និយ័តករទូរគមនាគមន៍កម្ពុជា (ន.ទ.ក) សហការជាមួយសមត្ថកិច្ច បិទខ្ទប់គេហទំព័រចំនួន៧៩ ដោយសារលួចប្រតិបត្តិការផ្ដល់សេវាលេងល្បែងស៊ីសងខុសច្បាប់តាមប្រព័ន្ធអនឡាញនៅកម្ពុជា ដែលធ្វើឱ្យប៉ះពាល់សណ្ដាប់ធ្នាប់សាធារណៈនិងរបៀបរៀបរយក្នុងសង្គម។
ក្នុងសេចក្ដីប្រកាសព័ត៌មានរបស់និយ័តករទូរគមនាគមន៍កម្ពុជា (ន.ទ.ក) បានឱ្យដឹងនៅថ្ងៃទី១៦ ខែវិច្ឆិកានេះថា ស្ថាប័ននេះបានសហការជាមួយអគ្គស្នងការដ្ឋាននគរបាលជាតិ បានចាត់វិធានការបិទខ្ទប់គេហទំព័រចំនួន៧៩ បន្ទាប់ពីរកឃើញថា គេហទំព័រទាំងនោះបានប្រតិបត្តិការនិងផ្ដល់សេវាលេងល្បែងស៊ីសងខុសច្បាប់តាមប្រព័ន្ធអនឡាញ ធ្វើឱ្យប៉ះពាល់ដល់សន្តិសុខ សណ្តាប់ធ្នាប់សាធារណៈក្នុងសង្គមជាដើម ។
ទោះជាបែបនេះក្ដី និយ័តករទូរគមនាគមន៍កម្ពុជានឹងបន្តសហការជាមួយអគ្គស្នងការដ្ឋាននគរបាលជាតិ អាជ្ញាធរពាក់ព័ន្ធ និងកិច្ចសហប្រតិបត្តិករទូរគមនាគមន៍ទាំងអស់ ដើម្បីលុបបំបាត់រាល់គេហទំព័រដែលផ្ដល់សេវាលេងល្បែងស៊ីសងតាមប្រព្រ័ន្ធអនឡាញខុសច្បាប់ ផ្ទុយនឹងសារាចរណែនាំរបស់រដ្ឋាភិបាល ចុះកាលពីថ្ងៃទី១៨ ខែសីហា ឆ្នាំ២០១៩ ស្ដីពីការពង្រឹងការគ្រប់គ្រងអាជីវកម្មភ្នាល់តាមម៉ាស៊ីនអេឡិចត្រូនិច តាមរយៈអ៊ីនធឺណិតអនឡាញក្នុងនិងក្រៅប្រទេសគ្រប់ប្រភេទនិងគ្រប់រូបភាពនៅកម្ពុជា។
វីអូឌី មិនអាចសុំការបំភ្លឺពីប្រធាននិយ័តករទូរគមនាគមន៍កម្ពុជា លោក ថោង ចិន្ដា និងអ្នកនាំពាក្យអគ្គស្នងការដ្ឋានគរបាលជាតិ លោក ឆាយ គឹមខឿន បានទេ នៅរសៀលថ្ងៃអង្គារនេះ។
ប្រធានមជ្ឈមណ្ឌលប្រជាពលរដ្ឋ ដើម្បីអភិវឌ្ឍន៍ និងសន្តិភាព លោក យង់ គិមអេង មានប្រសាសន៍គាំទ្រចំណាត់ការរបស់និយ័តករទូរគមនាគមន៍កម្ពុជា និងសមត្ថកិច្ចពាក់ព័ន្ធ ដែលបិទខ្ទប់គេហទំព័រចំនួន៧៩ ដោយសារលួចបើកល្បែងស៊ីសងខុសច្បាប់តាមប្រព័ន្ធអនឡាញនៅកម្ពុជា។
ករណីនេះ លោកបង្ហាញក្ដីកង្វល់ថា បើសិនជាអាជ្ញាធរពាក់ព័ន្ធ និង ន.ទ.ក មិនពង្រឹងការអនុវត្តច្បាប់ និងធ្វើការស្រាវជ្រាវរកគេហទំព័រឬទីតាំងដែលលួចបើកល្បែងស៊ីសងខុសច្បាប់បន្ថែមទៀត នៅក្នុងប្រទេសកម្ពុជា នោះបញ្ហាប្រឈមនឹងកើតមានដូចជា អំពើចោរកម្ម និងអសន្តិសុខក្នុងសង្គមជាដើម ។
លោកមានប្រសាសន៍ថា៖ «ល្បែងអនឡាញនេះ គឺធ្វើឱ្យយើងខាតបង់ច្រើន ទាំងចំណូលពន្ធរដ្ឋ ហើយវាបង្កជាវិនាសកម្មផ្សេងៗ ដូចជាមានអំពើល្មើសកើតឡើង ដែលធ្វើឱ្យប៉ះពាល់ទៅដល់មុខមាត់របស់ប្រទេសកម្ពុជាដែរ»។
លោកនាយករដ្ឋមន្ត្រី ហ៊ុន សែន កាលពីថ្ងៃទី១៨ ខែសីហា បានបញ្ជាទៅសមត្ថកិច្ចឱ្យបង្ក្រាបល្បែងស៊ីសងនៅតាមបណ្ដាញអ៊ីនធឺណិតដែលគ្មានអាជ្ញាបណ្ណទាំងអស់ និងបានហាមឃាត់ការចេញអាជ្ញាបណ្ណបន្តដល់ក្រុមហ៊ុនល្បែងស៊ីសងតាមបណ្ដាញអនឡាញ។
លោក ហ៊ុន សែន ក៏បានបញ្ជាក់ក្នុងសារាចរណែនាំថា ល្បែងភ្នាល់តាមប្រព័ន្ធអ៊ីនធឺណិតបានធ្វើឱ្យប៉ះពាល់ដល់សន្តិសុខ សណ្ដាប់ធ្នាប់សាធារណៈ និងរបៀបរៀបរយសង្គមកម្ពុជា។
ជាមួយគ្នានេះ និយ័តករទូរគមនាគមន៍កម្ពុជាអំពាវនាវទៅសាធារណជនឱ្យចូលរួមរាយការណ៍មកស្ថាប័នជាតិមួយនេះ តាមរយៈទូរសព្ទលេខ ៦៧៨៩ នៅរៀងរាល់ម៉ោងធ្វើការ ឬបណ្ដាញសង្គម Facebook «និយ័តករទូរគមនាគមន៍កម្ពុជា Telecommunication Regulator of Cambodia» នូវរាល់គេហទំព័រណាមួយដែលលួចបើកល្បែងស៊ីសងតាមប្រព័ន្ធអនឡាញ ហើយ ន.ទ.ក នឹងរក្សាការសម្ងាត់ជូនសាធារណជននោះផងដែរ៕