សកម្មជនសង្គមម្នាក់ទៀត លោក មួង សុភ័ក្រ ដែលត្រូវបានអាជ្ញាធរកម្ពុជាដោះលែងចេញពីពន្ធនាគារនៅម៉ោងប្រមាណ១១ព្រឹក ថ្ងៃព្រហស្បតិ៍នេះ បានអះអាងថា លោកនៅតែប្តេជ្ញាចិត្តចូលរួមធ្វើការងារសង្គមដោយគ្មានការរារែកនិងគ្មានការភ័យខ្លាចឡើយ។
តុលាការក្រុងភ្នំពេញ កាលពីថ្ងៃទី២៦ ខែតុលា បានកាត់ទោសយុវជន មួង សុភ័ក្រ សមាជិកសមាគមនិស្សិតបញ្ញវន្តខ្មែរ និងសកម្មជនសង្គមចំនួន១៤នាក់ផ្សេងទៀត ឱ្យជាប់ពន្ធនាគារ២០ខែ និងពិន័យជាប្រាក់ម្នាក់ៗចំនួន២ ០០០ ០០០រៀល ពីបទ «ញុះញង់» តាមបញ្ញត្តិមាត្រា៤៩៤ និងមាត្រា៤៩៥ នៃក្រមព្រហ្មទណ្ឌកម្ពុជា។ ប៉ុន្តែតុលាការបានបង្គាប់ឱ្យអនុវត្តទោសតែ១៤ខែប៉ុណ្ណោះ ខណៈទោសដែលនៅសល់ត្រូវព្យួរសាកល្បងរយៈពេល២ឆ្នាំ។
បន្ទាប់ពីចេញពីអគារពន្ធនាគារភ្លាម យុវជន មួង សុភ័ក្រ បានថ្លែងប្រាប់អ្នកសារព័ត៌មានថា រូបគេប្ដេជ្ញាធ្វើសកម្មភាពការងារសង្គមបន្តទៀត ដោយមិនភ័យខ្លាចចំពោះការចាប់ចងទៀតនោះឡើយ។
លោកថា៖ «ខ្ញុំនៅតែប្ដេជ្ញាចិត្តថា ខ្ញុំបន្តបញ្ហាការងាររបស់ខ្ញុំទៅមុខទៀត។ យើងនៅតែមិនខ្លាចពីការចាប់ខ្លួនយើងទេ ព្រោះយើងធ្វើនេះដើម្បីប្រជាជន ដើម្បីសិទ្ធិពលរដ្ឋយើងទាំងអស់គ្នា ហើយការតស៊ូរបស់យើងគឺការតស៊ូដោយត្រឹមត្រូវ។ ហើយយើងជឿជាក់ថា រដ្ឋាភិបាលគាត់មិនទៅស្អប់ខ្ពើមអ្នកដែលគោរពច្បាប់ទេ។ បើសិនជាគាត់ស្អប់ខ្ពើមអ្នកគោរពច្បាប់ មានន័យថា គាត់មិនមែនអ្នកគោរពច្បាប់ទៅវិញ»។
អ្នកស្រី សូ សម្បត្តិ ជាម្ដាយបង្កើតរបស់យុវជន មួង សុភ័ក្រ បានថ្លែងប្រាប់អ្នកសារព័ត៌មាននៅមុខខ្លោងទ្វារពន្ធនាគារថា គាត់មានអារម្មណ៍រីករាយនៅពេលដែលឃើញកូនបានចេញនៅក្រៅឃុំបណ្ដោះអាសន្ន ខណៈតុលាការដាក់ឱ្យស្ថិតនៅក្រោមការត្រួតពិនិត្យរយៈពេល២ឆ្នាំបន្តទៀត។
ទាក់ទិននឹងបញ្ហានេះ អ្នកស្រីព្រួយបារម្ភពីសុវត្ថិភាពកូន នៅពេលគាត់ចេញទៅណាមកណា ខ្លាចមានគេធ្វើបាបបន្តទៀត។ ករណីនេះ អ្នកស្រីស្នើទៅតុលាការទម្លាក់ចោលបទចោទទៅលើកូនរបស់គាត់ ដើម្បីឱ្យគាត់មានសេរីភាពពេញលេញដូចដើមវិញ។
អ្នកស្រីនិយាយថា៖ «ខ្ញុំស្នើទៅតុលាការទម្លាក់ចោលការចោទប្រកាន់កូនខ្ញុំ កុំឱ្យមានទោសទៀត កូនខ្ញុំអត់មានទោសអ្វីទេ អត់មានធ្វើអ្វីខុសទេ។ សុំឱ្យតុលាការដោះលែងគាត់ឱ្យចប់ កុំឱ្យមាននៅក្រៅឃុំ ក្នុងឃុំអី! ឱ្យកូនខ្ញុំមានសេរីភាពក្នុងការរស់នៅ កុំឱ្យមានការចោទប្រកាន់ទៀត»។
បន្ថែមពីនេះ អ្នកស្រី សូ សម្បត្តិ អះអាងថា គាត់និងកូនបានឱ្យមេធាវីរៀបចំពាក្យបណ្ដឹងជំទាស់ទៅសាលាឧទ្ធរណ៍ ប្រឆាំងនឹងសាលក្រមសាលាដំបូងរាជធានីភ្នំពេញហើយ ដើម្បីស្នើសុំឱ្យតុលាការទម្លាក់ចោលការចោទប្រកាន់មកលើកូនរបស់គាត់។
វីអូឌី មិនអាចសុំការបំភ្លឺពីអ្នកនាំពាក្យសាលាដំបូងរាជធានីភ្នំពេញ លោក អ៊ី រិន្ទ បានទេ នៅថ្ងៃព្រហស្បតិ៍នេះ។
នាយករងទទួលបន្ទុកផ្នែកឃ្លាំមើលសិទ្ធិមនុស្សនៃអង្គការលីកាដូ លោក អំ សំអាត បានគាំទ្រនឹងការប្ដេជ្ញាចិត្តរបស់យុវជន មួង សុភ័ក្រ ដែលថា នឹងបន្តចូលរួមតស៊ូមតិជួយការពារធនធានធម្មជាតិ បញ្ហាបរិស្ថាន និងបញ្ហាផ្សេងៗទៀត ដោយអហិង្សា ស្របតាមច្បាប់ជាតិនិងច្បាប់អន្តរជាតិ។
ប៉ុន្តែមន្ត្រីសង្គមស៊ីវិលរូបនេះបញ្ជាក់ថា បើការតស៊ូមតិរបស់យុវជននោះត្រូវបានអាជ្ញាធរធ្វើទុក្ខបុកម្នេញ ចាប់ខ្លួនគាត់ ឬហាមឃាត់មិនឱ្យធ្វើការតស៊ូមតិបែបអហិង្សាស្របតាមច្បាប់ទេ នោះជាការរឹតត្បិតសេរីភាពបញ្ចេញមតិជាមូលដ្ឋានរបស់យុវជនទាំងនោះ។
លោកមានប្រសាសន៍ថា៖ «បើសិនជាគាត់គ្រាន់តែបំពេញកាតព្វកិច្ច តួនាទីក្នុងនាមជាពលរដ្ឋ ហើយបើសិនជាមានការគំរាមកំហែង ការបំភិតបំភ័យ និងការចាប់ខ្លួន វាធ្វើឱ្យប៉ះពាល់ដល់សេរីភាពជាមូលដ្ឋានរបស់ប្រជាពលរដ្ឋ។ ជាពិសេស ដូចពេលកន្លងមក ការចាប់ខ្លួននិងការឃុំខ្លួនពួកគាត់កន្លងមកក៏មានការរិះគន់យ៉ាងធ្ងន់ធ្ងរដែរ ក្នុងការបំពារបំពានឬរំលោភបំពានទៅលើសេរីភាពមូលដ្ឋានរបស់ពលរដ្ឋ។ វាស្ដែងចេញនាំឱ្យមានការរិះគន់ស្ថានភាពសិទ្ធិមនុស្សនៅកម្ពុជាមានការរឹតត្បិតឬក៏ធ្លាក់ចុះ»។
ចាប់ពីដើមខែវិច្ឆិកាមក តុលាការកម្ពុជាបានដោះលែងសកម្មជនសង្គម បរិស្ថាន និងនយោបាយជាបន្តបន្ទាប់ ក្រោយពីពួកគេត្រូវបានតុលាការកាត់តម្រឹមទោសនិងព្យួរទោសសាកល្បង។
ទោះជាយ៉ាងនេះក្ដី អ្នកជំនាញផ្នែកសិទ្ធិមនុស្សនៃអង្គការសហប្រជាជាតិ (UN) ចំនួន៣រូប បានអំពាវនាវចំៗ កាលពីថ្ងៃទី២ ខែវិច្ឆិកា ឆ្នាំ២០២១ ឱ្យរដ្ឋាភិបាលកម្ពុជាបញ្ឈប់ជាបន្ទាន់នូវការប្រើប្រាស់ប្រព័ន្ធតុលាការកាត់ទោសលើអ្នកហ៊ានក្រោកឈរ ដើម្បីសិទ្ធិមនុស្ស និងសេរីភាពបញ្ចេញមតិនៅកម្ពុជាបន្តទៀត៕
