គណៈប្រតិភូផ្លូវការដំបូងរបស់សភាអឺរ៉ុប នៅថ្ងៃព្រហស្បតិ៍ម្សិលមិញនេះ បានថ្លែប្រាប់កោះតៃវ៉ាន់ថា ពួកគេមិនឯកោនោះទេ ហើយក៏បានអំពាវនាវឱ្យមានសកម្មភាពរឹងមាំនានាបន្ថែមទៀត ដើម្បីពង្រឹងទំនាក់ទំនងរវាងសហភាពអឺរ៉ុបនិងតៃវ៉ាន់ ខណៈដែលដែនកោះមួយនេះ បច្ចុប្បន្នកំពុងតែប្រឈមនឹងការដាក់សម្ពាធពីប្រទេសចិន។
តៃវ៉ាន់ ដែលមិនមានទំនាក់ទំនងការទូតផ្លូវការជាមួយបណ្ដាប្រទេសអឺរ៉ុបណាមួយ ក៏បានបង្ហាញពីគោលបំណងក្នុងការធ្វើឱ្យទំនាក់ទំនងជាមួយសមាជិកនៃសហភាពអឺរ៉ុបកាន់តែស៊ីជម្រៅបន្ថែមទៀតផងដែរ។
ដំណើរទស្សនកិច្ចរបស់ប្រតិភូសភាអឺរ៉ុបទៅកាន់កោះតៃវ៉ាន់នេះ ក៏ត្រូវបានធ្វើឡើងស្របពេលដែលចិនកំពុងតែបង្កើនសម្ពាធយោធាមួយចំនួន ដូចជា សកម្មភាពពីសំណាក់កងទ័ពអាកាសរបស់ចិនម្តងហើយម្តងទៀតនៅក្នុងដែនអាកាសតៃវ៉ាន់ផងដែរ។
ទាក់ទិននឹងករណីនេះ សមាជិកសភាអឺរ៉ុបដែលដឹកនាំក្រុមប្រតិភូ លោក រ៉ាហ្វាអ៊ែល ក្លាក់ស៍មែន (Raphael Glucksmann) បានថ្លែងទៅកាន់ប្រធានាធិបតីតៃវ៉ាន់ លោកស្រី សៃ អ៊ីងវេន (Tsai Ing-wen) នៅក្នុងកិច្ចប្រជុំមួយដែលត្រូវបានផ្សាយផ្ទាល់តាមបណ្ដាញសង្គមហ្វេសប៊ុកថា៖ «យើងមកកាន់ទីនេះជាមួយនឹងសារដ៏សាមញ្ញនិងច្បាស់លាស់មួយ “អ្នកមិនមែននៅតែម្នាក់ឯងនោះទេ អឺរ៉ុបកំពុងតែនៅជាមួយអ្នក”»។
ទីភ្នាក់ងារសារព័ត៌មាន Reuters បានស្រង់សម្ដីសមាជិកសភារូបនេះបន្តថា៖ «ដំណើរទស្សនកិច្ចរបស់យើងគួរតែត្រូវបានចាត់ទុកថាជាជំហានដំបូងដ៏សំខាន់មួយ។ នៅពេលបន្ទាប់ទៀត យើងត្រូវការរបៀបវារៈនៃកិច្ចប្រជុំកម្រិតខ្ពស់ជាក់លាក់ និងជំហានរួមគ្នាមួយ ដើម្បីកសាងភាពជាដៃគូរវាងសហភាពអឺរ៉ុប និងតៃវ៉ាន់ ឱ្យកាន់តែខ្លាំងក្លាបន្ថែមទៀត»។
ជាការឆ្លើយតប លោកស្រី សៃ អ៊ីងវេន បានឱ្យដឹងថា៖ «យើងជឿជាក់ថា តៃវ៉ាន់ និងសហភាពអឺរ៉ុប ពិតជាអាចបន្តពង្រឹងភាពជាដៃគូរបស់យើងនៅក្នុងគ្រប់វិស័យទាំងអស់»។
គួរបញ្ជាក់ថា ប្រទេសចិននៅតែបន្តអះអាងថា កោះតៃវ៉ាន់គឺជាទឹកដីរបស់ខ្លួន ហើយបាននិងកំពុងបង្កើនសម្ពាធកាន់តែខ្លាំងឡើងលើដែនកោះមួយនេះ ខណៈដែលសកម្មភាពរបស់ចិននេះក៏ត្រូវបានថ្កោលទោសដោយអន្តរជាតិផងដែរ៕