អនុប្រធានសហព័ន្ធសហជីពចំណីអាហារ និងសេវាកម្មកម្ពុជា គាំទ្រចំពោះការបើកដំណើរការអាជីវកម្មបៀហ្កាឌិនឡើងវិញ ប៉ុន្តែរដ្ឋាភិបាលគួរតែមានកញ្ចប់ថវិកាជួយគាំពារ សម្រាប់កម្មករនិយោជិតដែលឆ្លងជំងឺកូវីដ-១៩។
អនុប្រធានសហព័ន្ធសហជីពចំណីអាហារ និងសេវាកម្មកម្ពុជា លោកស្រី អ៊ូ ទេពផល្លីន បានលើកឡើងថា ចំពោះការបើកដំណើរការឡើងវិញ នូវអាជីវកម្មបៀហ្កាឌិននេះ វាជារឿងល្អមួយ ដែលវាអាចជួយឲ្យស្រ្តី ឬ កម្មករ និស្សិត មានការងារធ្វើឡើងវិញ។ ប៉ុន្តែលោកស្រីក៏នៅតែមានក្ដីបារម្ភខ្លះដែរចំពោះការផ្ទុះឆ្លងជំងឺកូវីដ-១៩ នៅពេលដាក់ឲ្យដំណើរការឡើងវិញនេះ។
លោកស្រីមានប្រសាសន៍ថា៖ «វាអាចជួយឲ្យស្រ្តីឬក៏កម្មករ និស្សិតមានដំណើរការការងារធ្វើឡើងវិញអ៊ីចឹង ប៉ុន្តែទោះបីជាបើកវិញក៏ដោយ ក៏មិនមែនមានន័យថា ថៅកែទាំងអស់ហ្នឹង គឺត្រូវតែបានជ្រើសរើសកម្មករទាំងអស់នោះ ឱ្យចូលទៅវិញទាំងអស់ដែរ ព្រោះមិនមែនមានន័យថា ស្ថានភាពកូវីដ-១៩ លែងមានណា គឺនៅជាមួយហ្នឹងបរិយាកាសទាំងអស់ហ្នឹងឯង។ តែអ្វីដែលសំខាន់យើងអាចមើលឃើញថា អ្វីជាការបារម្ភនោះ គឺថៅកែអាចនិងមិនយកកម្មករនិយោជិកទាំងអស់ចូលធ្វើការវិញទេ អាចថា ជ្រើសរើសខ្លះឲ្យទៅខ្លះអ៊ីចឹង»។
អ្នកស្រីបានសង្កត់ធ្ងន់ថា៖ «ប្រសិនបើកម្មករនិយោជិតណាមួយគាត់ឆ្លងកូវីដ យើងឃើញថាច្បាប់ណាមួយក៏ដោយអត់ទាន់មានជាការគាំទ្រ ត្រង់ថា នៅពេលកម្មករនិយោជិតគាត់ឆ្លងកូវីដ ចំពោះវិស័យសេវាកម្មកម្សាន្ត និយោជកអត់មានកាតព្វកិច្ចនៅក្នុងការបង់ប្រាក់ឈ្នួលជូនកម្មករនិយោជិតទេ បើសិនជាគាត់ឆ្លងកូវីដ គឺគាត់ត្រូវព្យាបាលផ្សេងៗ គាត់ទទួលខុសត្រូវលើខ្លួនឯងទាំងអស់ កន្លែងហ្នឹងគាត់ពិបាកសម្រាប់និយោជកដែរ ពីព្រោះនិយោជកគាត់ជួបឧបសគ្គកន្លែងហ្នឹង ប្រសិនបើមិនមែនត្រឹមតែកម្មករគាត់ឆ្លងកូវីដទេ ប្រសិនជាគាត់ឆ្លង សមាជិកគាត់ឆ្លងគាត់ត្រូវបិទផ្អាកមុខរបបរការងាររបស់គាត់ដែរ លុះត្រាតែរដ្ឋាភិបាលហ្នឹងមានកញ្ចប់ណាមួយនៅក្នុងការគាំទ្រទៅដល់កម្មករផង គាំទ្រនិយោជកផងនិងតម្រូវថានៅពេលកម្មករនិយោជិតណាម្នាក់ឆ្លងកូវីដគាត់ត្រូវទទួលបានប្រាក់ឧបត្ថមពីការព្យាបាល ប្រាក់ព្យាបាលក្ដីគឺត្រូវទទួលបានប្រាក់ឧបត្ថមពីរដ្ឋាភិបាល»។
លោកស្រីបន្ថែមថា ទោះជានៅក្នុងករណីដែលរដ្ឋាភិបាលថា មានប្រាក់ឧបត្ថមពីបេឡាជាតិរបបសន្តិសុខសង្គម (ប.ស.ស) ពេលដែលគាត់ព្យាបាលចប់ក៏ដោយសេវាកម្មទាំងអស់នោះមិនទាន់បានចុះបញ្ជីជារបបសន្តិសុខសង្គមនៅឡើយ។ អ្នកស្រីបានរម្លិចឲ្យឃើញថា រដ្ឋាភិបាលគួរតែមានកញ្ចប់ថវិការនៅក្នុងការគាំទ្រនៅពេលដែលកម្មករនិយោជិតកំពុងព្យាបាលកូវីដឬឆ្លងជំងឺកូវីដ។ រដ្ឋាភិបាលគួរតែមានការគាំពារប្រសិនបើនៅក្នុងករណីនៅក្នុងសេវាកម្មកម្សាន្តមានការឆ្លង គឺត្រួវមានការគាំពារទៅលើផ្នែកជីវភាពរបស់គាត់ ប្រសិនបើគាត់ឆ្លងគាត់នឹងមានបញ្ហាប្រឈមទៅនិងរឿងព្យាបាលហើយអត់មានប្រាក់ជួយគាំទ្រទៅដល់គ្រួសារគាត់។
គួររំលឹកផងដែរថា ក្រសួងទេសចរណ៍កាលពីថ្ងែទី៣ ខែវិច្ឆិកានេះ បានចេញសេចក្ដីជូនដំណឹង ស្ដីពី ការបើកដំណើរការអាជីវកម្មបៀហ្កាឌិនទូទាំងប្រទេសឡើងវិញ។ យោងតាមសេចក្ដីជូនដំណឹងបានឲ្យដឹងថា សម្រាប់ការបើកអាជីវកម្មបៀហ្កាឌិនឡើងវិញនេះ តម្រូវឱ្យម្ចាស់អាជីវកម្មត្រូវអនុវត្តឱ្យបានម៉ឺងមាត់នូវវិធានការសុវត្ថិភាពទេសចរណ៍ និងនិតិវិធីប្រតិបត្តិស្ដង់ដាអប្បបរមា (SOP) និងតម្រូវឱ្យតាមដានពិនិត្យសកម្មភាពអាជីវកម្មជាប្រចាំ ដើម្បីចូលរួមទប់ស្កាត់ការឆ្លងរាលដាលនៃជំងឺកូវីដ-១៩៕
