ប្រមុខរដ្ឋាភិបាលអនុញ្ញាតឱ្យប្រជាពលរដ្ឋអាចរៀបចំពិធីមង្គលការឡើងវិញ ក្រោយប្រកាសបើកប្រទេស ប៉ុន្តែពិធីនោះត្រូវកំណត់ឱ្យមានភ្ញៀវចូលរួមច្រើនបំផុតត្រឹម២០០នាក់ប៉ុណ្ណោះ។
នៅក្នុងពិធីដាក់សម្ពោធអាគារទីស្ដីការក្រសួងរៀបចំដែនដី នគរូបនីយកម្ម និងសំណង់ នៅថ្ងៃទី០៨ ខែវិច្ឆិកា ឆ្នាំ២០២១នេះ លោកនាយករដ្ឋមន្ត្រី ហ៊ុន សែន ថ្លែងថា លោកមានមោទកភាពដែលប្រជាពលរដ្ឋបានចូលរួមប្រកាន់ខ្ជាប់វិធានការសុខាភិបាលក្នុងការការពារជំងឺកូវីដ-១៩ ដោយបានពាក់ម៉ាស់ រក្សាគម្លាត ខណៈពលរដ្ឋកាន់តែច្រើនបានទទួលវ៉ាក់សាំង។
លោកបន្តថា ក្រោយពីបានពិនិត្យសំណើរបស់គណៈកម្មការជាតិប្រយុទ្ធប្រឆាំងកូវីដ-១៩ លោកបានសម្រេចកាលពីយប់ថ្ងៃម្សិលមិញ ដោយសម្រេចអនុញ្ញាតឱ្យប្រជាពលរដ្ឋអាចរៀបចំកម្មវិធីមង្គលការឡើងវិញ ដោយកំណត់ចំនួនម្ចាស់ដើមការនិងភ្ញៀវត្រឹម២០០នាក់ប៉ុណ្ណោះ។
លោកបានថ្លែងបញ្ជាក់ថា៖ «រៀបការ! ម្សិលមិញ ខ្ញុំបញ្ជាក់ហើយ ការអនុញ្ញាតឱ្យចូលរួមច្រើនបំផុត២០០នាក់ តែមិនគិតចំពោះអ្នកបម្រើសេវា ព្រោះក្នុងហ្នឹងបើមិនអ៊ីចឹង អនុវត្តមិនបានទេ! សេវាគឺស្អី ក្រុមចុងភៅ ក្រុមភ្លេង អាចារ្យ អ្នកថតរូប បើយកទៅគិតក្នុង២០០នាក់ដែរ គឺភ្ញៀវកាន់តែតិច។ អ៊ីចឹងសរុបខ្ទង់២៥០នាក់ ប៉ុន្តែម្ចាស់ដើមការនិងភ្ញៀវត្រឹម២០០នាក់ប៉ុណ្ណឹង»។
សម្រាប់ការបើកខារ៉ាអូខេ ឌីស្កូថេក និងរង្គសាល ជាដើម លោកនាយករដ្ឋមន្ត្រីថ្លែងថា រង់ចាំក្រោយថ្ងៃទី៣០ ខែវិច្ឆិកា ឆ្នាំ២០២១សិន។
កាលពីដើមខែវិច្ឆិកានេះ ប្រមុខរដ្ឋាភិបាល លោក ហ៊ុន សែន បានប្រកាសបើកប្រទេសឡើងវិញ លើគ្រប់វិស័យ ចាប់ពីថ្ងៃទី១ ខែវិច្ឆិកា ឆ្នាំ២០២១តទៅ ដោយយោងទៅលើកត្តាសំខាន់ចំនួន៤ រួមមាន ការសម្រេចបានលទ្ធផលនៃការចាក់វ៉ាក់សាំងកូវីដ-១៩ ការពង្រឹងនិងពង្រីកសមត្ថភាពក្នុងការព្យាបាលជំងឺកូវីដ-១៩ ការឆ្លងកាត់បទពិសោធន៍នៃការគ្រប់គ្រងទប់ស្កាត់ការឆ្លងរាលដាលនៃជំងឺកូវីដ-១៩ ព្រមទាំងរបៀបគ្រប់គ្រងទប់ស្កាត់នៃជំងឺនេះក្នុងទ្រង់ទ្រាយធំ និងការយល់ដឹងរបស់ប្រជាពលរដ្ឋក្នុងការការពារខ្លួន និងការព្យាបាលជំងឺកូវីដ-១៩ ជាដើម។
យ៉ាងណា លោកនាយករដ្ឋមន្ត្រី ហ៊ុន សែន បានបញ្ជាទៅក្រសួងសុខាភិបាលឱ្យពង្រឹងសមត្ថភាពព្យាបាលជំងឺ-១៩ឡើងវិញ ក្រោយរកឃើញថា អត្រាភាគរយនៃអ្នកស្លាប់នៅកម្ពុជាដោយសារជំងឺរលាកផ្លូវដង្ហើមធ្ងន់ធ្ងរនេះ ខ្ពស់ជាងបណ្ដាប្រទេសមួយចំនួន រួមទាំងប្រទេសថៃ និងវៀតណាម ដែលជាតួលេខមួយស្ថិតក្នុងការព្រួយបាម្ភនៅឡើយ ទាមទារឱ្យពង្រឹងសមត្ថភាពព្យាបាលឡើងវិញផងដែរ៕
