លោកនាយករដ្ឋមន្ត្រី ហ៊ុន សែន បញ្ជាទៅក្រសួងសុខាភិបាល និងស្ថាប័នពាក់ព័ន្ធគ្រប់លំដាប់ថ្នាក់ឱ្យពន្លឿនបើកសាច់ប្រាក់ជូនដល់គ្រួសារសព ដែលស្លាប់ដោយសារជំងឺកូវីដ-១៩ ចំនួន២លានរៀលឱ្យបានទាន់ពេលវេលា។
ការបញ្ជានេះ ធ្វើឡើងបន្ទាប់ពី មានហ្វេសប៊ុកមួយឈ្មោះ Oun Lyly បានចូលខំមិនក្នុងហ្វេសប៊ុក លោកនាយករដ្ឋមន្ត្រី កាលពីថ្ងៃទី១៣ ខែវិច្ឆិកា ឆ្នាំ២០២១ ដោយថា៖ «សូមអនុគ្រោះដល់កូនចៅផង កូនមានសំណួរមួយចង់សួរទៅ សម្តេចពុកថា អ្នកស្លាប់ដោយជំងឺកូវីដ តើត្រូវទទួលបានប្រាក់ឧបត្តម្ភពីខាងក្រសួងដែរ ឬយ៉ាងណា? ពីព្រោះលោកឪពុក ជាទីស្រលាញ់របស់ខ្ញុំ បានស្លាប់ កាលពីថ្ងៃទី៥ វិច្ឆិកា សូមសម្តេចពុក មេត្តាអនុគ្រោះដល់កូនផង ពីព្រោះគ្រួសារបស់កូនក្រខ្សត់ហើយមិនទាន់ទទួលបានប្រាក់ជំនួយឧបត្តម្ភពីក្រសួងទេ សូមសម្តេចពុកមេត្តាអភ័យទោសនឹងអនុគ្រោះដល់កូនផង»។
លោកនាយករដ្ឋមន្ត្រី ហ៊ុន សែន បានឆ្លើយតបទៅលើអ្នកខមិនក្នុងហ្វេសប៊ុករបស់លោក កាលពីថ្ងៃទី១៣ ខែវិច្ឆិកា នោះថា លោកសុំការយោគយល់ពីក្រុមគ្រួសារសព ដែលស្លាប់ដោយសារជំងឺកូវីដ-១៩ ចំពោះការយឺតយ៉ាវ ក្នុងការបើកប្រាក់ឧបត្ថម្ភជូនគ្រួសារសពចំនួន២លានរៀល ដោយសារនៅកន្លែងខ្លះ មន្ត្រីបើកប្រាក់ជូនលឿន និងកន្លែងខ្លះបើកប្រាក់ជូនយឺតជាដើម ។
លោក ហ៊ុន សែន បានបញ្ជាក់ថា៖«គ្រួសារសពនឹងទទួល បាន២លានរៀល។ ថវិការមិនបាត់បង់ទៅណាទេ គ្រាន់តែកន្លែងខ្លះបើកជូនបានលឿនកន្លែងខ្លះបើកយឹត សុំការយោគយល់ផង»។
ករណីនេះ លោកបញ្ជាទៅក្រសួងសុខាភិបាល និងអាជ្ញាធរគ្រប់លំដាប់ថ្នាក់ទាំងអស់ ត្រូវពន្លឿនបើកផ្តល់សាច់ប្រាក់ដល់គ្រួសារសពដោយសារជំងឺកូវីដ-១៩ ឱ្យបានឆាប់ផងដែរ ។
លោកបន្ដថា៖ «សូមបញ្ជាក់ថា ថវិការផ្តល់ជូនតែអ្នកមរណភាពដោយកូវីដ ពិតប្រាកដនៅតាមមន្ទីរពេទ្យតែប៉ុណ្ណោះ។ សុំក្រសួងសុខាភិបាល និងអាជ្ញាធរ គ្រប់លំដាប់ថ្នាក់ពន្លឿនការបើកផ្តល់សាច់ប្រាក់ដល់គ្រួសារសព»។
បើតាមក្រសួងសុខាភិបាល គិតត្រឹមព្រឹកថ្ងៃអាទិត្យនេះ កម្ពុជាបានរកឃើញអ្នកឆ្លងជំងឺកូវីដ-១៩ សរុបចំនួន១១៩ ៥៣៦នាក់ ក្នុងនោះអ្នកជំងឺព្យាបាលជាសះស្បើយសរុបមានចំនួន ១១ ៥៩២៤នាក់ និងអ្នកស្លាប់សរុប ២ ៨៦៧នាក់ និងករណីនាំចូលពីក្រៅប្រទេសសរុប ១៩ ៧៣៥នាក់ ៕
