លោកនាយករដ្ឋមន្ត្រី ហ៊ុន សែន បានឱ្យដឹងថា អ្នកដំណើរខ្មែរ និងបរទេសដែលចាក់វ៉ាក់សាំងពេញលេញ ឬចាក់បាន២ដូស អាចធ្វើដំណើរចូលកម្ពុជា ដោយមិនបាច់ធ្វើចត្តាឡីស័កបន្តទៀតនោះទេ លើកលែងតែអ្នកមិនទាន់ចាក់វ៉ាក់សាំងប៉ុណ្ណោះ ដែលត្រូវធ្វើចត្តាឡីស័ក១៤ថ្ងៃដដែល។
លោកនាយករដ្ឋមន្ត្រី ហ៊ុន សែន បានថ្លែងសារជាសំឡេងពិសេសផ្ញើជូនជនរួមជាតិ នៅរសៀលថ្ងៃទី១៤ ខែវិច្ឆិកា ឆ្នាំ២០២១នេះថា លោកអនុញ្ញាតឱ្យអ្នកដំណើរទាំងជនជាតិខ្មែរ និងជនជាតិបរទេសទាំងអស់ ដែលធ្វើដំណើរចូលកម្ពុជា ត្រូវបានចាក់វ៉ាក់សាំងពេញលេញ (២ដូស) ដោយមិនតម្រូវឱ្យធ្វើចត្តាឡីស័កដូចពីមុនទៀតនោះទេ។
យ៉ាងណាលោកថា លើកលែងតែអ្នកដែលមិនទាន់ចាក់វ៉ាក់សាំង គឺត្រូវតម្រូវឱ្យធ្វើចត្តាឡីស័ក១៤ថ្ងៃដដែល ដោយវិធានការនេះ នឹងចាប់ផ្តើមអនុវត្តចាប់ពីថ្ងៃទី១៥ ខែវិច្ឆិកានេះតទៅ ។
លោកថ្លែងសារដូចនេះថា៖ «ដោយសារកម្ពុជារបស់យើង គឺបានចាក់វ៉ាក់សាំងពេញលេញ អត្រាគ្របដណ្តប់រហូតដល់ជិត៨៨ភាគរយនៃចំនួនប្រជាជន១៦លាននាក់។ ដូច្នេះមិនត្រូវការឲ្យធ្វើចត្តាឡីស័កទៀតទេ លើកលែងតែអ្នកមិនទាន់បានចាក់វ៉ាក់សាំង។ អ្នកដែលមិនទាន់បានចាក់វ៉ាក់សាំងត្រូវធ្វើចត្តាឡីស័ករយៈពេល១៤ថ្ងៃដដែល ប៉ុន្តែសម្រាប់អ្នកបានចាក់វ៉ាក់សាំង២ដូសរួចរាល់ ទាំងជនជាតិខ្មេរ ទាំងជនជាតិបរទេសដែលចូលមកព្រះរាជាណាចក្រកម្ពុជា មិនតម្រូវឲ្យធ្វើចត្តាឡីស័កទៀតទេ»។
លោកនាយករដ្ឋមន្ត្រីថ្លែងបញ្ជាក់ថា សម្រាប់អ្នកដំណើរដែលធ្វើដំណើរតាមផ្លូវអាកាសទាំងភ្នំពេញ ខេត្តព្រះសីហនុ និងខេត្តសៀមរាប ត្រូវធ្វើតេស្តដោយម៉ាស៊ីន PCR ក្នុងរយៈពេលនៃការរង់ចាំលទ្ធផល ប៉ុន្តែពួកគេអាចរង់ចាំនៅផ្ទះរបស់ពួកគាត់ឬកន្លែងដែលស្នាក់នៅបាន ។ សម្រាប់អ្នកវិនិយោគិន និងអ្នកទេសចរ ត្រូវរង់ចាំលទ្ធផលនៅកន្លែងសំណាក់របស់ខ្លួន ដូចជាសណ្ឋាគារ ផ្ទះសំណាក់ជាដើម បើលទ្ធភាពតេស្តអវិជ្ជមាន អ្នកដំណើរទាំងនោះអាចធ្វើដំណើរដោយសេរីនៅទូទាំងប្រទេសកម្ពុជា ដោយមិនកម្រិតតំបន់ ឬខេត្តសម្រាប់ដើរហើរទៀតនោះទេ។
បន្ថែមពីនេះ លោក ហ៊ុន សែន បានណែនាំទៅក្រសួងសុខាភិបាល ត្រូវពង្រឹងសមត្ថភាពឱ្យបានគ្រប់គ្រាន់ សម្រាប់ការធ្វើតេស្តនូវម៉ាស៊ីន PCR នៅរាជធានីភ្នំពេញ ខេត្តព្រះសីហនុ និងខេត្តសៀមរាប ដើម្បីបម្រើសេវាធ្វើតេស្តឱ្យបានល្អនិងទាន់ពេលវេលាដល់ភ្ញៀវទេសចរផងដែរ។
បើតាមក្រសួងសុខាភិបាល គិតត្រឹមព្រឹកថ្ងៃអាទិត្យនេះ កម្ពុជាបានរកឃើញអ្នកឆ្លងជំងឺកូវីដ-១៩ សរុបចំនួន១១៩ ៥៣៦នាក់ ក្នុងនោះអ្នកជំងឺព្យាបាលជាសះស្បើយសរុបមានចំនួន ១១ ៥៩២៤នាក់ និងអ្នកស្លាប់សរុប ២ ៨៦៧នាក់ និងករណីនាំចូលពីក្រៅប្រទេសសរុប ១៩ ៧៣៥នាក់៕
