ពលរដ្ឋប្រមាណ១០០នាក់ តំណាងឱ្យ១៤៥គ្រួសារ មកពីភូមិព្រៃទា១និងព្រៃទា២ សង្កាត់ចោមចៅ៣ បានប្រមូលផ្ដុំគ្នាតវ៉ាជាថ្មី នៅមុខសាលាខណ្ឌពោធិ៍សែនជ័យ រាជធានីភ្នំពេញ នៅថ្ងៃចន្ទនេះ ដើម្បីជំទាស់នឹងរដ្ឋបាលខណ្ឌដែលយល់ព្រមធ្វើឯកសារស្នើសុំបណ្ណកម្មសិទ្ធិដី ជាន់លើដីពួកគាត់ដែលកំពុងមានទំនាស់ជាង៤ហិកតាជាមួយនឹងអង្គភាពយោធាមួយ។
តំណាងពលរដ្ឋ លោក សុខ ជា ប្រាប់ វីអូឌី នៅមុខសាលាខណ្ឌថា ពួកគាត់បានរង់ចាំដំណោះស្រាយជុំវិញវិវាទដីធ្លីដែលបានអូសបន្លាយជាង២០ឆ្នាំរបស់ពួកគាត់ពីក្រសួងការពារជាតិ ក្រោយពីក្រសួងនេះបានចេញសេចក្ដីជូនដំណឹង (ស.ជ.ណ) សម្រេចកាត់ដីជាប់ជម្លោះនោះទៅឱ្យពួកគេកាលពីខែកុម្ភៈ ឆ្នាំ២០១៧ ហើយអគ្គមេបញ្ជាការរងនៃកងយោធពលខេមរភូមិន្ទ លោក ហ៊ុន ម៉ាណែត សន្យាជួយដោះស្រាយឱ្យពួកគេឱ្យបានឆាប់។
ប្រភពដដែលបន្ថែមថា បន្ទាប់ពីរង់ចាំដំណោះស្រាយអស់ជិត៣ឆ្នាំ មេបញ្ជាការវរសេនាតូចការពារអាកាសលេខ៩១ លោក សុខ ប៉ាង បានស្នើសុំចុះបញ្ជីដីនោះ ហើយបន្ទាប់មក រដ្ឋបាលខណ្ឌពោធិ៍សែនជ័យបានយល់ព្រមចុះហត្ថលេខាទទួលស្គាល់ ខណៈពលរដ្ឋមាន ស.ជ.ណ ចំនួន៦ និងចំណារពីលោកនាយករដ្ឋមន្រ្តី និងរដ្ឋមន្រ្តីការពារជាតិ តែមិនទាន់ទទួលបានដំណោះស្រាយនៅឡើយ។
លោកថា៖ «ពួកខ្ញុំចេះតែរំពឹងចាំមើលការដោះស្រាយតាមការសម្រេចរបស់ថ្នាក់លើហ្នឹងដាច់អត់ ហើយដល់ពេលឥលូវ ថ្ងៃហ្នឹងមកលិចចេញរឿងលោក សុខ ប៉ាង គាត់សុំធ្វើប្លង់កម្មសិទ្ធិយកទាំងដីប្រជាពលរដ្ឋ៤ហិកតាហ្នឹងធ្វើប្លង់កម្មសិទ្ធិ។ ធ្វើឱ្យខ្ញុំគិតរំពឹងអ្នកណា? មានតែរំពឹងទៅលើថ្នាក់ដឹកនាំឱ្យលោកជួយមើល»។
លោកបន្ថែមថា៖ «រឿងនេះអយុត្តិធម៌សម្រាប់យើងខ្ញុំ ហើយយើងខ្ញុំក៏មកសួរចង់ដឹងការបំភ្លឺរបស់គាត់ បើគាត់គិតថាខាងលោក សុខ ប៉ាង មាន ស.ជ.ណ ត្រឹមត្រូវ ចុះខាងប្រជាពលរដ្ឋគាត់មានទាំង ស.ជ.ណ មានទាំងចំណារសម្ដេចទៀតឱ្យដោះស្រាយត្រូវត្រឹមដែរ ចុះលោកម៉េចមិនអនុវត្ត»។
តំណាងពលរដ្ឋម្នាក់ទៀត អ្នកស្រី ម៉ែន គីម វ័យ៦៥ឆ្នាំ ថ្លែងថា លោក សុខ ប៉ាង ទទួលបានលិខិត ស.ជ.ណ មួយចេញដោយក្រសួងការពារជាតិ ចុះថ្ងៃទី៥ ខែមីនា ឆ្នាំ២០១៧ មានខ្លឹមសារលុបលើលិខិត ស.ជ.ណ របស់ពួកគាត់ ដែលតំណាងពលរដ្ឋចំនួន៣៥គ្រួសារ លើដីជាង៤ហិកតា ដែលត្រូវបែងចែកឱ្យពលរដ្ឋស្មើៗគ្នាដល់ពលរដ្ឋចំនួន១៤៥គ្រួសារ។
អ្នកស្រីថា ដើមឡើយ ដីមានជម្លោះគឺមានទំហំជាង៩ហិកតា តែត្រូវបានកាត់ចែកដល់គ្រួសារកងទ័ពជាបណ្ដោះអាសន្ន តែបន្ទាប់មក គ្រួសារមួយចំនួនបានលក់ឱ្យពលរដ្ឋមកពីខាងក្រៅ ពុះជាឡូត៍ និងសង់ជាសំណង់ផ្ទះល្វែង។ ករណីនេះ អ្នកស្រីបារម្ភថា បើពួកគាត់មិនស្វះស្វែងរកយុត្តិធម៌ឱ្យបានឆាប់ទេ ដីជាប់ជម្លោះសេសសល់នឹងក្លាយជាសំណង់ផ្ទះល្វែងឬសំណង់ឯកជនផ្សេងទៀត។
អ្នកស្រី ម៉ែន គីម បន្ថែមថា៖ «ប្រជាជនអត់មានរំពឹងថាគាត់អត់ស៊ីញ៉េទេ! ថ្ងៃណាមួយនឹងបាត់ ព្រោះប្រជាជនធ្លាប់ដឹងហើយ ស្ងាត់ៗទៅបាត់ដី១ដុំទៅ! ស្ងាត់ៗទៅគាត់ចុះកន្លែងនោះបាន១ដុំទៅ! អ៊ីចឹងប្រជាជននៅតែអត់មានទំនុកចិត្ត»។
លោក នួន ជីម ជាពលរដ្ឋរស់នៅភូមិព្រៃទាមួយរូបដែលចូលរួមក្នុងការតវ៉ាដែរនោះ និយាយថា គាត់បានចូលរួមតវ៉ាជាច្រើនលើកមកហើយ ដោយសារគាត់មិនអាចបន្តរង់ចាំដំណោះស្រាយតទៅទៀត។
លោកថា៖ «លោក ហ៊ុន ម៉ាណែត ថាលែងឱ្យអ៊ុំៗតវ៉ាទៀតហើយ ព្រោះតវ៉ារយៈពេលជាង២០ឆ្នាំហើយ លែងឱ្យអ៊ុំៗពិបាកហើយ! តែគាត់សន្យាថា១អាទិត្យទេ ជូនដំណឹងគាត់វិញ ត្រូវយកអីខ្លះ! ឥលូវប្រជាជននាំគ្នាព្រមព្រៀងហើយ ជូនដំណឹងគាត់ទៅ មកដល់ថ្ងៃហ្នឹងជិត៣ឆ្នាំហើយ អត់ឃើញមកត។ អ៊ីចឹងសំណូមពរឱ្យលោក ហ៊ុន ម៉ាណែត ហ្នឹងដោះស្រាយតាមកិច្ចសន្យា។ ទី១ តាមច្បាប់ ទី២ តាមមន្រ្តីរបស់លោក»។
អភិបាលខណ្ឌពោធិ៍សែនជ័យ លោក ហែម ដារិទ្ធ ថ្លែងថា បន្ទាប់ពីលោកបានដឹងថា ពាក្យស្នើសុំចុះបញ្ជីដីពីអង្គភាពការពារអាកាសលេខ៩១ លោកបានប្រគល់ឯកសារទៅថ្នាក់លើរួចហើយ ហើយនឹងមិនចុះហត្ថលេខាលើពាក្យស្នើសុំនោះទេ ដរាបណាដីនោះលែងមានការតវ៉ា។
លោកថា៖ «វាផុតពីសមត្ថកិច្ចរបស់យើង យើងបានតែសម្របសម្រួលទេ ការដោះស្រាយសម្រេចយ៉ាងម៉េចគឺនៅខាងលើ។ ហើយការប្រគល់បណ្ណកម្មសិទ្ធិដីធ្លី មិនមែនខ្ញុំអ្នកស៊ីញ៉េទេ គឺប្រធានសុរិយោដី ប៉ុន្តែការកសាងឯកសារពីខ្ញុំទៅ។ ហើយប៉ុន្តែបើបងប្អូនប្ដឹងជំទាស់ ម៉េចខ្ញុំត្រូវស៊ីញ៉េទៀត! ខ្ញុំអត់មានស៊ីញ៉េបន្តទៅទៀតកើតទេ ទាល់តែបងប្អូនទាំងអស់សម្របសម្រួលត្រូវរ៉ូវគ្នាទាំងអស់ លែងមានអ្នកតវ៉ា បានយើងស៊ីញ៉េប្រកាសឱ្យបាន»។
វីអូឌី មិនអាចទាក់ទងសុំការអធិប្បាយពីអ្នកនាំពាក្យក្រសួងការពារជាតិ លោក ឈុំ សុជាតិ និងមេបញ្ជាការវរសេនាតូចការពារអាកាសលេខ៩១ លោក សុខ ប៉ាង បានទេ នៅថ្ងៃចន្ទនេះ។
យ៉ាងណា លោក សុខ ប៉ាង បានថ្លែងនៅថ្ងៃទី៥ ខែវិច្ឆិកា ឆ្នាំ២០២១ ថាលោកមិនបានរំលោភយកដីពលរដ្ឋនោះទេ ដោយលោកមានលិខិត ស.ជ.ណ បញ្ជាក់ត្រឹមត្រូវ ហើយថា លោកមិនដឹងថា ពលរដ្ឋបានលិខិត ស.ជ.ណ មកពីណានោះទេ។
លោកថា៖ «ខ្ញុំចង់បញ្ជាក់ថា ខ្ញុំវាអត់បានពាក់ព័ន្ធអីទៅរំលោភទន្ទ្រានដីគាត់ទេ ដីបន្ទាយ! ហើយគាត់មានឯកសារឯណាពុះដីបន្ទាយ២-៣ចំណែកនោះ ខ្ញុំអត់ដឹងទេ! ប្រហែលជាមើលមកពីខាងក្រៅមក ឃើញរបង ឃើញអាគារដែរតើហ្អី? អូនបានមកដល់ហ្នឹង អូនស្វែងយល់ទៅណា»។
បើតាមតំណាងពលរដ្ឋចូលរួមតវ៉ា ដីជាប់ជម្លោះនោះ ដើមឡើយ អង្គភាពយោធាបានខ្ចីពីអ្នកភូមិ ដើម្បីប្រើជាមូលដ្ឋានបណ្ដោះអាសន្ន ដោយមានទំហំ៩ហិកតា ប៉ុន្តែក្រោយមក រដ្ឋាភិបាលសម្រេចសងដីមកឱ្យពលរដ្ឋវិញបានត្រឹមតែជាង៤ហិកតាប៉ុណ្ណោះសម្រាប់ពលរដ្ឋ៣៥គ្រួសារ៕
