រដ្ឋាភិបាលអូស្ត្រាលី សម្រេចផ្ដល់វ៉ាក់សាំងការពារជំងឺកូវីដ-១៩ ជាង២លានដូសដល់ប្រទេសកម្ពុជា ដែលក្នុងនោះ វ៉ាក់សាំងចំនួន១លានដូសនឹងត្រូវបញ្ជូនមកមុនដំណាច់ឆ្នាំនេះ។
ការបញ្ជាក់ពីការផ្ដល់ជំនួយនេះបានធ្វើឡើងនៅក្នុងជំនួបពិភាក្សាការងាររវាងលោក ហ៊ុន សែន នាយករដ្ឋមន្ត្រីកម្ពុជា និងលោកស្រី ម៉ារីស ផេន (Marise Payne) រដ្ឋមន្ត្រីការបរទេស និងជារដ្ឋមន្ត្រីកិច្ចការនារី នៃប្រទេសអូស្ត្រាលី នៅវិមានសន្តិភាព នៅថ្ងៃទី៨ ខែវិច្ឆិកា ឆ្នាំ២០២១ ម្សិលមិញនេះ។
យោងតាមការផ្សព្វផ្សាយនៅលើបណ្ដាញសង្គមហ្វេសប៊ុករបស់លោកនាយករដ្ឋមន្ត្រី ហ៊ុន សែន បានឱ្យដឹងថា ក្នុងជំនួបនោះ លោកស្រី ម៉ារីស ផេន បានវាយតម្លៃខ្ពស់ចំពោះវិធានការទប់ស្កាត់ការឆ្លងរាលដាលនៃជំងឺកូវីដ-១៩នៅក្នុងប្រទេសកម្ពុជា តាមរយៈការចាក់ស្រោចវ៉ាក់សាំងជូនដល់ប្រជាពលរដ្ឋ និងការចាប់ផ្ដើមឱ្យសិស្សចូលរៀនវិញ និងបើកប្រទេសឱ្យប្រជាពលរដ្ឋរស់នៅតាមបែបគន្លងថ្មី។
លោកនាយករដ្ឋមន្ត្រីបន្តថា ជាមួយគ្នានោះ រដ្ឋាភិបាលអូស្ត្រាលីបានសម្រេចផ្ដល់ជូនកម្ពុជានូវវ៉ាក់សាំងប្រឆាំងកូវីដ-១៩ ចំនួន «២លាន ៣សែនដូស» ដែលក្នុងនោះ វ៉ាក់សាំងចំនួន១លានដូសនឹងត្រូវប្រគល់ជូនកម្ពុជាមុនដំណាច់ឆ្នាំនេះ។
ជាការឆ្លើយតប លោកនាយករដ្ឋមន្ត្រី ហ៊ុន សែន បានថ្លែងអំណរគុណដល់ប្រទេសអូស្ត្រាលីដែលបានផ្ដល់វ៉ាក់សាំងដល់កម្ពុជានៅពេលខាងមុខ។
ក្រៅពីនោះ លោកនាយករដ្ឋមន្ត្រីបញ្ជាក់ថា៖ «អូស្ត្រាលីបានជួយកម្ពុជាច្រើន ជាពិសេសលើវិស័យកសិកម្ម តាមរយៈការបង្កើតវិទ្យាស្ថានស្រាវជ្រាវ បង្កាត់ពូជស្រូវ ដែលហៅកាត់ថា “Cadi” លើវិស័យយោធា លើវិស័យអប់រំ តាមរយៈការបើកសាលាភាសានៅកម្ពុជា និងការបើកឱ្យសិស្សកម្ពុជាទៅរៀននៅប្រទេសអូស្ត្រាលី លើវិស័យសុខាភិបាល តាមរយៈការផ្ដល់ជំនួយវ៉ាក់សាំងដល់កម្ពុជា»។
ក្នុងក្របខណ្ឌអាស៊ាន លោកនាយករដ្ឋមន្រ្តី ហ៊ុន សែន សង្ឃឹមថា អូស្ត្រាលីនឹងចូលរួមជាមួយបណ្ដាប្រទេសអាស៊ាន ប្រយុទ្ធប្រឆាំងជំងឺកូវីដ-១៩ ដើម្បីឈានឆ្ពោះទៅកាន់ការតភ្ជាប់អាស៊ានឡើងវិញ បន្ទាប់ពីការកាត់ផ្ដាច់ដោយកូវីដ-១៩។
បើតាមរបាយការណ៍របស់ក្រសួងសុខាភិបាល គិតត្រឹមថ្ងៃទី០៨ ខែវិច្ឆិកា ឆ្នាំ២០២១ កម្ពុជាបានចាក់វ៉ាក់សាំងការពារជំងឺកូវីដ-១៩ ដល់ប្រជាជនបានចំនួន ៨៧,៤៣% ធៀបនឹងចំនួនប្រជាជនសរុប១៦លាននាក់ ក្នុងនោះ បានចាក់លើប្រជាជនអាយុពី១៨ឆ្នាំឡើង មានចំនួន ១០០,៤១% ធៀបជាមួយចំនួនប្រជាជនគោលដៅ ១០លាននាក់, លើកុមារ-យុវវ័យ អាយុពី១២ឆ្នាំ ទៅក្រោម១៨ឆ្នាំ មានចំនួន ៩៨,៣២% ធៀបជាមួយចំនួនប្រជាជនគោលដៅ ១ ៨២៧ ៣៤៨នាក់, លើកុមារអាយុពី០៦ឆ្នាំ ដល់ក្រោម១២ឆ្នាំ មានចំនួន ១០៣,១៣% ធៀបជាមួយនឹងប្រជាជនគោលដៅ ១ ៨៩៧ ៣៨២នាក់, លើកុមារអាយុ០៥ឆ្នាំ មានចំនួន ៦៣,៨២% ធៀបជាមួយនឹងប្រជាជនគោលដៅ ៣០៤ ៣១៧នាក់៕
កែតម្រូវ៖ វីអូឌី សូមធ្វើការកែតម្រូវចំណងជើង និងកថាខណ្ឌទី១ និងទី៤ ត្រង់ចំណុច៖ «រដ្ឋាភិបាលអូស្ត្រាលីបានសម្រេចផ្ដល់ជូនកម្ពុជានូវវ៉ាក់សាំងប្រឆាំងកូវីដ-១៩ ចំនួន ៣លាន ២សែន ៥ម៉ឺនដូស…»។ ខ្លឹមសារដែលត្រឹមត្រូវគឺ «រដ្ឋាភិបាលអូស្ត្រាលីបានសម្រេចផ្ដល់ជូនកម្ពុជានូវវ៉ាក់សាំងប្រឆាំងកូវីដ-១៩ ចំនួន ២លាន ៣សែនដូសវិញ…»។ ការកែសម្រួលនេះ ធ្វើឡើងតាមរយៈការបញ្ជាក់ជាថ្មីរបស់មន្ត្រីស្ថានទូតអូស្ត្រាលីប្រចាំនៅកម្ពុជា។
