ទឹកជំនន់និងការរអិលបាក់ដី បានកាត់ផ្ដាច់ផ្លូវដែកទាំងអស់ក្នុងទីក្រុង Vancouver ប្រទេសកាណាដា និងបានឆក់យកជីវិតមនុស្សម្នាក់ ខណៈមនុស្ស២នាក់ផ្សេងទៀតកំពុងបាត់ខ្លួន។ នេះបើតាមការចុះផ្សាយដោយទីភ្នាក់ងារសារព័ត៌មាន Reuters។
ករណីភ្លៀងធ្លាក់ខ្លាំងក្នុងរយៈពេល២ថ្ងៃ នៅទូទាំងខេត្ត British Columbia បានបង្កឱ្យមានជាទឹកជំនន់ដ៏ធំ ដែលបានកាត់ផ្ដាច់ផ្លូវដែកនានាដំណើរការដោយ Canadian Pacific Rail (CP.TO) និង Canadian National Railway (CNR.TO) ដែលជាក្រុមហ៊ុនផ្លូវដែកដ៏ធំបំផុតចំនួន២របស់ប្រទេសកាណាដា។
ទាក់ទិននឹងករណីនេះ អ្នកនាំពាក្យកំពង់ផែមួយរូប លោក Matti Polychronis បានឱ្យដឹងថា៖ «រាល់សេវាកម្មផ្លូវដែកទាំងអស់ដែលចូលនិងចេញពីកំពង់ផែទីក្រុង Vancouver ត្រូវបានផ្អាក ដោយសារទឹកជំនន់ដែលកើតឡើងនៅក្នុងតំបន់ British Columbia»។
ជាមួយគ្នានេះ យ៉ាងហោចណាស់មនុស្សម្នាក់បានស្លាប់បាត់បង់ជីវិត ខណៈដែលការរអិលបាក់ដីបាននាំយករថយន្តចេញពីផ្លូវល្បឿនលឿនមួយនៅជិតតំបន់ Pemberton ដែលមានចម្ងាយប្រមាណជា១៦០គីឡូម៉ែត្រ នៃទីក្រុង Vancouver។
ក្រុមមន្ត្រីនានាបានបន្ថែមថា ក្រុមការងាររុករកនិងជួយសង្គ្រោះ បច្ចុប្បន្នក៏កំពុងតែបន្តកិច្ចការងារដើម្បីស្វែងរកអ្នកបាត់ខ្លួនដែលនៅរស់រានមានជីវិតឬជនរងគ្រោះបន្ថែមទៀតផងដែរ។
គួរបញ្ជាក់ថា ករណីភ្លៀងធ្លាក់ខ្លាំងដែលបានកើតឡើងនៅក្នុងខេត្ត British Columbia ភាគខាងត្បូងនេះ ក៏បានបង្ខំឱ្យមានការជម្លៀសប្រជាជនទៅកាន់ទីទួលសុវត្ថិភាព និងកាត់ផ្ដាច់ចរន្តអគ្គិសនីពលរដ្ឋនៅក្នុងតំបន់ជាង១៥ម៉ឺនគ្រួសារផងដែរ កាលពីថ្ងៃចន្ទ៕
