អភិបាលខេត្តកំពង់ស្ពឺអះអាងថា អាជ្ញាធរកំពុងរកអត្តសញ្ញាណជនល្មើសដែលទន្ទ្រានយកដីព្រៃចំនួន ៣១០ហិកតា យកធ្វើកម្មសិទ្ធិ ស្ថិតនៅឃុំត្រពាំងជោរ ស្រុកឱរ៉ាល់ ក្រោយអាជ្ញាធរបានដកហូតដីនោះយកមករក្សាទុកជាសម្បត្តិរដ្ឋវិញ។
កាលពីថ្ងៃទី១២ ខែវិច្ឆិកា ឆ្នាំ២០២១ រដ្ឋបាលខេត្តកំពង់ស្ពឺ បានចេញសេចក្តីប្រកាសព័ត៌មានមួយ ដោយលើកឡើងថា ដីព្រៃភ្នំឱរ៉ាល់ចំនួន ៣១០ហិកតា ស្ថិតនៅត្រង់ចំណុចត្រពាំងប្រមឹកភូមិសំរោង ឃុំត្រពាំងជោរ ស្រុកឱរ៉ាល់ ត្រូវបានអាជ្ញាធរដកហូតមកទុកជាសម្បត្តិរដ្ឋវិញ ក្រោយពីជនខិលខូចលួចកាប់ទន្ទ្រាន។ ក្រៅពីដកហូតនោះ អាជ្ញាធរខេត្ត ក៏បានទុករយៈពេល៣០ថ្ងៃ ដើម្បីឱ្យអ្នកពាក់ព័ន្ធនៅទីតាំងដីដែលត្រូវដកហូតនោះ អាចទៅតវ៉ា និងវែកញែករកខុសត្រូវផងដែរ។
អភិបាលខេត្តកំពង់ស្ពឺលោក វ៉ី សំណាង មានប្រសាសន៍បន្ថែមនៅថ្ងៃទី១៨ ខែវិច្ឆិកានេះថា អាជ្ញាធរមិនបានដឹងថា ជនខិលខូចដែលកាប់ទន្ទ្រានដីព្រៃជាង ៣០០ហិកតានោះ ធ្វើសកម្មភាពតាំងពីពេលណានោះឡើយ ដោយថា បច្ចុប្បន្នអាជ្ញាធរកំពុងស្រាវជ្រាវរកជនដែលនៅពីក្រោយនៃការបំផុសឱ្យពលរដ្ឋទៅកាប់ទន្ទ្រានដីព្រៃភ្នំឱរ៉ាល់ ដើម្បីមកដោះស្រាយនៅចំពោះមុខផ្លូវច្បាប់។
លោកថា៖ «ចង់និយាយថា គ្រប់បទល្មើសទាំងអស់ភាគច្រើនពួកគេជាជនទុច្ចរិក។ អ៊ីចឹងគេមិនងាយបង្ហាញអត្តសញ្ញាណឱ្យយើងដឹងទេ តែយើងក៏មិនព្រមប្រលែងដែរ។ យើងនៅតាមដាន ព្រោះអាជ្ញាយុកាលនៃបណ្ដឹងមានរយៈពេល ១៥ឆ្នាំ។ អ៊ីចឹងយើងអាចស្រាវជ្រាវ១០ទៅ១៥ ឆ្នាំអ៊ីចឹងទៅ ព្រោះវាជាចេះតែពូនចេះតែលាក់អ៊ីចឹង»។
មន្រ្តីពង្រឹងសិទ្ធិអំណាចសហគមន៍ នៃសមាគមការពារសិទ្ធិមនុស្សអាដហុក លោក ប៉ែន ប៊ុណ្ណារ៍ សង្កេតឃើញថា អាជ្ញាធរខេត្តកំពង់ស្ពឺ បានដកហូតដីព្រៃដែលកាប់ទន្ទ្រានបានច្រើន ប៉ុន្តែចំពោះជនដែលបានកាប់រុករាន និងទន្ទ្រានដីព្រៃទាំងនោះវិញ អាជ្ញាធរមិនទាន់ចាប់ខ្លួនបានម្នាក់មកផ្ដន្ទាទោសនៅឡើយ។
លើសពីនេះ លោកថា អាជ្ញាធរហាក់មិនបានបង្ហាញពាក់ព័ន្ធនឹងដីដែលដកហូតបាននោះ យកទៅធ្វើអ្វី ឬក៏ប្រគល់ទៅឱ្យបុគ្គលណាម្នាក់ជាសាធារណៈនៅឡើយ ដោយលោកសង្កេតឃើញថា ដីដែលដកហូតនៅតាមទីកន្លែងមួយចំនួន នាពេលកន្លងមក ត្រូវបានពុះជាដីឡូតិ៍លក់បន្តផងដែរ។
លោកថា៖ «យើងគិតថា ធ្វើឱ្យតែល្អមើល ពីព្រោះច្បាប់ចែងហើយ មិនមែនកាប់អស់ព្រៃឈើបានចេញដីកាដកហូតតាមពិតអស់៣០០ ហិកតា ហើយបែរជាចេញដីកាដកហូតតាមពិតមន្ត្រីជំនាញនគរបាលយុត្តិធម៌ និងចៅហ្វាយស្រុក ចៅហ្វាយខេត្ត និងមេឃុំអីហ្នឹងជាអ្នកត្រូវទៅបង្រ្កាប ហើយនាំជនល្មើស ដែលកាប់រានដីព្រៃឈើហ្នឹង មកផ្ដន្ទាទោសនៅតុលាការមិនមែនឱ្យកាប់រានរហូតដល់ ៣០០ហិកតា បានទើបចេញដីកាដកហូតថែមទាំងឱ្យអ្នកទាំងអស់នោះ មកតវ៉ាក្នុងរយៈពេលប៉ុន្មាន។ អ៊ីចឹងវាផ្ទុយនឹងច្បាប់ទាំងស្រុង វាជាគំរូអាក្រក់បើនិយាយទៅ»។
បើតាមរដ្ឋបាលខេត្តកំពង់ស្ពឺ ឱ្យដឹងថា ចាប់តាំងពីដើមឆ្នាំ២០២១ មកដល់បច្ចុប្បន្ន អាជ្ញាធរបានដកហូតដីព្រៃជាង ២០០ហិកតា នៅតំបន់ឱរ៉ាល់ ដោយមិនរួមបញ្ចូលទាំងការដកហូតលើកនេះផង ដែលដីព្រៃទាំងនោះត្រូវបានជនខិលខូចចូលកាប់ទន្ទ្រានកាន់កាប់ដោយខុសច្បាប់៕