ក្រុមគ្រួសារក្មេងស្រីដែលត្រូវបានគេរំលោភសម្លាប់ នៅស្រុកចំការលើ ខេត្តកំពង់ចាម ទទូចឱ្យសមត្ថកិច្ចស្វែងរកឃាតករយកមកផ្ដន្ទាទោស ធ្វើយ៉ាងណាកុំឱ្យករណីនេះកើតឡើងទៅលើក្មេងស្រីដទៃទៀត។
ការស្នើនេះធ្វើឡើងក្រោយមានព័ត៌មានផ្សព្វផ្សាយពីមន្ត្រីមូលដ្ឋាន និងអ្នកប្រើប្រាស់បណ្ដាញសង្គមថា ក្មេងស្រីវ័យ១៦ឆ្នាំ ជាសិស្សថ្នាក់ទី១២ នៃវិទ្យាល័យមួយនៅស្រុកចំការលើ ខេត្តកំពង់ចាម ត្រូវបានជនល្មើសមួយក្រុមរំលោភសម្លាប់ ក្រោយចេញពីសាលារៀនត្រលប់ទៅផ្ទះវិញ។
ម្តាយមីងរបស់ក្មេងស្រីរងគ្រោះ អ្នកស្រី រ៉ាន់ វាសនា បានឱ្យដឹងនៅថ្ងៃទី២២ ខែវិច្ឆិកានេះថា អ្នកស្រីចង់ឱ្យសមត្ថកិច្ចស្វែងរកឃាតករមកផ្ដទ្ទាទោសតាមច្បាប់ ដើម្បីផ្ដល់យុត្តិធម៌ជូនក្មួយរបស់គាត់។
អ្នកស្រីនិយាយថា៖ «ចង់ឱ្យចាប់ឱ្យបាន [ដើម្បី] យកមកផ្ដន្ទាទោស! ហើយ [ចង់ឱ្យសមត្ថកិច្ចជួយ] ធ្វើម៉េចកុំឱ្យថ្ងៃក្រោយមានរឿងអ៊ីចឹងទៀតចំពោះក្មេងស្រីដទៃ។ ក្រុមគ្រួសារខ្ញុំគេថា បើចាប់ជនល្មើសបាន គាត់ចង់សុំមើលមុខជនល្មើសបន្តិច»។
សមាជិកក្រុមប្រឹក្សាឃុំចំការអណ្ដូង ស្រុកចំការលើ លោក អ៊ិត និត្យ លើកឡើងថា នៅកន្លែងកើតហេតុ នាថ្ងៃទី២០ ខែវិច្ឆិកា វេលាម៉ោង៥រសៀល គេឃើញមានសាកសពនារីម្នាក់ និងម៉ូតូរបស់ជនរងគ្រោះ ព្រមទាំងម៉ូតូ១គ្រឿងទៀតដែលទំនងជារបស់ជនសង្ស័យ ទើបជាហេតុឱ្យអាជ្ញាធរអាចកំណត់មុខសញ្ញាជនសង្ស័យបានម្នាក់។
លោកបន្តថា៖ «ធ្លាប់តែឃើញ [ករណីរំលោភសម្លាប់នៅ] ខេត្តនានា ដល់ពេលឃុំខ្ញុំ ករណីទី១ហើយ។ អារម្មណ៍របស់ខ្ញុំគឺអាណិតក្មេងស្រីដែលគាត់ជាក្មេងកំព្រា មានតែម្ដាយ ហើយម្ដាយទៅថៃទៀត រស់នៅជាមួយយាយ។ គាត់ទៅរៀននៅវិទ្យាល័យសម្ដេចហ៊ុនសែនថ្នល់បែក រវាងពីភូមិលេខ២ មកដល់ភូមិ១១ មានចំនួន៤ទៅ៥គីឡូម៉ែត្រ វាស្ងាត់ហើយ តាមផ្លូវកៅស៊ូទៀត អត់មានផ្ទះពលរដ្ឋទេ ដាច់ស្រយាល»។
ចំណែកមេភូមិ១១ ឃុំចំការអណ្ដូង លោក ឃឹម នាត មានប្រសាសន៍ថា៖ «ខ្ញុំមើលទៅប្រជាពលរដ្ឋ ក៏ដូចជាក្មេងស្រីក្នុងភូមិ ពេលមានបញ្ហានេះកើតឡើង ធ្វើឱ្យក្មេងដែលទៅរៀននៅសាលាមានការតក់ស្លុតភ័យខ្លាចណាស់ដែរ»។
បើតាមលោក ឃឹម នាត មន្ត្រីជំនាញដាក់ការសង្ស័យថា ជនប្រព្រឹត្តិប្រហែលមានសមាជិក៥នាក់។ យ៉ាងណា លោកថា ករណីនេះ មន្ត្រីពាក់ព័ន្ធកំពុងធ្វើការស៊ើបអង្កេតដើម្បីចាប់ជនល្មើស ខណៈមកទល់ល្ងាចថ្ងៃចន្ទនេះ សមត្ថកិច្ចផ្ដល់ព័ត៌មានមកអាជ្ញាធរមូលដ្ឋានថា ចាប់បានជនសង្ស័យម្នាក់អាយុជាង១០ឆ្នាំ។
នាយនគរបាលប៉ុស្តិ៍រដ្ឋបាលឃុំចំការអណ្ដូង លោក ញ៉ែម អុល មានប្រសាសន៍យ៉ាងខ្លីថា សមត្ថកិច្ចចាប់ជនសង្ស័យបានម្នាក់ហើយនៅថ្ងៃចន្ទនេះ។
លោកបញ្ជាក់ថា៖ «ចាប់ជនសង្ស័យបានម្នាក់ ទើបឃាត់ខ្លួនថ្ងៃមិញហ្នឹង។ យើងកំពុងធ្វើការបន្ត»។
អាជីវករលក់ភេសជ្ជៈនៅរាជធានីភ្នំពេញ អ្នកស្រី ទូច ចាន់ណា ដែលបានឃើញព័ត៌មាននេះលើបណ្ដាញសង្គមហ្វេសប៊ុក និយាយថា ករណីនេះគឺជារឿងឃោរឃៅ និងទាមទារឱ្យសមត្ថកិច្ចចាត់វិធានការឱ្យបានតឹងរ៉ឹងលើជនល្មើស។
អ្នកស្រីបន្តថា៖ «ករណីរំលោភសម្លាប់ហ្នឹង វាកើតឡើងដោយសារការមើលរឿងច្រើន [វីដេអូអាសអាភាស] ត្រាប់តាមច្រើនពេក ទូរសព្ទបញ្ចេញឱ្យឃើញច្រើនពេក បានទៅជាមិនថាក្មេង មិនថាចាស់ ភាគច្រើនចេញមកពីរឿងហ្នឹងទាំងអស់»។
នាយករងទទួលបន្ទុកកម្មវិធីឃ្លាំមើលនៃអង្គការលីកាដូ លោក អំ សំអាត មានប្រសាសន៍ថា ជាធម្មតា បើសិនជាបទល្មើសនៃការរំលោភសេពសន្ថវៈ មិនថារំលោភសម្លាប់ ឬរំលោភមិនសម្លាប់ឡើយ បើកើតឡើងច្រើនករណី នោះបទល្មើសឧក្រិដ្ឋក៏កើតច្រើនដែរ។
លោកថា ករណីនេះ សមត្ថកិច្ចគប្បីស៊ើបអង្កេតរកជនល្មើសយកមកផ្ដន្ទាទោសតាមច្បាប់ឱ្យខានតែបាន។
លោក អំ សំអាត បន្តថា៖ «ក្រមព្រហ្មទណ្ឌគេមានចែងហើយ យើងអត់មានទោសប្រហារជីវិត ប៉ុន្តែមានទោស [ជាប់ពន្ធនាគារ] អស់មួយជីវិត។ គាត់អាចជាប់ទោសអស់មួយជីវិត បើសិនជាចូលលក្ខខណ្ឌដែលសាហាវឃោរឃៅ ដែលត្រូវកាត់ទោសអស់មួយជីវិត។ អ៊ីចឹងយើងត្រូវអនុវត្តឱ្យបានតឹងរ៉ឹង។ ទី២ គឺចាត់វិធានការផ្លូវច្បាប់ឱ្យបានតឹងរ៉ឹង បានន័យថា ការស៊ើបអង្កេត ការស្រាវជ្រាវ ត្រូវតែស្វែងរកជនដែលបង្ក ដោយយកទៅអនុវត្តតាមផ្លូវច្បាប់ឱ្យបានតឹងរ៉ឹង»។
លោកក៏បានជំរុញដល់រដ្ឋាភិបាលគួរតែពិនិត្យទៅលើដើមចមដែលធ្វើឱ្យមានករណីរំលោភសេពសន្ថវៈកើតឡើងច្រើន ហើយស្ថាប័នពាក់ព័ន្ធត្រូវមានយន្តការមួយចំនួន ដើម្បីទប់ស្កាត់កុំឱ្យបទល្មើសទាំងនោះកើតបន្តទៀត។
បើតាមមន្ត្រីសង្គមស៊ីវិលរូបនេះ ក្នុងមួយឆ្នាំៗ អង្គការលីកាដូទទួលបានការពឹងពាក់ពីជនរងគ្រោះ មិនតិចជាង២០០ករណីទេ ពាក់ព័ន្ធការរំលោភសេពសន្ថវៈលើស្រ្តី និងកុមារ នៅ១៤ខេត្ត-រាជធានី ដែលមានមន្ត្រីអង្គការនេះធ្វើការ។ ប៉ុន្តែលោកថា នៅទូទាំងប្រទេសអាចមានច្រើនករណីទៀត៕