ក្រសួងវប្បធម៌ និងវិចិត្រសិល្បៈ បានសម្រេចឱ្យសារមន្ទីរ រោងភាពយន្ត និងរោងសម្ដែងសិល្បៈចាប់បើកដំណើរការទទួលភ្ញៀវចូលទស្សនាឡើងវិញចាប់ពីថ្ងៃទី១៨ ខែវិច្ឆិកា ឆ្នាំ២០២១នេះតទៅ ប៉ុន្តែត្រូវគោរពឱ្យបានខ្ជាប់ខ្ជួននូវវិធានការរបស់ក្រសួងវប្បធម៌ និងក្រសួងសុខាភិបាលផងដែរ។
សេចក្ដីជូនដំណឹងរបស់ក្រសួងវប្បធម៌ និងវិចិត្រសិល្បៈកាលពីម្សិលមិញ ដែលបានជូនទៅកាន់ប្រធានមន្ទីរវប្បធម៌ ម្ចាស់រោងសម្ដែងសិល្បៈ ម្ចាស់រោងភាពយន្តតាមបណ្ដារាជធានី-ខេត្ត និងសាធារណជនអំពីការចាប់បើកដំណើរការឡើងវិញនូវកន្លែងទាំងនេះ។
យ៉ាងណា ក្រសួងបញ្ជាក់ថា ការបើកដំណើរការឡើងវិញនេះ ត្រូវគោរពតាមនូវវិធានការគោលការណ៍ស្ដង់ការប្រតិបត្តិ(SOP)ដែលរៀបចំឡើងដោយក្រសួងវប្បធម៌ និងវិចិត្រសីល្បៈ និងក្រសួងសុខាភិបាល ព្រមទាំងវិធានការក្រសួងសុខាភិបាលផ្សេងៗទៀត។
ប្រភពដដែលបានលើកឡើងថា«ក្រសួងវប្បធម៌និងវិចិត្រសិល្បៈ សម្រេចឱ្យបើកដំណើរការឡើវិញនូវការចូលទស្សនាសារមន្ទីរ រោងភាពយន្ត និងរោងសម្ដែងសិល្បៈ នៅតាមបណ្ដាខេត្តនានា ក្នុងព្រះរាជាណាចក្រកម្ពុជាចាប់ពីថ្ងៃទី១៨ខែវិច្ឆិកា ឆ្នាំ២០២១ នេះតទៅ ដោយត្រូវអនុវត្តឱ្យបានម៉តចត់បំផុតនូវវិធានការគោលការណ៍ស្ដង់ដាប្រតិបត្តិ (SOP)»។
គួរបញ្ជាក់ថាក្រសួងវប្បធម៌ និងវិចិត្រសិល្បៈបានសម្រេចឱ្យសារមន្ទីរ រោងភាពយន្ត និងរោងសម្ដែងសិល្បៈទូទាំងប្រទេស ផ្អាកដំណើរការចាប់តាំងពីថ្ងៃទី២១ ខែមីនា ឆ្នាំ២០២១ក្រោមហេតុផលដើម្បីបង្ការ និងទប់ស្កាត់ការឆ្លងរីករាលដាលជំងឺកូវីដ-១៩៕
