អាជ្ញាធរថៃបានចាប់ខ្លួនសកម្មជនអតីតគណបក្សសង្គ្រោះជាតិ២នាក់ ឈ្មោះ វឿង សំណាង និងឈ្មោះ វឿន វាសនា (ព្រៃឡង់ ក្រញូង) នៅទីក្រុងបាងកក កាលពីថ្ងៃទី៨ ខែវិច្ឆិកា រួចបញ្ជូនខ្លួនពួកគេមកឱ្យអាជ្ញាធរកម្ពុជា។
អតីតប្រធានប្រតិបត្តិឃុំក្ដីរុន ស្រុកពួក ខេត្តសៀមរាប នៃអតីតគណបក្សសង្គ្រោះជាតិ លោក ឈុន វាន ឱ្យដឹងនៅថ្ងៃទី១១ ខែវិច្ឆិកានេះថា លោកមិនបានស្ថិតក្នុងហេតុការណ៍នោះទេ តែលោកឮដំណឹងពីការចាប់ខ្លួន ខណៈពួកគេដើរត្រលប់មកកន្លែងស្នាក់នៅវិញតែ២នាក់។
លោកយល់ថា ការចាប់ខ្លួននេះជាការប៉ុនប៉ងបំបាក់ស្មារតីអតីតសកម្មជននិងមន្រ្តីអតីតគណបក្សសង្រ្គោះជាតិ ដែលកំពុងរស់នៅក្នុងនាមជាជនភៀសខ្លួនក្នុងប្រទេសថៃ។
លោក ឈុន វាន បន្ថែមថា៖ «ខ្ញុំគិតថា ហ្នឹងជាសញ្ញាមួយមិនបានជោគជ័យទេ ព្រោះស្មារតីនៃការតស៊ូ ក៏ដូចជាការព្យាយាម ការរិះគន់ទៅលើរបបលោក ហ៊ុន សែន ដោយសារប្រព័ន្ធផ្សព្វផ្សាយនៅក្នុងស្រុកហ្នឹងមិនមានភាពទូលំទូលាយ»។
អនុប្រធានអតីតគណបក្សសង្គ្រោះជាតិ លោក អេង ឆៃអ៊ាង ប្រាប់ វីអូឌី តាមសារអេឡិចត្រូនិចថា លោកមិនទាន់ទទួលបានព័ត៌មានជុំវិញការចាប់ខ្លួននៅឡើយ ប៉ុន្តែលោកដឹងថា អាជ្ញាធរថៃបានចាប់ខ្លួនពួកគេ រួចបញ្ជូនមកកម្ពុជា។ លោកបន្ថែមថា បច្ចុប្បន្ន អ្នកទាំងពីរកំពុងស្ថិតក្នុងមន្ទីរឃុំឃាំងម១នៃពន្ធនាគារព្រៃស។
លោក អេង ឆៃអ៊ាង អធិប្បាយលើគណនី Facebook របស់លោកចំពោះការចាប់ខ្លួននោះថា៖ «ជាការរំលោភបំពានសិទ្ធិមនុស្សយ៉ាងធ្ងន់ធ្ងរ ជាពិសេសសិទ្ធិជនភៀសខ្លួនដែលទទួលស្គាល់ដោយអង្គការសហប្រជាជាតិ UNHCR ប្រចាំព្រះរាជាណាចក្រថៃ»។
មន្រ្តីទំនាក់ទំនងជាន់ខ្ពស់អង្គការសហប្រជាជាតិសម្រាប់ជនភៀសខ្លួន (UNHCR) ប្រចាំតំបន់អាស៊ី និងប៉ាស៊ីហ្វិក អ្នកស្រី Catherine Stubberfield បដិសេធអធិប្បាយជុំវិញព័ត៌មាននេះ ក្រោមហេតុផលថា ពាក់ព័ន្ធនឹងការការពារនិងការសម្ងាត់របស់បុគ្គល។
អ្នកនាំពាក្យក្រសួងមហាផ្ទៃ លោក ខៀវ សុភ័គ មានប្រសាសន៍ថា ពិតជាមានការចាប់ខ្លួនឈ្មោះ វឿង សំណាង និង វឿន វាសនា ពិតមែន ហើយការចាប់ខ្លួននោះធ្វើឡើងតាមដីកាបង្គាប់របស់តុលាការ ដោយសារពួកគេធ្វើសកម្មភាពប្រឆាំងដោយខុសច្បាប់។
លោកបានគូសបញ្ជាក់ថា៖ «ប្រឆាំងល្មើសច្បាប់ ឱ្យចាប់! អត់មានចាប់សកម្មជនប្រឆាំង សូមបដិសេធ! ចាប់ខ្លួនតែជនល្មើសច្បាប់ទៅតុលាការ មានដីកាតុលាការ! ចាប់ខ្លួនជនល្មើសច្បាប់ទៅកាត់ទោស មិនមែនចាប់ខ្លួនជនល្មើសបក្សប្រឆាំងទេ អត់មានទេ»។
វីអូឌី មិនអាចសុំការបញ្ជាក់បន្ថែមពីអ្នកនាំពាក្យសាលាដំបូងរាជធានីភ្នំពេញ លោក អ៊ី រិន្ទ បានទេ នៅថ្ងៃនេះ។
លោក វឿន វាសនា បានប្រើគណនីឈ្មោះ «ព្រៃឡង់ ក្រញូង» ចូលទៅបញ្ចេញមតិរិះគន់ពីវិនាសកម្មព្រៃឈើ ការកែច្បាប់រដ្ឋធម្មនុញ្ញ និងការអនុវត្តច្បាប់នៅកម្ពុជា បន្ថែមលើការបង្ហោះរូបចៅប្រុសលោកនាយករដ្ឋមន្រ្តី ហ៊ុន សែន លើទំព័រ Facebook របស់លោក នៅថ្ងៃទី៩ ខែតុលា ឆ្នាំ២០២១។
លោកសរសេរថា៖ «ត្រកូល ហ៊ុន សែន តែងច្រណែនយស គ្មានដឹងខ្យល់សោះ កែច្បាប់រដ្ឋា គិតតែពីបូម បំផ្លាញខេមរា ឱ្យជាតិសាសនារលាយសាបសូន្យ។ ទឹកដីព្រៃឈើរលាយសូន្យឈឹង ច្បាប់ម៉ែវាហ្នឹង រាស្ត្រខ្សោះអស់ខ្យល់ ដើរតែបំផ្លាញ ពេលទោសមកដល់ ចោទចាប់មិនខ្វល់ សេរីភាពរាស្ត្រ»។
តបនឹងសំណេរនេះ លោកនាយករដ្ឋមន្រ្តី ហ៊ុន សែន បានចូលឆ្លើយតបនឹងការអធិប្បាយរបស់ម្ចាស់គណនី Facebook ឈ្មោះ “ព្រៃឡង់ ក្រញូង” នៅថ្ងៃទី៩ ខែតុលា ឆ្នាំ២០២១ លើការបង្ហោះរូបចៅប្រុសរបស់លោក ដោយប្រើសំណេរកំណាព្យបែបរិះគន់។
ក្នុងការឆ្លើយតបនោះ លោកនាយករដ្ឋមន្រ្តីបានផ្ញើដីការបស់តុលាការដែលបង្គាប់ឱ្យចាប់ខ្លួនលោក វឿន វាសនា និងព្រមានថា៖ «ខិតខំរត់ចេញពីប្រទេសឱ្យបានលឿនបន្តិចក្មួយ»។
ដីកានោះចេញនៅថ្ងៃទី២ ខែឧសភា ឆ្នាំ២០២១ លោក វឿន វាសនា ត្រូវបានចោទប្រកាន់ពីបទ «រារាំងដល់ការអនុវត្តវិធានការ» និងបទ «ញុះញង់បង្កឱ្យមានភាពវឹកវរធ្ងន់ធ្ងរដល់សន្តិសុខសង្គម» ប្រព្រឹត្តនៅកម្ពុជា ក្នុងឆ្នាំ២០២១៕