UN ថា​គ្រួសារ​ងាយ​រងគ្រោះ​ជាច្រើន​បាន​កាត់​បន្ថយ​របប​អាហារ​ប្រចាំថ្ងៃ​និង​ខ្ចីបុលគេ អំឡុង​កូវីដ-១៩​និង​គ្រោះ​ទឹកជំនន់

UN ប្រចាំកម្ពុជា រួមទាំងកម្មវិធីស្បៀងអាហារពិភពលោកប្រចាំនៅកម្ពុជា និងអនុរដ្ឋទូតអាល្លឺម៉ង់ បានធ្វើទស្សនកិច្ចរួមគ្នានៅខេត្តកំពង់ធំ ដើម្បីជួបជាមួយគ្រួសារ​ងាយរងគ្រោះដែលរងផលប៉ះពាល់ពីវិបត្តិកូវីដ-១៩ និងគ្រោះទឹកជំនន់ កាលពីដើមខែវិច្ឆិកា ឆ្នាំ២០២១។ (ហ្វេសប៊ុក៖ United Nations in Cambodia)

អង្គការសហប្រជាជាតិ (UN) ប្រចាំកម្ពុជា លើកឡើងថា គ្រួសារងាយរងគ្រោះជាច្រើនដែលរងផលប៉ះពាល់ពីវិបត្តិកូវីដ-១៩ និង​គ្រោះទឹកជំនន់ បានកាត់បន្ថយរបបអាហារប្រចាំថ្ងៃរបស់ពួកគាត់ ខណៈគ្រួសារខ្លះលក់ទ្រព្យសម្បត្តិ​និងខ្ចីបំណុលគេកាន់តែច្រើន ដើម្បីយកមកដោះស្រាយជីវភាព។

អង្គការសហប្រជាជាតិប្រចាំកម្ពុជា នៅថ្ងៃទី១៥ ខែវិច្ឆិកានេះ បានបង្ហោះនៅលើទំព័រហ្វេសប៊ុក អំពី របាយការណ៍​​ថ្មី​របស់​​ខ្លួន ដោយសរសេរដូច្នេះថា៖ «របាយការណ៍ថ្មីៗនេះបង្ហាញថា គ្រួសារងាយរងគ្រោះជាច្រើនដែលទទួលរងផលប៉ះពាល់ពីវិបត្តិកូវីដ-១៩ និង​គ្រោះទឹកជំនន់ បានកាត់បន្ថយរបបអាហារប្រចាំថ្ងៃរបស់ពួកគាត់ ខ្លះលក់ទ្រព្យសម្បត្តិសកម្ម និងខ្ចីបំណុលគេ ដើម្បីយកមកដោះស្រាយតម្រូវការមូលដ្ឋានរបស់ពួកគាត់»។

ការលើកឡើងនេះ ក្រោយពេល​ UN ប្រចាំកម្ពុជា រួមទាំងកម្មវិធីស្បៀងអាហារពិភពលោកប្រចាំនៅកម្ពុជា និងអនុរដ្ឋទូតអាល្លឺម៉ង់ កាលពីចុងសប្ដាហ៍មុន បានធ្វើទស្សនកិច្ចរួមគ្នានៅខេត្តកំពង់ធំ ដើម្បីជួបជាមួយគ្រួសារ​ងាយរងគ្រោះដែលរងផលប៉ះពាល់ពីវិបត្តិកូវីដ-១៩ និងគ្រោះទឹកជំនន់។ ការចុះជួបនោះ ដើម្បីស្វែងយល់ពីបញ្ហាប្រឈមដែលពួកគាត់ជួបប្រទះ និងប្រសិទ្ធភាពនៃជំនួយជាសាច់ប្រាក់ដែលបានផ្ដល់ដល់ពួកគាត់ក្នុងពេលវេលាដ៏លំបាកមួយនេះ។

តាមរយៈដំណើរនេះ រដ្ឋាភិបាលអាល្លឺម៉ង់បានគាំទ្រដល់កម្មវិធីស្បៀងអាហារពិភពលោក​ ក្នុងការផ្ដល់ជំនួយសាច់ប្រាក់ដល់ពលរដ្ឋក្រីក្រនិងងាយរងគ្រោះប្រមាណ៤០ ០០០គ្រួសារ ដើម្បីអាចដោះស្រាយជីវភាព ព្រមទាំងចិញ្ចឹមថែរក្សាសមាជិក​គ្រួសាររបស់ពួកគាត់។

កសិករមួយរូប​នៅ​ខេត្ត​សៀម​រាប អ្នកស្រី ប៊ុន កិមឡា ប្រាប់​ថា តាំងពីមានវិបត្តិ​កូវីដ-១៩មក គាត់ជំពាក់បំណុល​គេច្រើនជាង​មុន ពោលគឺទាំងមីក្រូហិរញ្ញវត្ថុ និងជំពាក់អ្នកភូមិដែលរស់នៅជិតគ្នា ដែលករណីនេះ​បាន​​បង្ខំឱ្យ​គ្រួសារគាត់​សម្រេច​​ចិត្ត​ចាយវាយ​លើ​ម្ហូបអាហារតិច​ជាង​មុន។

អ្នកស្រីថា៖ «មុនពេលមានកូវីដ-១៩ ក្នុងមួយថ្ងៃ យើងធ្លាប់ចំណាយអស់១៥ ០០០រៀលសម្រាប់ម្ហូបមួយថ្ងៃ។ ឥលូវសព្វថ្ងៃ សង្ខេប ចាយលើម្ហូបតែ៥ ០០០រៀលទេ រកក្ដាម រកខ្យងហូបខ្លួនឯងផង។ [តាំងពី] ចាយត្បិតត្បៀតជាងមុនមក ពេលខ្លះមិនមានកម្លាំងធ្វើការ ខ្សោយ ខ្វះវីតាមីន ដេកអត់លក់ ភ័យឡើងស្រកគីឡូហើយ ខ្លាចគេទារលុយជំពាក់ អត់លុយឱ្យគេ»។

រដ្ឋលេខាធិការ និងជាអ្នកនាំពាក្យក្រសួងសង្គមកិច្ច អតីត​យុទ្ធជន និងយុវនីតិសម្បទា លោក តូច ចាន់នី នៅថ្ងៃ​ចន្ទ​នេះ សុំមិនបកស្រាយ ដោយថា លោកមិន​ទាន់​​​បាន​ឃើញ​​របាយការណ៍របស់ UN នៅឡើយ។

យ៉ាងណា លោកថ្លែង​ថា រយៈពេលជិត២ឆ្នាំមក​នេះ រដ្ឋាភិបាលមានកម្មវិធីច្រើនណាស់ សម្រាប់ជួយជន​ក្រីក្រនិងងាយរងគ្រោះក្នុងអំឡុងវិបត្តិកូវីដ-១៩ ក្នុងន័យជួយសម្រួលជីវភាព​ពួកគាត់រៀង​រាល់ខែ។

​លោកថា រដ្ឋាភិបាលបានផ្ទេរសាច់​ប្រាក់​ដល់ជនក្រីក្រនិងងាយរងគ្រោះក្នុងអំឡុងពេលកូវីដ-១៩ ដែល​មាន​បណ្ណសមធម៌ក្រីក្រ។

លោក តូច ចាន់នី មានប្រសាសន៍ថា៖ «កម្មវិធីនៅតែបន្តដដែល មិនទាន់ចប់ទេ នេះជាការ​ជួយ​របស់រដ្ឋាភិបាល គឺយើងជួយអ៊ីចឹង! ហើយមកដល់ម៉ោងនេះ ប្រជាពលរដ្ឋដែលទទួលផលពី​កម្មវិធី​នេះ​​មាន​ប្រហែល៣លាននាក់ ឬ៧០ម៉ឺនគ្រួសារ [ថវិកាចាយលើជនក្រីក្រនិងងាយ​រងគ្រោះ​ក្នុងអំឡុងកូវីដ-១៩]។ រដ្ឋាភិបាល​យើង​ចំណាយលុយប្រហែលជាអស់ជិត៥០០លានដុលា្លរ​អាមេរិក​ហើយ ក្នុងមួយ​ខែ​ប្រហែល​អស់៣០លានដុល្លារ។ បើគិតមែនទែនទៅ កម្មវិធីនេះល្អ​មែនទែន ហើយដែល​ប្រទេស​មួយចំនួន​គាត់អត់បានធ្វើទេ មាន​តែប្រទេស​កម្ពុជាទេ អាច​ធ្វើ​កម្មវិធី​ហ្នឹងបាន»។

​នាយករង​ទទួលបន្ទុក​កម្មវិធី​ឃ្លាំមើល​​នៃអង្គការ​លីកាដូ​ លោក ​អំ សំអាត ថ្លែង​ថា អ្វីដែល UN លើក​ឡើង​នេះ​​ជា​​ទិដ្ឋភាពជាក់ស្ដែងដែលកើតឡើងលើពលរដ្ឋក្រីក្រនិងងាយរងគ្រោះនៅកម្ពុជា ខណៈពួកគាត់មិនអាចរកចំណូលបាន​ក្នុង​អំឡុង​កូវីដ​-១៩ និងគ្រោះទឹកជំនន់នោះ។

យ៉ាងណា លោកថា ជាដំណោះស្រាយ ដើម្បី​ឱ្យជីវភាពពលរដ្ឋ​មាន​លំនឹងនោះ​ ​ទាល់​តែពួកគាត់មានមុខរបរ ហើយ​​រដ្ឋាភិបាល​គួរបង្កើតជំនាញវិជ្ជាជីវៈ មុខរបរ និងពិនិត្យ​លើការ​ផ្ដល់សម្បទាន​ដី​សង្គម​កិច្ច​​សម្រាប់​បង្កបង្កើនផលដល់ពលរដ្ឋ ដើម្បីឱ្យពួកគាត់ទទួលបានចំណូលរយៈពេលវែង បើពុំនោះទេ ​ពួកគាត់​អាច​នឹងធ្វើចំណាកស្រុក ឬងាយ​រង​គ្រោះបន្ថែមទៀត។

លោក ​អំ សំអាត គូសបញ្ជាក់ថា៖ «ទោះបីជារដ្ឋាភិបាលបានជួយលើផ្នែកខ្លះសម្រាប់គាំទ្រគាត់ប្រចាំខែ ក៏ប្រាក់ប្រចាំខែហ្នឹងវាអត់គ្រប់គ្រាន់សម្រាប់ពួកគាត់ទេ ព្រោះគាត់ជំពាក់បំណុលគេពីមុនមកហើយ។ ហើយ​ឥលូវហ្នឹងគាត់លក់ទ្រព្យសម្បត្តិ ឬក៏ខ្ចីលុយគេបន្ថែមទៀត អ៊ីចឹងអាបញ្ហាជីវភាពនិងបំណុលរបស់​គាត់ហ្នឹងកាន់​តែ​កើន​ឡើង​»។

លោកបន្ថែមថា បើរដ្ឋាភិបាលមិនមានយន្តការ​បង្កើតការងារ បណ្ដុះ​បណ្ដាល​ពលរដ្ឋក្រីក្រនិងងាយរងគ្រោះទាំងនោះទេ នោះជំនួយខ្លះៗដែលរដ្ឋឧបត្ថម្ភនឹង​មិនអាច​ទប់ទល់​នឹង​តម្រូវការជីវភាពពលរដ្ឋ​បានឡើយ ហើយពលរដ្ឋដែលពុំមានចំណេះដឹង​ នៅតែជួបការលំបាក​និង​ជំពាក់​បំណុល​គេកាន់តែច្រើន។

កាលពីថ្ងៃទី៣ ខែវិច្ឆិកា ឆ្នាំ២០២១នេះ UN ប្រចាំកម្ពុជា បានចេញឯកសារព័ត៌មានទី១៥ ស្ដីអំពី «វិសមភាព សិទ្ធិសេដ្ឋកិច្ច សង្គម និងវប្បធម៌ និងការឆ្លើយតបចំពោះជំងឺកូវីដ-១៩»។ UN ថាការរាតត្បាតជាសកលកំពុងលាតត្រដាងឱ្យឃើញពីវិសមភាព ឬភាពមិនស្មើគ្នានៅកម្ពុជា ដូចជា វិសមភាព​ប្រាក់​ចំណូល សុខភាព និងការអប់រំ ជាដើម។

UN បន្ត​ថា ប្រជាពលរដ្ឋមានចំណូលទាបជាច្រើនគ្រួសារកំពុងជាប់បំណុល ហើយបំណុលទាំងនោះត្រូវបាន​ប្រើប្រាស់ដើម្បីបំពេញតម្រូវការសេដ្ឋកិច្ច សុខភាព និងជីវភាពរស់នៅប្រចាំថ្ងៃរបស់គ្រួសារទាំងនោះ៕  ​

ចែករំលែកព័ត៌មាន
រក្សាសិទ្វិគ្រប់យ៉ាងដោយ ស៊ីស៊ីអាយអឹម

សូមបញ្ជាក់ថា គ្មានផ្នែកណាមួយនៃអត្ថបទ រូបភាព សំឡេង និងវីដេអូទាំងនេះ អាចត្រូវបានផលិតឡើងវិញក្នុងការបោះពុម្ពផ្សាយ ផ្សព្វផ្សាយ ការសរសេរឡើងវិញ ឬ ការចែកចាយឡើងវិញ ដោយគ្មានការអនុញ្ញាតជាលាយលក្ខណ៍អក្សរឡើយ។
ស៊ីស៊ីអាយអឹម មិនទទួលខុសត្រូវចំពោះការលួចចម្លងនិងចុះផ្សាយបន្តណាមួយ ដែលខុស នាំឲ្យយល់ខុស បន្លំ ក្លែងបន្លំ តាមគ្រប់ទម្រង់និងគ្រប់មធ្យោបាយ។ ជនប្រព្រឹត្តិ និងអ្នកផ្សំគំនិត ត្រូវទទួលខុសត្រូវចំពោះមុខច្បាប់កម្ពុជា និងច្បាប់នានាដែលពាក់ព័ន្ធ។

អត្ថបទទាក់ទង

សូមផ្ដល់មតិយោបល់លើអត្ថបទនេះ

ចុះឈ្មោះទទួលព្រឹត្តិបត្រព័ត៌មានវីអូឌី
តាមដានព័ត៌មាន វីអូឌី

VODEnglish.news

VODEnglish.news

Everybody Well-Informed, Everybody Empowered