យោងតាមប្រភពចំនួនពីរបានឱ្យដឹងថា មេដឹកនាំរបបយោធាមីយ៉ាន់ម៉ា លោក Min Aung Hlaing មិនត្រូវបានអញ្ជើញឱ្យចូលរួមក្នុងកិច្ចប្រជុំកំពូលចិន-អាស៊ានដែលធ្វើឡើងនៅថ្ងៃចន្ទនេះទេ។
ប្រភពដដែលបានបន្តថា មីយ៉ាន់ម៉ាត្រូវបានកំណត់ឱ្យចូលរួមកិច្ចប្រជុំនេះដោយឯកអគ្គរដ្ឋទូតរបស់ខ្លួនប្រចាំប្រទេសចិនជំនួសវិញ។
ទោះជាយ៉ាងណា កិច្ចប្រជុំកំពូលនេះត្រូវបានប្រព្រឹត្តទៅដោយមិនឃើញមានវត្តមានរបស់តំណាងមីយ៉ាន់ម៉ានោះទេ។
គួរបញ្ជាក់ថា អាស៊ានកាលពីពេលកន្លងទៅ ក៏បានសម្រេចដកវត្តមានមេដឹកនាំយោធាមីយ៉ាន់ម៉ាមិនឱ្យចូលរួមក្នុងកិច្ចប្រជុំកំពូលអាស៊ានផងដែរ ដោយលើកឡើងពីកង្វះវឌ្ឍនភាពនៅក្នុងផែនទីបង្ហាញផ្លូវ ដើម្បីស្ដារសន្តិភាពរបស់ប្រទេសមួយនេះ ដែលរបបយោធាបានយល់ព្រមជាមួយតំបន់កាលពីខែមេសាកន្លងទៅ។
ប្រទេសមីយ៉ាន់ម៉ា បានធ្លាក់ចូលក្នុងភាពច្របូកច្របល់ គិតចាប់តាំងពីក្រុមយោធាបានដណ្ដើមយកអំណាចមកគ្រប់គ្រង កាលពីថ្ងៃទី១ ខែកុម្ភៈ និងបានផ្តួលរំលំរដ្ឋាភិបាលជាប់ឆ្នោតរបស់លោកស្រី អ៊ុងសាន ស៊ូជី ដែលបង្កឱ្យមានជាបាតុកម្មកើតឡើងជាញឹកញាប់នៅក្នុងប្រទេស ក្នុងនោះ ជនស៊ីវិលជាង១ ០០០នាក់ក៏ត្រូវបានសម្លាប់នៅក្នុងការបង្ក្រាបកូដកម្មនិងបាតុកម្មនានាផងដែរ៕
