សមត្ថកិច្ចចាប់ខ្លួនបុរសសញ្ជាតិកាណាដាម្នាក់ ជាមួយវត្ថុតាងគ្រឿងញៀនជាង១៦៧គីឡូក្រាម ព្រមទាំងបានចុះស្រាវជ្រាវ និងឈានទៅបង្ក្រាបឧក្រិដ្ឋជននៅតាមគោលដៅមួយចំនួន ចាប់ពីថ្ងៃទី២៧ ខែតុលា ដល់ថ្ងៃទី១០ ខែវិច្ឆិកា ឆ្នាំ២០២១ នៅរាជធានីភ្នំពេញ។
ទំព័រហ្វេសប៊ុករបស់មន្ទីរប្រឆាំងបទល្មើសគ្រឿងញៀនបានបង្ហោះនៅថ្ងៃនេះ ប៉ុន្តែក្រោយមកលុបចេញវិញ បានសរសេរថា ជនសង្ស័យមានសញ្ជាតិកាណាដារូបនោះមានឈ្មោះ ហ្វូ យុង ឈិន (FU YONG QING) ភេទប្រុស អាយុ៥២ឆ្នាំ។
ប្រភពដដែលបន្តថា ប្រតិបត្តិការនេះធ្វើឡើងរួមគ្នារវាងសមត្ថកិច្ចជំនាញ ជាមួយមន្ត្រីតុលាការរាជធានីភ្នំពេញ ព្រមទាំងមន្រ្តីពាក់ព័ន្ធផ្សេងទៀត ដោយបានចុះស្រាវជ្រាវនិងឈានទៅបង្ក្រាបឧក្រិដ្ឋជនដែលរក្សាទុក ដឹកជញ្ជូនគ្រឿងញៀនឆ្លងដែន នៅ៣គោលដៅផ្សេងៗគ្នា។
ចំណុចគោលដៅដែលសមត្ថកិច្ចចុះបង្រ្កាបទាំងនោះ រួមមាន ទីមួយនៅចំណុចក្រុមហ៊ុនដឹកជញ្ជូន ស្ថិតនៅភូមិត្រពាំងស្វាយ សង្កាត់ឃ្មួញ ខណ្ឌសែនសុខ។ ទី២ ចំណុចបន្ទប់លេខ៤១២១ ខុនដូជិតកោះពេជ្រ សង្កាត់ទន្លេបាសាក់ ខណ្ឌចំការមន និងទី៣ នៅបន្ទប់ខុនដូ PROVENCE ផ្លូវលេខ៣០២ សង្កាត់បឹងកេងកង។
មន្ទីរប្រឆាំងគ្រឿងញៀនដដែលបន្តថា ជាលទ្ធផល សមត្ថកិច្ចបានចាប់ខ្លួនបុរសជនជាតិកាណាដា និងចាប់យកវត្ថុតាងគ្រឿងញៀន៧ប្រភេទផ្សេងៗគ្នាសរុបរួម១៦៧គីឡូក្រាម រួមមាន អ៊ិចស្តាស៊ីគ្រាប់ (MDMA) ពណ៌ផ្កាឈូក ៨៥ ៩២២គ្រាប់ ស្មើទម្ងន់ ២៨ ៣៥៤,៥៤ក្រាម, អ៊ិចស្តាស៊ីគ្រាប់ (MDMA) ពណ៌ប្រផេះ ១៥៤ ៤៧៤គ្រាប់ ស្មើទម្ងន់ ៦០ ២៤៤,៩៩ក្រាម និង អ៊ិចស្តាស៊ីម្សៅ (MDMA) កញ្ចប់រូបសេះ F3 ទម្ងន់ ៥០ ០០២,៧២ក្រាម ព្រមទាំងវត្ថុតាងមួយចំនួនទៀត។
ចំណែកឯជនសង្ស័យនិងវត្ថុតាងទាំងនោះ សមត្ថកិច្ចបានកសាងសំណុំរឿងបញ្ជូនទៅសាលាដំបូងរាជធានីភ្នំពេញ ដើម្បីចាត់វិធានការតាមនីតិវិធី។
ការបង្ក្រាបបទល្មើសគ្រឿងញៀនលក្ខណៈទ្រង់ទ្រាយធំនេះបានកើតឡើងម្ដងរួចមកហើយ កាលពីថ្ងៃទី២២ ខែតុលា។ ពេលនោះ សមត្ថកិច្ចស្រុកស្រែអំបិល ខេត្តកោះកុង បានចុះបង្ក្រាបបទល្មើសគ្រឿងញៀនបានជាង២០០គីឡូក្រាម និងឃាត់ខ្លួនមនុស្សបានចំនួន៦ នាក់ ក្នុងនោះជនជាតិថៃពីរនាក់ជាមេខ្លោង ខណៈមនុស្ស៤នាក់ទៀតជាជនជាតិខ្មែរ រស់នៅខេត្តតាកែវពីរនាក់ ស្វាយរៀងម្នាក់ និងខេត្តព្រៃវែងម្នាក់៕
