លោកឧបនាយករដ្ឋមន្ត្រី ស ខេង រដ្ឋមន្ត្រីក្រសួងមហាផ្ទៃ បានបញ្ជាឱ្យមានការធ្វើអធិការកិច្ចប្រកបដោយការទទួលខុសត្រូវលើករណីអ្នកទោសហែកគុករត់ ចេញពីពន្ធនាគារខេត្តស្ទឹងត្រែង ខណៈមន្ត្រីអង្គការសង្គមស៊ីវិលបានគាំទ្រ។
តាមរយៈទំព័រហ្វេសប៊ុក (Facebook) ផ្លូវការរបស់ខ្លួន កាលពីល្ងាចម្សិលមិញ លោកឧបនាយករដ្ឋមន្ត្រីបានចាត់ឱ្យមានការធ្វើអធិការកិច្ចប្រកបដោយការទទួលខុសត្រូវចំពោះបញ្ហាជនជាប់ឃុំរត់រួចពីពន្ធនាគារនៅខេត្តស្ទឹងត្រែង ក្រោយសមត្ថកិច្ចបានចាប់ខ្លួនជនជាប់ឃុំចំនួន៥នាក់ ក្នុងចំណោម ៧នាក់ ដែលបានវាយទម្លុះជញ្ជាំងពន្ធនាគាររត់គេចខ្លួន កាលពីយប់ថ្ងៃទី៨ ខែវិច្ឆិកា។
បើតាមទំព័រហ្វេសប៊ុករបស់លោក ស ខេង បានបន្តថា ក្នុងចំណោមជនជាប់ឃុំដែលសមត្ថកិច្ចចាប់បានមកវិញនោះ រួមមាន ជនជាតិឡាវចំនួន ២នាក់ និងជនជាតិ ខ្មែរចំនួន ៣នាក់។ ដោយឡែកទណ្ឌិត ២នាក់ជាជនជាតិឡាវដែលមានបទល្មើសគ្រឿងញៀន សមត្ថកិច្ចកំពុងតែស្វែងរកចាប់ខ្លួនមកវិញ។
លោកបានសរសេរយ៉ាងដូច្នេះថា៖ «ជនរួមជាតិជាទីគោរព! អ្វីដែលខ្ញុំចង់បញ្ជាក់នៅពេលនេះ គឺលទ្ធផលប្រតិបត្តិការនេះ ពិតជាកើតឡើងបាន ដោយសារតែមានការចូលរួមរបស់បងប្អូនប្រជាពលរដ្ឋយើង ដែលបានជួយស្រាវជ្រាវ និងរាយការណ៍ជូនសមត្ថកិច្ចឈានទៅដល់ការចាប់បានមកវិញនូវទណ្ឌិតដែលសុទ្ធតែជាឧក្រិដ្ឋជនគ្រឿងញៀនទាំងនេះ»។
ប្រធានអង្គការតម្លាភាពកម្ពុជា លោក ប៉ិច ពិសី បានគាំទ្រចំពោះការបង្កើតឱ្យក្រុមការងារចុះធ្វើអធិការកិច្ចរបស់លោកឧបនាយករដ្ឋមន្ត្រី ស ខេង ដើម្បីស្វែងរកមូលហេតុជាក់លាក់ដើម្បីដោះស្រាយកុំឱ្យមានករណីបែបនេះកើតឡើងទៀត ហើយដែលអាចប្រើប្រាស់ព័ត៌មានដដែលៗ សម្រាប់ពន្ធនាគារដ៏ទៃទៀត។
លោកមានប្រសាសន៍ថា ការបណ្ដោយឱ្យមានការហែកគុកដែលមានទណ្ឌិតជាជនឧក្រិដ្ឋបែបនេះ អាចបង្ករឱ្យមានអសន្តិសុខសាធារណៈខ្លាំង។
លោកលើកឡើងថា៖ «រឿងដែលសំខាន់ជាងគេត្រូវមានការស៊ើបអង្កេតមួយជាក់លាក់ ដោយឯករាជ្យ ហើយសុចរិតភាពបំផុត ដើម្បីរកឃើញថា តើការហែកគុកចេញអាចមានមូលហេតុចម្បងអ្វីខ្លះ? ហើយមកពីបញ្ហាអ្វី? ដល់ថ្នាក់ធ្វើឱ្យទណ្ឌិតទាំងនោះរត់ចេញ ដើម្បីរកឱ្យឃើញការពិតនិងដោះស្រាយបញ្ហា»។
ស្នងការនគរបាលខេត្តស្ទឹងត្រែងលោក អូត ស៊ីវុត្ថា បានឱ្យដឹងថា សមត្ថកិច្ចនៅមិនទាន់អាចចាប់ទណ្ឌិតពីរនាក់ទៀតមកវិញបាននៅឡើយទេគិតត្រឹមថ្ងៃសៅរ៍នេះ តែទោះជាយ៉ាងណាលោកថា សមត្ថកិច្ចកំពុងព្យាយាមស្វែងរកទណ្ឌិតដែលនៅសល់ និងបញ្ជូនខ្លូនមកពន្ធធនាគាវិញឱ្យបានឆាប់។
លោកលើកលើងថា៖ « ខ្ញុំជម្រាបប៉ុណ្ណឹងថា សមត្ថកិច្ចកំពុងបន្តដុតដៃដុតជើងនៅឡើយទេ ព្រោះមកដល់ម៉ោងនេះ អត់ទាន់បានដកឃ្លាកើតទេ»។
គួរបញ្ជាក់ថា អ្នកទោសដែលចាប់បានមកវិញ៥នាក់ ក្នុងចំណោម ៧នាក់នោះ រួមមាន ឈ្មោះ ភិត ងិន ត្រូវជាប់ពន្ធនាគារ៤ឆ្នាំ ពីបទ «ជួញដូរខុសច្បាប់នូវសារធាតុញៀន» ឈ្មោះ វ៉ាន់ ភូ ត្រូវជាប់ ពន្ធនាគារ២០ឆ្នាំ ពីបទ«ជួញដូរដោយខុសច្បាប់នូវសារធាតុញៀន» ឈ្មោះ ទូច វ៉ាត ត្រូវជាប់ ពន្ធនាគារ៣០ឆ្នាំពីបទ «ជួញដូរគ្រឿងញៀន» ឈ្មោះ ចាក់លី ចឺតាលី ត្រូវជាប់ទោសមួយជីវិត រឿង«បទល្មើសជួញដូរគ្រឿងញៀន» និង ឈ្មោះ ហន វិមាន ត្រូវជាប់ទោស២៧ឆ្នាំ រឿង«លួចមានស្ថានទម្ងន់ទោស ដោយសារការប្រើទារុណកម្ម និងអំពើឃោរឃៅ»៕
