតុលា បានកាត់ទោសសកម្មជនសង្គមនៃក្រុមយុវជនខ្មែរថាវរៈ ចំនួន៧នាក់ រួមមាន កញ្ញា ឈឿន ដារ៉ាវី, លោក ហ៊ុន វណ្ណៈ, លោក មាន ព្រហ្មមុន្នី, ព្រះតេជព្រះគុណ កើត សារ៉ាយ, លោក ថា ឡាវី, លោក មួង សុភ័ក្រ, និងកញ្ញា អេង ម៉ាឡៃ ហៅ សូ មេត្តា និងសកម្មជនគណបក្សសង្គ្រោះជាតិ ចំនួន៣នាក់ រួមមាន លោក ជុំ ពុទ្ធី, លោក ឈួរ ផេង និងលោក គង់ សំអាន ឱ្យជាប់ពន្ធនាគារម្នាក់ៗចំនួន២០ខែ និងពិន័យជាប្រាក់ម្នាក់ៗចំនួន២ លានរៀល (២ ០០០ ០០០ រៀល) ពីបទ «ញុះញង់» តាមបញ្ញត្តិមាត្រា៤៩៤ និងមាត្រា៤៩៥ នៃក្រមព្រហ្មទណ្ឌកម្ពុជា។ ប៉ុន្តែក្នុងនោះ អនុវត្តទោសជាប់ពន្ធនាគារ១៤ខែ ចំណែកទោសដែលនៅសល់ត្រូវបានព្យួរសាកល្បងរយៈពេល២ឆ្នាំ។ លើកលែងតែកញ្ញា ឈឿន ដារ៉ាវី, លោក ហ៊ុន វណ្ណៈ, លោក ជុំ ពុទ្ធី និងលោក ឈួរ ផេង ត្រូវអនុវត្តទោសជាប់ពន្ធនាគារចំនួន១៥ខែ។
យ៉ាងណាក្ដី បើគិតពីរយៈពេលនៃការជាប់ឃុំ ពួកគេនឹងត្រូវដោះលែងជាបន្តបន្ទាប់ចាប់ពីពេលនេះតទៅ រហូតដល់ពាក់កណ្ដាលខែវិច្ឆិកា ឬដើមខែធ្នូ ខាងមុខនេះ។
ដោយឡែក ចៅក្រមសាលាឧទ្ធរណ៍នៅថ្ងៃនេះ ក៏បានកាត់តម្រឹមទោសឱ្យ «សកម្មជនមាតាធម្មជាតិ» ៣នាក់ រួមមាន លោក ថុន រដ្ឋា, កញ្ញា ឡុង គន្ធា និងកញ្ញា ភួន កែវរស្មី ជាប់ពន្ធនាគារ១ឆ្នាំ២ខែ ខណៈទោសដែលនៅសល់នឹងត្រូវព្យួរសាកល្បងរយៈពេល៣ឆ្នាំ។
បើតាមប្រភពពីសាច់ញាតិរបស់សកម្មជនមាតាធម្មជាតិ ឱ្យដឹងថា បើគិតពីថ្ងៃចាប់ខ្លួនមកទល់នឹងថ្ងៃនេះ ពួកគេនឹងត្រូវដោះលែងឱ្យមានសេរីភាពវិញនៅថ្ងៃសុក្រនេះ៕
