ប្រទេសន័រវេស នៅថ្ងៃអង្គារម្សិលមិញ បានជំរុញដល់ប្រទេសទាំងឡាយឱ្យចូលរួមចំណែកក្នុងមូលនិធិអង្គការសហប្រជាជាតិ តាមរយៈការផ្ដល់ជាសាច់ប្រាក់ដោយផ្ទាល់ដល់ជនជាតិអាហ្វហ្គានីស្ថាន ដើម្បីឱ្យពួកគេអាចបន្តរស់រានមានជីវិតបាន។ នេះបើតាមការឱ្យដឹងពីរដ្ឋមន្ត្រីការបរទេសរបស់ប្រទេសនេះ ដែលបានប្រាប់ទីភ្នាក់ងារសារព័ត៌មាន Reuters។
ខណៈដែលសេដ្ឋកិច្ចអាហ្វហ្គានីស្ថានធ្លាក់ចុះ អង្គការសហប្រជាជាតិ កាលពីខែតុលាកន្លងទៅ បានបង្កើតជាមូលនិធិមួយ ដើម្បីផ្ដល់ជំនួយដោយផ្ទាល់សម្រាប់គ្រួសារក្នុងតំបន់ដែលរងផលប៉ះពាល់ដោយសារតែការផ្ដាច់ជំនួយរបស់ប្រទេសមួយចំនួន បន្ទាប់ពីពួកតាលីបង់ឡើងកាន់អំណាចក្នុងខែសីហា។
ទាក់ទិននឹងករណីនេះ ប្រទេសន័រវេសបានសន្យាផ្ដល់ទឹកប្រាក់ចំនួន២០០លានក្រោនន័រវេស (NOK) ឬស្មើនឹងប្រមាណ២៣លានដុល្លារ ដល់មូលនិធិដែលគ្រប់គ្រងដោយកម្មវិធីអភិវឌ្ឍន៍របស់អង្គការសហប្រជាជាតិ (UNDP)។
រដ្ឋមន្ត្រីការបរទេសន័រវេស អ្នកស្រី Anniken Huitfeldt បានថ្លែងនៅក្នុងបទសម្ភាសន៍មួយមុនកិច្ចប្រជុំក្រុមប្រឹក្សាសន្តិសុខអង្គការសហប្រជាជាតិ (United Nations Security Council) ដែលនឹងធ្វើឡើងនៅថ្ងៃពុធនេះថា៖ «យើងសូមលើកទឹកចិត្តដល់ប្រទេសដទៃផ្សេងទៀតឱ្យធ្វើសកម្មភាពដូចគ្នានេះ ដើម្បីបញ្ចៀសវិបត្តិមនុស្សធម៌ និងគ្រោះទុរភិក្សដែលអាចកើតមានឡើង»។
អ្នកស្រីបន្តថា ប្រទេសន័រវេស ក៏កំពុងតែរៀបចំបញ្ជូនសាច់ប្រាក់ ដើម្បីជួយដល់អង្គការស្ត្រីនានានៅក្នុងប្រទេសអាហ្វហ្គានីស្ថានផងដែរ ខណៈដែលជំនួយមនុស្សធម៌របស់ប្រទេសន័រវេសដល់ប្រទេសនេះ នឹងមានចំនួនសរុប៣២៥លានក្រោនន័រវេសនៅឆ្នាំនេះ។
រដ្ឋមន្ត្រីការបរទេសដដែលបន្ថែមថា៖ «ខ្ញុំសង្ឃឹមថា ការពិភាក្សានៅក្នុងក្រុមប្រឹក្សាសន្តិសុខនឹងរួមចំណែកក្នុងការផ្ដល់ការយកចិត្តទុកដាក់មួយចំនួនចំពោះស្ថានភាពនៅក្នុងប្រទេសអាហ្វហ្គានីស្ថាន ដើម្បីកៀរគរមូលនិធិបន្ថែមទៀតសម្រាប់ប្រទេសនេះ»។
គួរបញ្ជាក់ថា អាហ្វហ្គានីស្ថានបានធ្លាក់ចូលទៅក្នុងវិបត្តិកាលពីខែសីហាកន្លងទៅ បន្ទាប់ពីពួកតាលីបង់បានដណ្តើមអំណាចយកមកគ្រប់គ្រង។
គិតចាប់តាំងពីឡើងកាន់អំណាចនេះ ក្រុមតាលីបង់ក៏បានប្រឈមមុខនឹងវិបត្តិសេដ្ឋកិច្ចធ្ងន់ធ្ងរ ខណៈរដ្ឋមន្ត្រីការបរទេសអាហ្វហ្គានីស្ថាន កាលពីពេលកន្លងទៅ ក៏ធ្លាប់បានអំពាវនាវដល់ម្ចាស់ជំនួយអន្តរជាតិនានាឱ្យចាប់ផ្ដើមជំនួយឡើងវិញដល់ប្រទេសនេះផងដែរ៕
