បុគ្គលិកសុខាភិបាលនៃមន្ទីរពេទ្យបង្អែកក្រុងប៉ោយប៉ែត បានចោទប្រកាន់ប្រធានមន្ទីរពេទ្យនេះ ថាបានប្រព្រឹត្តអំពើពុករលួយ តាមរយៈការបង្កើតបញ្ជីឈ្មោះខ្មោច ដើម្បីទទួលបានលុយពីប្រតិបត្តិការប្រយុទ្ធប្រឆាំងជំងឺកូវីដ-១៩។
តាមរយៈសារសំឡេងបែកធ្លាយរបស់ក្រុមគ្រូពេទ្យ នៃមន្ទីរពេទ្យបង្អែកក្រុងប៉ោយប៉ែត ដែល វីអូឌី ទទួលបាននៅថ្ងៃទី៨ ខែវិច្ឆិកា ឆ្នាំ២០២១ ឱ្យដឹងថា ប្រធានមន្ទីរពេទ្យបង្អែកក្រុងប៉ោយប៉ែត លោក ឱក ទីនណា បានប្រើឈ្មោះបុគ្គលិកសុខាភិបាលចំនួន១១នាក់ដែលមិនមានភារកិច្ចចូលរួមបម្រើការងារ ឬហៅថាជាឈ្មោះខ្មោច ដាក់បន្លំចូលទៅក្នុងបញ្ជីសម្រាប់បេសកកម្មប្រយុទ្ធប្រឆាំងជំងឺកូវីដ-១៩។
ប្រភពដដែលបន្ថែមថា សម្រាប់បុគ្គលិកសុខាភិបាលទាំង១១នាក់ដែលជាឈ្មោះខ្យល់ឬឈ្មោះខ្មោច តែមិនមានអ្នកធ្វើការនេះ គឺក្នុងម្នាក់ៗទទួលបានប្រាក់ឧបត្ថម្ភដែលជាកញ្ចប់ថវិកាពីរដ្ឋាភិបាលចំនួន២០ម៉ឺនរៀលក្នុងមួយថ្ងៃ។
តាមរយៈសារសំឡេងបែកធ្លាយនេះបញ្ជាក់ថា ម្ចាស់ឈ្មោះដែលជាបុគ្គលិកសុខាភិបាលនោះមិនដែលបានដឹងថា ខ្លួនត្រូវមានឈ្មោះបំពេញការងារក្នុងបេសកកម្មប្រយុទ្ធប្រឆាំងជំងឺកូវីដ-១៩នេះទេ ហើយថវិកា២០ម៉ឺនរៀលក្នុងមួយថ្ងៃនោះទៀតសោត ក៏ពួកគេមិនដែលទទួលបានផងដែរ។
ប្រភពបន្តថា៖ «២៨ថ្ងៃហើយ ក្នុងមួយថ្ងៃ៥០ដុល្លារ ហើយបូកនឹងអា៧ថ្ងៃ អាហ្នឹងស្អីគេ? មកធ្វើការនៅមន្ទីរពេទ្យស្អី! បើមិនដែលមកជាន់មន្ទីរពេទ្យផង ហើយហិរញ្ញប្បទានប្រហែលគេដែរ។ អត់ទេ ដកចេញ! អ្នកណាអត់ធ្វើការហើយយកលុយកូវីដ ដកឈ្មោះចេញ»។
បន្ថែមលើសារសំឡេងបែកធ្លាយនេះ វីអូឌី ក៏បានទទួលលិខិតមួយច្បាប់ដាច់ដោយឡែកមួយទៀត ក្នុងថ្ងៃតែមួយ ពីក្រុមបុគ្គលិកសុខាភិបាលនៃមន្ទីរពេទ្យបង្អែកប៉ោយប៉ែតដែរ។ ក្នុងខ្លឹមសារលិខិតនោះ គឺប្ដឹងប្រធានមន្ទីរពេទ្យបង្អែក លោក ឱក ទីនណា ពីបទ «ប្រព្រឹត្តអំពើស៊ីសំណូក និងកិបកេងលុយបេសកកម្មប្រយុទ្ធប្រឆាំងកូវីដ-១៩» ទៅអង្គភាពប្រឆាំងអំពើពុករលួយ។
យោងតាមលិខិតដដែលនេះ បន្ថែមថា ក្រៅពីប្រើល្បិចភូតកុហកដូច្នេះហើយ លោក ឱក ទីនណា និងបក្ខពួកផ្សេងទៀត បានព្យាយាមប្រើប្រាស់លិខិតក្លែងក្លាយ ឡូហ្គូ និងពុម្ពអក្សរ របស់អង្គភាពប្រឆាំងអំពើពុករលួយថែមទៀតផង។ អត្ថន័យរបស់លិខិតនេះ លោក ឱម យិនទៀង ប្រធានអង្គភាពប្រឆាំងអំពើពុករលួយ បានបញ្ជាក់ពីភាពស្អាតស្អំរបស់ប្រធានមន្ទីរពេទ្យបង្អែកក្រុងប៉ោយប៉ែត ថាមិនមានមន្ទិលសង្ស័យអ្វីទៀតឡើយ។
ដោយឡែក បុគ្គលិកសុខាភិបាលម្នាក់ដែលបានផ្ដល់សម្ភាសន៍ជាមួយ វីអូឌី នៅថ្ងៃអង្គារនេះ ដែលថ្លែងក្នុងលក្ខខណ្ឌសុំមិនបញ្ចេញឈ្មោះ អះអាងថា តាមពិតលិខិតនេះគឺជាលិខិតក្លែងក្លាយដែលមិនមានទាំងកាលបរិច្ឆេទ លេខចូល និងហត្ថលេខារបស់លោក ឱម យិនទៀង ថែមទៀតផង។ ក្រោយបិទបាន២ម៉ោងនៅជាប់ជញ្ជាំង លិខិតដែលសម្អាងហេតុថា «មានភាពស្អាតស្អំ» ចេញពីអង្គភាពប្រឆាំងអំពើពុករលួយនេះក៏បានបកចេញទៅវិញភ្លាមដែរ។
វីអូឌី បានព្យាយាមសុំការឆ្លើយតបជាច្រើនដងតាមទូរសព្ទពីប្រធានមន្ទីរពេទ្យបង្អែកក្រុងប៉ោយប៉ែត លោក ឱក ទីនណា ដែលរងការចោទប្រកាន់នេះ ប៉ុន្តែមិនមានការឆ្លើយតប។ ខណៈប្រធានអង្គភាពប្រឆាំងអំពើពុករលួយ លោក ឱម យិនទៀង មិនអាចសុំការអត្ថាធិប្បាយបាន។
ចំណែក ប្រធានមន្ទីរសុខាភិបាលខេត្តបន្ទាយមានជ័យ លោក ឡេ ច័ន្ទសង្វាត មិនអាចទាក់ទងបាន នៅថ្ងៃអង្គារនេះ។
បើទោះជាបែបណា វីអូឌី ទទួលបានលិខិតបដិសេធមួយច្បាប់របស់ប្រធានមន្ទីរពេទ្យបង្អែកក្រុងប៉ោយប៉ែត លោក ឱក ទីនណា កាលពីដើមខែវិច្ឆិកា ឆ្នាំ២០២១នេះ ដោយលោកអះអាងថា ការិយាល័យសុខាភិបាលក្រុងប៉ោយប៉ែត មិនបានប្រព្រឹត្តអំពើពុករលួយដូចការចោទប្រកាន់នេះទេ។
បន្ថែមលើលិខិតបដិសេធនេះដែរ បុគ្គលិកផ្នែករដ្ឋបាលនៃមន្ទីរពេទ្យបង្អែកក្រុងប៉ោយប៉ែត អ្នកស្រី សុវណ្ណ ដួងដាវ បានថ្លែងថា នេះជារឿងមិនពិតឡើយ។ អ្នកស្រីបន្តថា ខាងមន្ទីរពេទ្យមិនដែលបានដាក់ឱ្យអនុវត្តផែនការខុសពីគោលការណ៍ដែលក្រសួងសុខាភិបាលចេញឡើយ។
ម្យ៉ាងវិញទៀត អ្នកស្រីថា ខាងមន្ទីរពេទ្យក៏នឹងមិនតបតតាមនីតិវិធីច្បាប់អ្វីឡើយ ទៅប្រឆាំងអ្នករិះគន់ដែលមិនមានមូលដ្ឋានពិតប្រាកដបែបនេះ។
អ្នកស្រីបន្តថា៖ «ទេ! ខ្ញុំអត់មានគោលបំណងដែលថាចង់ប្ដឹងពួកគាត់អីវិញទេ គ្រាន់តែថា គាត់យកព័ត៌មានមិនពិតយកទៅបរិហារកេរ្តិ៍តាមកាសែត តាមអីអ៊ីចឹង គឺវាមិនត្រឹមត្រូវ»។
ដោយឡែក មន្រ្តីនាំពាក្យសមាគមការពារសិទ្ធិមនុស្សអាដហុក លោក ស៊ឹង សែនករុណា យល់ឃើញថា បើរឿងនេះជាការពិត នោះជារូបភាពអាក្រក់មួយសម្រាប់ប្រព័ន្ធសុខាភិបាល ហើយនីតិបុគ្គលដែលរងអំពើក្នុងបោកបញ្ឆោត គួរដាក់បណ្ដឹងទៅស្ថាប័នពាក់ព័ន្ធ ដើម្បីទាមទាររកយុត្តិធម៌។ បើតាមអ្នកការពារសិទ្ធិមនុស្សរូបនេះ អ្វីដែលសង្គមស៊ីវិលចង់ឃើញនោះ គឺក្រសួងសុខាភិបាលគួរបើកការស៊ើបអង្កេតដោយម៉ត់ចត់មួយ និងចាត់វិធានការតាមផ្លូវច្បាប់ ប្រសិនបើរកឃើញថា ពិតជាមានអំពើពុករលួយកើតឡើងបែបនេះមែន៕
