ក្រសួងមហាផ្ទៃ ប្រកាសប្ដឹងស្ថាបនិកគណបក្សបេះដូងជាតិទៅតុលាការ ដោយសម្អាងថាបានរកឃើញស្ថាបនិកគណបក្សនេះក្លែងបន្លំស្នាមមេដៃដើម្បីបង្កើនសមាជិក ក្នុងការបំពេញបែបបទសុំចុះបញ្ជីគណបក្សនយោបាយ។
នេះបើតាមលិខិតមួយច្បាប់ដែលរដ្ឋមន្ត្រីក្រសួងមហាផ្ទៃ លោក ស ខេង ផ្ញើទៅកាន់លោកនាយករដ្ឋមន្ត្រី ហ៊ុន សែន ចុះថ្ងៃទី១១ ខែវិច្ឆិកា ឆ្នាំ២០២១។
លោក ស ខេង បានលើកឡើងក្នុងលិខិតនោះថា តាមការធ្វើកោសលវិច័យរបស់អគ្គស្នងការដ្ឋាននគរបាលជាតិ រកឃើញថា «គណបក្សបេះដូងជាតិ» បានក្លែងស្នាមមេដៃក្នុងបញ្ជីរាយនាមចូលជាសមាជិកគណបក្ស ដែលការនេះ លោកថា ស្ថាបនិកគណបក្សនេះមានចេតនា«ទុច្ចរិត»។
បើតាមលិខិតនោះ ស្នាមមេដៃជាង៤ ០០០ (៤ ៧៨១មេដៃ) របស់គណបក្សបេះដូងជាតិ ដែលបានផ្ញើមកក្រសួង ដើម្បីសុំចុះបញ្ជីគណបក្សនយោបាយនោះ ក្រសួងបានរកឃើញថា ស្នាមមេដៃរបស់បុគ្គល២០នាក់ខុសស្នាមមេដៃក្នុងអត្តសញ្ញាណបណ្ណ, ស្នាមមេដៃបុគ្គល ២០នាក់ទៀត ផ្ដិតលើឈ្មោះបុគ្គល៥៤នាក់, ស្នាមមេដៃបុគ្គល៧៤នាក់មានភាពមិនប្រក្រតីឬក្លែងស្នាមមេដៃ, ស្នាមមេដៃបុគ្គល២៨៧នាក់ខូចគុណភាព មិនអាចធ្វើកោសលវិច័យបាន និងស្នាមមេដៃមានភាពមិនប្រក្រតីធ្ងន់ធ្ងររបស់បុគ្គលចំនួន៥នាក់ ផ្ដិតលើឈ្មោះបុគ្គលចំនួន២១នាក់ ។
លោក ស ខេង បានគូសបញ្ជាក់ក្នុងលិខិតថា៖ «ករណីនេះ អគ្គស្នងការនគរបាលជាតិ នឹងដាក់ពាក្យបណ្ដឹង ប្ដឹងតំណាងស្ថាបនិកគណបក្សបេះដូងជាតិទៅតុលាការ ដើម្បីចាត់វិធានការផ្លូវច្បាប់ និងបដិសេធសំណើសុំចុះឈ្មោះគណបក្សនេះក្នុងបញ្ជីគណបក្សនយោបាយនៅក្រសួងមហាផ្ទៃ»។
ស្ថាបនិកគណបក្សបេះដូងជាតិ និងជាអតីតមន្ត្រីបក្សប្រឆាំង លោក សៀម ភ្លុក មានប្រសាសន៍នៅថ្ងៃសុក្រនេះថា លោកមានការភ្ញាក់ផ្អើលជុំវិញការចោទប្រកាន់របស់ក្រសួងមហាផ្ទៃនេះ។ ប៉ុន្តែលោកថា នឹងត្រៀមខ្លួនគ្រប់ពេលដើម្បីបំភ្លឺបញ្ហានេះតាមផ្លូវច្បាប់។
លោកថា៖ «ខ្ញុំត្រៀមនឹងអ្វីដែលក្រសួងមហាផ្ទៃគេហៅទៅបំភ្លឺយ៉ាងម៉េចៗ ខ្ញុំមានចម្លើយដោះបន្ទុកហើយ។ គាត់អាចដាក់បន្ទុកចោទប្រកាន់យើងបាន ប៉ុន្តែយើងក៏មានការតតាំងគ្នាក្នុងច្បាប់ បើសិនណាដំណើការក្នុងច្បាប់ទាំងអស់គ្នា ខ្ញុំអត់មានការបារម្ភទេ»។
នាយករងទទួលបន្ទុកឃ្លាំមើលសិទ្ធិនុស្សអង្គការលីកាដូ លោក អំ សំអាត ពន្យល់ថា ការក្លែងបន្លំស្នាមមេដៃឬក្លែងឯកសារសាធារណៈ ជាបទល្មើសព្រហ្មទណ្ឌ។ ប៉ុន្តែលោកចង់ឃើញការចុះបញ្ជីគណបក្សនយោបាយដំណើរការទៅអនុលោមតាមច្បាប់ដោយគ្មានការរើសអើង។
លោកថា៖ «ការបង្កើតគណបក្សនយោបាយ វាជាសិទ្ធិរបស់ពលរដ្ឋនៅក្នុងការសុំបង្កើត គ្រាន់ថាយើងមានច្បាប់ អ៊ីចឹងបើគណបក្សនយោបាយហ្នឹង គាត់សុំចុះឈ្មោះគណបក្សនយោបាយ គាត់អនុវត្តតាមនីតិវិធី តាមផ្លូវច្បាប់គ្រប់គ្រាន់ហើយ អាហ្នឹងវាត្រូវតែអនុញ្ញាតឱ្យការបើកហើយ»។
កាលពីថ្ងៃទី១៥ ខែកញ្ញា ឆ្នាំ២០២១ ក្រសួងមហាផ្ទៃ បានព្រមានជាលើកទី២ពីការមិនចុះបញ្ជីឱ្យគណបក្សនេះ ក្រោមហេតុផលថា គណបក្សនេះមិនព្រមកែសម្រួលលក្ខន្តិកៈស្របតាមច្បាប់ស្តីពីគណបក្សនយោបាយ។
តែយ៉ាងណា នៅថ្ងៃទី១ ខែវិច្ឆិកា ឆ្នាំ២០២១ ស្ថាបនិកគណបក្ស និងជាអតីតមន្ត្រីបក្សប្រឆាំងផងនោះ លោក សៀម ភ្លុក បានចេញសេចក្ដីថ្លែងការណ៍មួយដោយបង្ហាញការសោកស្ដាយចំពោះក្រសួងមហាផ្ទៃ ដែលយឺតយ៉ាវក្នុងការឆ្លើយតបចំពោះការស្នើសុំចុះបញ្ជីគណបក្សនយោបាយនេះ និងស្នើឱ្យក្រសួងពន្លឿននីតិវិធីលើការពិនិត្យបែបបទនេះ ដើម្បីឱ្យខ្លួនមានលទ្ធភាពធ្វើសកម្មភាពនយោបាយស្របតាមច្បាប់។
គួររម្លឹកថា គិតចាប់តាំងពីការរំលាយគណបក្សសង្គ្រោះជាតិ នៅខែវិច្ឆិកា ឆ្នាំ២០១៧ ដោយតុលាការកំពូលកម្ពុជាមក មានអតីតមន្ត្រីគណបក្សសង្គ្រោះជាតិ ចំនួនជាង២០នាក់ ក្នុងចំណោម១១៨នាក់ ដែលជាប់បម្រាមធ្វើនយោបាយរយៈពេល៥ឆ្នាំនោះ បានស្នើសុំសិទ្ធិធ្វើនយោបាយឡើងវិញ។ ពួកគេមួយចំនួនបានទៅបង្កើតគណបក្សនយោបាយថ្មី និងមួយចំនួនទៀតនៅមិនទាន់សម្រេចចិត្តនៅឡើយទេ ខណៈការបោះឆ្នោតឃុំ-សង្កាត់នឹងធ្វើឡើងនៅឆ្នាំក្រោយនេះ។
រហូតមកដល់ពេលនេះ មានគណបក្សនយោបាយជាង៤០បានចុះបញ្ជីនៅក្រសួងមហាផ្ទៃ ក្នុងនោះមានគណបក្សចំនួន៥ដែលបានបង្កើតឡើងដោយអតីតមន្ត្រីគណបក្សប្រឆាំង រួមមាន គណបក្សឆន្ទៈខ្មែរ របស់លោក គង់ មូនីកា កូនប្រុសរបស់លោក គង់ គាំ, គណបក្សខ្មែរអភិរក្ស របស់លោក រៀល ខេមរិន្ទ្រ, គណបក្សខ្មែរស្រឡាញ់ជាតិ របស់លោក ជីវ កត្តា, គណបក្សកែទម្រង់កម្ពុជា របស់លោក ប៉ុល ហំម និងលោក អ៊ូ ច័ន្ទរ័ត្ន និងគណបក្សបេះដូងជាតិ ដែលត្រូវបានគេអះអាងថាជារបស់លោក ថាច់ សេដ្ឋា៕
