ប្រមុខរដ្ឋាភិបាលឱ្យដឹងថា កម្ពុជាបានចំណាយថវិកាអស់ប្រមាណ២ ៣០០លានដុល្លារអាមេរិក សម្រាប់ដោះស្រាយបញ្ហាការរាតត្បាតនៃជំងឺកូវីដ-១៩ ដែលចំនួននេះស្មើនឹងតម្លៃសាងសង់ស្ពានរហូតដល់២០ស្ពាន។
នៅក្នុងពិធីសម្ពោធស្ពានឆ្លងទន្លេមេគង្គស្ទឹងត្រង់-ក្រូចឆ្មារ និងការបើកការដ្ឋានសាងសង់ផ្លូវជាតិលេខ៧១C នៅថ្ងៃអង្គារនេះ លោកនាយករដ្ឋមន្ត្រី ហ៊ុន សែន បានលើកឡើងថា កន្លងមក រដ្ឋាភិបាល បានដាក់ផែនការឱ្យក្រសួងសេដ្ឋកិច្ច និងហិរញ្ញវត្ថុ សន្សំសាច់ប្រាក់ ដើម្បីបម្រុងទុកសម្រាប់សាងសង់ហេដ្ឋារចនាសម្ព័ន្ធចាំបាច់នានា ដែលការសន្សំនោះមានទឹកប្រាក់ប្រមាណជាង៤ ០០០លានដុល្លារអាមេរិក។
តែយ៉ាងណា លោកថា ដោយសារមានវិបត្តិកូវីដ-១៩ បានធ្វើឱ្យកម្ពុជាត្រូវដកថវិកាមួយចំនួនធំ សម្រាប់ការចំណាយនិងដោះស្រាយបញ្ហានានាជូនប្រជាពលរដ្ឋ។
លោកបានថ្លែងថា៖ «ខ្ញុំមានការសោកស្ដាយនៅត្រង់ថា អាកូវីដ-១៩ វាបានស៊ីស្ពានរបស់ខ្ញុំអស់ប្រហែលជា២០ស្ពាន គិតតម្លៃខ្ពស់ផង […] គោលដៅរបស់ខ្ញុំ ហោចណាស់ប្រើ ២ភាគ៣ ដើម្បីសម្រុកលើហេដ្ឋារចនាសម្ព័ន្ធចាំបាច់ ដូចជាការសាងសង់ស្ពានជាដើម […] ប៉ុន្តែមិននឹកស្មានថា អាកូវីដ-១៩ វាទទួលទានអស់២ ៣០០លានដុល្លារ ដើម្បីដោះស្រាយបញ្ហាកូវីដ អ៊ីចឹងធ្វើឱ្យយើងត្រូវបន្តស្នើសុំមិត្តចិនជួយបន្តទៀត»។
គួរបញ្ជាក់ថា កម្ពុជាបានប្រកាសរកឃើញករណីវិជ្ជមានកូវីដ-១៩ ជាលើកដំបូង ទៅលើបុរសជនជាតិចិនម្នាក់ដែលស្នាក់នៅខេត្តព្រះសីហនុ កាលពីថ្ងៃទី២៧ ខែមករា ឆ្នាំ២០២០ ហើយជំងឺផ្លូវដង្ហើមមួយនេះបានឆ្លងរាលដាលចូលដល់សហគមន៍ជាបន្តបន្ទាប់រហូតមកដល់បច្ចុប្បន្ននេះ។
បើតាមក្រសួងសុខាភិបាល គិតត្រឹមព្រឹកថ្ងៃអង្គារនេះ កម្ពុជាបានរកឃើញអ្នកឆ្លងជំងឺកូវីដ-១៩ សរុបចំនួន១១៩ ៩៤៣នាក់ ក្នុងនោះ អ្នកជំងឺព្យាបាលជាសះស្បើយចំនួន១១៦ ៣២០នាក់ អ្នកស្លាប់កើនដល់ចំនួន២ ៩០៩នាក់ និងករណីនាំចូលពីក្រៅប្រទេសចំនួន១៩ ៧៨៧នាក់៕
