ក្រសួងមហាផ្ទៃ បានសម្រេចបដិសេធការសុំចុះបញ្ជីរបស់គណបក្សបេះដូងជាតិ ដោយថា គណបក្សនេះមានចេតនាទុច្ចរិតក្នុងការបន្លំស្នាមមេដៃនិងអត្តសញ្ញាណបុគ្គល ដើម្បីបង្កើនបរិមាណចំនួនសមាជិក។
យោងតាមលិខិតរបស់រដ្ឋមន្ត្រីក្រសួងមហាផ្ទៃ លោក ស ខេង ផ្ញើជូនលោក សៀម ភ្លុក តំណាងស្ថាបនិកគណបក្សបេះដូងជាតិ ចុះថ្ងៃទី១៦ ខែវិច្ឆិកា ឆ្នាំ២០២១នេះ បានលើកឡើងថា ការសម្រេចបដិសេធការស្នើសុំចុះបញ្ជីគណបក្សបេះដូងជាតិនេះ ដោយសារតែការផ្ដិតស្នាមមេដៃរបស់សមាជិកគណបក្សដើម្បីគាំទ្រក្នុងការសុំចុះបញ្ជី មានចេតនាទុច្ចរិត ដោយមានការផ្ដិតស្នាមមេដៃជំនួស ការក្លែងបន្លំអត្តសញ្ញាណបុគ្គល និងការផ្ដិតធ្វើឱ្យខូចគុណភាព ដើម្បីបង្កើនបរិមាណចំនួនសមាជិក។
លិខិតក្រសួងបន្តថា ប្រការមួយចំនួននៃលក្ខន្តិកៈគណបក្សនេះក៏មានខ្លឹមសារផ្ទុយនឹងបទប្បញ្ញត្តិនៃច្បាប់ស្ដីពីគណបក្សនយោបាយផងដែរ។
កាលពីថ្ងៃទី១១ ខែវិច្ឆិកា ឆ្នាំ២០២១ ក្រសួងមហាផ្ទៃក៏បានប្រកាសប្ដឹងស្ថាបនិកគណបក្សបេះដូងជាតិទៅតុលាការ ដោយសម្អាងថាបានរកឃើញស្ថាបនិកគណបក្សនេះក្លែងបន្លំស្នាមមេដៃដើម្បីបង្កើនសមាជិក ក្នុងការបំពេញបែបបទសុំចុះបញ្ជីគណបក្សនយោបាយ។ នេះបើតាមលិខិតមួយច្បាប់ដែលរដ្ឋមន្ត្រីក្រសួងមហាផ្ទៃ លោក ស ខេង ផ្ញើទៅកាន់លោកនាយករដ្ឋមន្ត្រី ហ៊ុន សែន ចុះថ្ងៃទី១១ ខែវិច្ឆិកា ឆ្នាំ២០២១។
បើតាមលិខិតនោះ ស្នាមមេដៃជាង៤ ០០០ (៤ ៧៨១ស្នាមមេដៃ) របស់គណបក្សបេះដូងជាតិ ដែលបានផ្ញើមកក្រសួង ដើម្បីសុំចុះបញ្ជីគណបក្សនយោបាយនោះ ក្រសួងបានរកឃើញថា មេដៃរបស់បុគ្គល២០នាក់ខុសស្នាមមេដៃក្នុងអត្តសញ្ញាណបណ្ណ, ស្នាមមេដៃបុគ្គលិក២០នាក់ទៀត ផ្តិតលើឈ្មោះបុគ្គល៥៤នាក់, ស្នាមមេដៃបុគ្គល៧៤នាក់មានភាពមិនប្រក្រតីឬក្លែងស្នាមមេដៃ, ស្នាមមេដៃបុគ្គល២៨៧នាក់ខូចគុណភាព មិនអាចធ្វើកោសលវិច័យបាន និងស្នាមមេដៃមានភាពមិនប្រក្រតីធ្ងន់ធ្ងររបស់បុគ្គលចំនួន៥នាក់ផ្ដិតលើឈ្មោះបុគ្គលចំនួន២១នាក់។
តែយ៉ាងណា ស្ថាបនិកគណបក្សបេះដូងជាតិ និងជាអតីតមន្ត្រីបក្សប្រឆាំង លោក សៀម ភ្លុក មានប្រសាសន៍កាលពីថ្ងៃសុក្រសប្ដាហ៍មុនថា លោកមានការភ្ញាក់ផ្អើលជុំវិញការចោទប្រកាន់របស់ក្រសួងមហាផ្ទៃនេះ។ ប៉ុន្តែលោកថា នឹងត្រៀមខ្លួនគ្រប់ពេលដើម្បីបំភ្លឺបញ្ហានេះតាមផ្លូវច្បាប់៕