យ៉ាងហោចណាស់ កុមារីម្នាក់ស្លាប់ និងខូចខាតផ្ទះបណ្ដែតលើទឹកចំនួន២១ខ្នង ដោយសារខ្យល់កន្ត្រាក់លាយឡំជាមួយនឹងភ្លៀង នៅស្រុកកំពង់លែង ខេត្តកំពង់ឆ្នាំង។
អភិបាលខេត្តកំពង់ឆ្នាំង លោក ស៊ុន សុវណ្ណារិទ្ធិ ប្រាប់ វីអូឌី នៅថ្ងៃអង្គារនេះថា ឥទ្ធិពលខ្យល់កន្ត្រាក់លាយឡំជាមួយនឹងភ្លៀង នៅភូមិពាមខ្នង ឃុំផ្លូវទូក ស្រុកកំពង់លែង កាលពីម៉ោង៥ល្ងាចថ្ងៃទី៨ ខែវិច្ឆិកា ម្សិលមិញ បានបណ្ដាលឱ្យកុមារីម្នាក់ឈ្មោះ ហុន ណាវី អាយុ៥ឆ្នាំស្លាប់ និងផ្ទះទឹក៦ខ្នងបាក់លិចចូលទឹក ខណៈ១៥ខ្នងទៀតរបើកដំបូលស័ង្កសី។
អភិបាលខេត្តរូបនោះបញ្ជាក់ថា រហូតដល់ថ្ងៃទី៩ ខែវិច្ឆិកានេះ ក្រុមការងារជំនាញនិងមន្ត្រីពាក់ព័ន្ធផ្សេងទៀតបានចុះស្រាវជ្រាវបន្ថែមពីផលប៉ះពាល់ជាក់ស្ដែង រួមទាំងផ្តល់ជាសម្ភារមួយចំនួន និងជួសជុលផ្ទះជូនពលរដ្ឋឡើងវិញផងដែរ ។
លោកមានប្រសាសន៍ថា៖ «ខ្ញុំឱ្យអភិបាលរងខេត្ត ខាងស្រុក និងកាកបាទក្រហម ចុះស្រាវជ្រាវ។ ឥលូវគេចុះទៅមើលទីតាំងកើតហេតុនោះហើយ ដើម្បីវាយតម្លៃពីការខូចខាតអស់ប៉ុន្មាន។ នៅពេលពិនិត្យមើលហើយ គេនឹងចែកជាសម្ភារជូនពលរដ្ឋរងគ្រោះ អង្ករ ទឹកស៊ីអ៊ីវ ទឹកត្រី ត្រីខ មី ជូនគាត់ និងជួយជួសជុលផ្ទះជូនពួកគាត់ទៀតផង»។
ទាក់ទិននឹងបញ្ហានេះដែរ កាលពីថ្ងៃទី២ ខែមិថុនា ឆ្នាំ២០២១ បាតុភូតធម្មជាតិខ្យល់កន្ត្រាក់ក៏បានប៉ះពាល់ដល់ភូមិចំនួន៣ នៃឃុំជ័យ ស្រុកកំពង់ស្វាយ ខេត្តកំពង់ធំ ហើយក្នុងនោះបណ្ដាលឱ្យមនុស្សម្នាក់ស្លាប់ និង៣នាក់ផ្សេងទៀតរងរបួស រួមទាំងផ្ទះ៤៣ខ្នងខូចខាតផងដែរ។
យោងតាមរបាយការណ៍របស់គណៈកម្មាធិការជាតិគ្រប់គ្រងគ្រោះមហន្តរាយដែលបានផ្សព្វផ្សាយនៅថ្ងៃទី០៨ ខែកញ្ញា ឆ្នាំ២០២១ បានឱ្យដឹងថា ក្នុងអំឡុងពេល៨ខែ ឆ្នាំ២០២១នេះ គ្រោះធម្មជាតិរន្ទះបាញ់ ខ្យល់កន្ត្រាក់ និងអគ្គិភ័យ បានកើតមានឡើងចំនួន៦៣០លើក បណ្ដាលឱ្យមនុស្សស្លាប់៩៤នាក់ និងរបួស១៥៨នាក់៕