កងកម្លាំងតាលីបង់ កាលពីថ្ងៃអាទិត្យម្សិលមិញ បានធ្វើព្យុហយាត្រាយោធាមួយនៅក្នុងទីក្រុងកាប៊ុល ដោយប្រើប្រាស់រថពាសដែកផលិតនិងបន្សល់ទុកដោយអាមេរិក រួមនឹងឧទ្ធម្ភាគចក្ររបស់រុស្ស៊ី ដើម្បីបង្ហាញពីការផ្លាស់ប្ដូររបស់ពួកគេពីកងកម្លាំងបះបោរទៅជាកងទ័ពផ្លូវការមួយរបស់ប្រទេស។
តាលីបង់ គឺជាក្រុមសកម្មប្រយុទ្ធបះបោរអស់រយៈពេលប្រមាណជា២ទសវត្សរ៍មកហើយ។ បច្ចុប្បន្ន ពួកគេបាននិងកំពុងចាប់ផ្ដើមប្រើប្រាស់អាវុធនិងបរិក្ខារយោធាដ៏ច្រើនសន្ធឹកសន្ធាប់បន្សល់ទុកពីអតីតរដ្ឋាភិបាលគាំទ្រដោយលោកខាងលិច កាលពីពេលកន្លងទៅ ដែលបានដួលរលំនៅក្នុងខែសីហា ដើម្បីពង្រឹងកងកម្លាំងរបស់ពួកគេឱ្យកាន់តែខ្លាំងបន្ថែមទៀត។
ទីភ្នាក់ងារសារព័ត៌មាន Reuters បានស្រង់សម្ដីអ្នកនាំពាក្យក្រសួងការពារជាតិអាហ្វហ្គានីស្ថាន លោក Enayatullah Khwarazmi ដែលបានលើកឡើងថា ការធ្វើព្យុហយាត្រាយោធានេះ ក៏ជាការផ្សារភ្ជាប់ជាមួយនឹងការបញ្ចប់ថ្នាក់ហ្វឹកហ្វឺនរបស់ទាហានថ្មីចំនួន២៥០នាក់ផងដែរ។
ព្យុហយាត្រាយោធានេះ ត្រូវបានគេមើលឃើញថា មានការប្រើប្រាស់រថពាសដែកប្រភេទ M117 រាប់សិបគ្រឿងរបស់សហរដ្ឋអាមេរិក ដែលបើកនៅលើដងផ្លូវសំខាន់មួយក្នុងរដ្ឋធានីកាប៊ុល អមដោយឧទ្ធម្ភាគចក្រ Mi-17 របស់រុស្ស៊ីហោះពីលើ ខណៈដែលទាហានជាច្រើននាក់ត្រូវបានបំពាក់ជាមួយនឹងកាំភ្លើង M4 ផលិតដោយសហរដ្ឋអាមេរិក។
សព្វាវុធនិងបរិក្ខារយោធាភាគច្រើនដែលកងកម្លាំងតាលីបង់កំពុងប្រើប្រាស់នាពេលនេះ គឺជាជំនួយដែលផ្គត់ផ្គង់ដោយអាមេរិកកាលពីពេលកន្លងទៅដល់រដ្ឋាភិបាលក្រុងកាប៊ុល ក្នុងគោលបំណងដើម្បីសាងសង់កងកម្លាំងជាតិអាហ្វហ្គានីស្ថានមួយប្រយុទ្ធនឹងពួកតាលីបង់។
ទោះជាយ៉ាងណា កងកម្លាំងមួយនេះបានរលាយបាត់បង់ទៅវិញ បន្ទាប់ពីការភៀសខ្លួនចេញពីទីក្រុងកាប៊ុលរបស់អតីតប្រធានាធិបតីអាហ្វហ្គានីស្ថាន លោក Ashraf Ghani ដែលបានបន្សល់ទុកនូវបរិក្ខារយោធាជាច្រើនសម្រាប់ពួកតាលីបង់ប្រើប្រាស់នាពេលបច្ចុប្បន្ន។
យោងតាមរបាយការណ៍មួយចេញកាលពីចុងឆ្នាំមុន ដោយក្រុមត្រួតពិនិត្យពិសេសសម្រាប់ការស្ថាបនាប្រទេសអាហ្វហ្គានីស្ថានឡើងវិញ ឬហៅកាត់ថា SIGAR បានឱ្យដឹងថា សហរដ្ឋអាមេរិកបានជួយគាំទ្រល់វិស័យយោធារបស់អតីតរដ្ឋាភិបាលអាហ្វហ្គានីស្ថាន សរុបជាទឹកប្រាក់ជាង២៨ពាន់លានដុល្លារ គិតចាប់ពីឆ្នាំ២០០២ ដល់ឆ្នាំ២០១៧ ដែលក្នុងនោះមានដូចជា ការផ្ដល់អាវុធ បរិក្ខារយោធា គ្រាប់កាំភ្លើង យន្តហោះយោធា និងប្រព័ន្ធឃ្លាំមើល ជាដើម៕
