ក្រុមតាលីបង់ នៅថ្ងៃអាទិត្យម្សិលមិញ បានសម្រេចតែងតាំងសមាជិករបស់ខ្លួនចំនួន៤៤រូបឱ្យកាន់តួនាទីសំខាន់ៗ រួមមាន អភិបាលខេត្ត និងមេប៉ូលិស ដែលពួកគេចាត់ទុកថា ជាជំហានដ៏សំខាន់មួយក្នុងការពង្រឹងអភិបាលកិច្ចរបស់ខ្លួន ស្របពេលដែលប្រទេសនេះបច្ចុប្បន្នកំពុងតែជួបបញ្ហាសន្តិសុខនិងសេដ្ឋកិច្ច។ នេះបើតាមការចុះផ្សាយដោយទីភ្នាក់ងារសារព័ត៌មាន Reuters។
ការប្រកាសតែងតាំងសមាជិករបស់ខ្លួនក្នុងការទទួលបានតំណែងទាំងនេះ ត្រូវបានធ្វើឡើងជាលើកដំបូង គិតចាប់តាំងពីគណៈរដ្ឋមន្ត្រីរបស់ប្រទេសនេះត្រូវបានបង្កើតឡើងក្នុងខែកញ្ញា។
សម្រាប់បញ្ជីតួនាទីថ្មីរបស់សមាជិករបស់ខ្លួនដែលត្រូវបានបញ្ចេញដោយពួកតាលីបង់ ក្នុងនោះគេឃើញមានការជ្រើសរើសលោក Qari Baryal ជាអភិបាលក្រុងកាប៊ុល និងលោក Wali Jan Hamza ទទួលបានតំណែងជាមេប៉ូលិសក្រុង។
គួរបញ្ជាក់ថា អាហ្វហ្គានីស្ថាន បានធ្លាក់ចូលទៅក្នុងវិបត្តិកាលពីខែសីហាកន្លងទៅ បន្ទាប់ពីពួកតាលីបង់បានចូលមកដណ្ដើមអំណាចយកមកគ្រប់គ្រង។
គិតចាប់តាំងពីឡើងកាន់អំណាចនេះដែរ ក្រុមតាលីបង់ក៏បានប្រឈមមុខនឹងវិបត្តិសេដ្ឋកិច្ចធ្ងន់ធ្ងរ ខណៈដែលរដ្ឋមន្ត្រីការបរទេសអាហ្វហ្គានីស្ថាន កាលពីពេលកន្លងទៅ ក៏ធ្លាប់បានអំពាវនាវដល់ម្ចាស់ជំនួយអន្តរជាតិនានាឱ្យចាប់ផ្តើមផ្ដល់ជំនួយឡើងវិញដល់ប្រទេសនេះផងដែរ៕
