នាយកប្រតិបត្តិនៃអង្គការតម្លាភាពកម្ពុជា លោក ប៉ិច ពិសី លើកឡើងថា ជាគំរូល្អសម្រាប់មន្ត្រីផ្សេងៗទៀត បើសិនជាលោក ម៉ៅ ធនិន អភិបាលខេត្តកំពត ព្រមលាតត្រដាងពីប្រភពទ្រព្យសម្បត្តិប្រាប់ទៅសាធារណជនមួយចំនួនដែលមានការសង្ស័យជាប់ពាក់ព័ន្ធអំពើពុករលួយនោះ។
រូបភាពនិងវីដេអូភូមិគ្រឹះរបស់លោក ម៉ៅ ធនិន ដែលសាងសង់ឡើងដោយឈើប្រណិត ត្រូវបានចែកចាយនៅលើបណ្ដាញសង្គមជាបន្តបន្ទាប់។ មតិខ្លះបានលើកឡើងថា ទ្រព្យសម្បត្តិដែលមានច្រើននេះមិនសមាមាត្រទៅនឹងប្រាក់ខែមន្ត្រីរាជការ។
គណនីហ្វេសប៊ុកឈ្មោះ Chham Channy ជាអ្នកប្រើប្រាស់បណ្ដាញសង្គមហ្វេសប៊ុកម្នាក់ក្នុងចំណោមអ្នកលេងហ្វេសប៊ុកផ្សេងទៀត លើកឡើងពីចម្ងល់នៃប្រភពទ្រព្យសម្បត្តិរបស់លោក ម៉ៅ ធនិន ដោយមានភ្ជាប់ជាមួយរូបភូមិគ្រឹះ រូបលោក ម៉ៅ ធនិន និងសំណួរ។
គណនី Chham Channy បញ្ចេញមតិក្នុងរូបភាពនិងវីដេអូនោះថា៖ «ឥលូវអ៊ុំសួរឯង តើឯងដឹងទេថាអ៊ុំបានលុយពីណាមកសង់ផ្ទះលើដី៧ហិកតា?»
ម្ចាស់គណនីដែលប្រើប្រាស់យូធូប ឈ្មោះ DaDa បានបញ្ចេញមតិថា៖ «អ្នកធ្វើការរាជការ តើប្រាក់ប៉ុន្មានបានធ្វើភូមិគ្រឹះរាប់លានអ៊ីចឹង»។
ម្ចាស់គណនីដែលប្រើប្រាស់យូធូប ឈ្មោះ BOB បានចោទជាសំណួរដែរថា៖ «ប្រាក់ខែប៉ុន្មាន? ឋានៈត្រឹមអភិបាលខេត្ត! សូមបងប្អូនពិចារណា»។
លោក ម៉ៅ ធនិន ជាអតីតអភិបាលខេត្តពោធិ៍សាត់ ហើយទើបផ្លាស់ប្ដូរឱ្យទៅគ្រប់គ្រងខេត្តកំពត។ លោកត្រូវបានពលរដ្ឋស្គាល់តាមរយៈការសម្របសម្រួលរបស់លោក ក្នុងការដោះស្រាយវិវាទក្រៅប្រព័ន្ធតុលាការ ហើយថតផ្សព្វផ្សាយតាមបណ្ដាញសង្គមហ្វេសប៊ុក។
លោក ប៉ិច ពិសី មានប្រសាសន៍ថា ជាគោលការណ៍ច្បាប់ មិនបានតម្រូវឱ្យអភិបាលខេត្តបកស្រាយទ្រព្យសម្បត្តិរបស់ខ្លួនប្រាប់ទៅសាធារណជននោះទេ។ ប៉ុន្តែលោកថា បើសិនជាលោក ម៉ៅ ធនិន ស្ម័គ្រចិត្តបកស្រាយដោយខ្លួនឯងនោះ គឺជារឿងល្អ ដែលអាចលុបបំបាត់មន្ទិលសង្ស័យរបស់សាធារណជនមួយចំនួនបាន។
លោក ប៉ិច ពិសី ថ្លែងថា៖ «បើសិនជាគាត់ [លោក ម៉ៅ ធនិន] ស្ម័គ្រចិត្តបកស្រាយឬពន្យល់ អាហ្នឹងគឺជាគំរូមួយ! បើសិនមន្រ្តីណាចង់បង្ហាញតម្លាភាពរឿងហ្នឹង វាជាគំរូល្អមួយ យើងលើកទឹកចិត្ត»។
លោក ប៉ិច ពិសី បញ្ជាក់ផងដែរថា ករណីគ្រាន់តែឃើញមន្ត្រីមានទ្រព្យសម្បត្តិច្រើន មិនអាចសន្មតថាមន្ត្រីនោះពាក់ព័ន្ធអំពើពុករលួយបានទេ លើកលែងតែមានភស្តុតាងមកបញ្ជាក់បន្ថែម។
នៅថ្ងៃទី១៩ ខែវិច្ឆិកា ឆ្នាំ២០២១ វីអូឌី បានព្យាយាមសុំការអត្ថាធិប្បាយពីលោក ម៉ៅ ធនិន ដើម្បីសុំឱ្យមានការបកស្រាយលើករណីនេះ។ ដំបូងឡើយ ទូរសព្ទភ្ជាប់ការសន្ទនាបានធម្មតា ដល់ពេលដែលចោទសួររឿងប្រភពទ្រព្យសម្បត្តិរបស់លោក ទូរសព្ទក៏ដាច់ ហើយហៅចូលជាច្រើនដងទៀត តែមិនមានអ្នកទទួល។
នៅថ្ងៃទី២២ ខែវិច្ឆិកា អ្នកសារព័ត៌មាន វីអូឌី ព្យាយាមទាក់ទងទៅលោកអភិបាលខេត្តរូបនេះម្តងទៀត ហើយលោកទទួលទូរសព្ទ តែមិនបកស្រាយមន្ទិលសង្ស័យរបស់អ្នកប្រើប្រាស់បណ្ដាញសង្គម ជុំវិញប្រភពទ្រព្យសម្បត្តិរបស់លោកនោះទេ។
លោក ម៉ៅ ធនិន ថ្លែងថា៖ «បងគ្មានអីដែលត្រូវឆ្លើយជាមួយប្អូនទេ! បងសុំទោស»។
តាមអនុក្រឹត្យស្ដីពីការដំឡើងប្រាក់ឧបត្ថម្ភប្រចាំខែដល់សមាជិកក្រុមប្រឹក្សារាជធានី-ខេត្ត ក្រុង- ស្រុក-ខណ្ឌ ឃុំ-សង្កាត់ និងមន្ត្រីភូមិ ចុះថ្ងៃទី១៧ ខែមីនា ឆ្នាំ២០១៧ គឺអភិបាលខេត្តទទួលបាន១ ២១០ ០០០រៀល។ ចំណែកអនុក្រឹត្យស្ដីពីការកែប្រែនិងការដំឡើងប្រាក់ដំណាច់មុខងារមន្ត្រីរាជការស៊ីវិល ចុះថ្ងៃទី១៧ ខែមីនា ឆ្នាំ២០២០ គឺអភិបាលខេត្តទទួលបាន១ ០៣០ ០០០រៀល។
អង្គការតម្លាភាពអន្តរជាតិ (Transparency International) ដែលមានមូលដ្ឋាននៅទីក្រុងប៊ែរឡាំង ប្រទេសអាល្លឺម៉ង់ បានចេញផ្សាយរបាយការណ៍មួយនៅដើមឆ្នាំ២០២១ ឱ្យដឹងថា កម្ពុជាជាប់ចំណាត់ថ្នាក់ទី១៦០ ក្នុងចំណោមប្រទេសចំនួន១៨០នៅទូទាំងពិភពលោក។
ចំណាត់ថ្នាក់នេះបានបង្ហាញថា កម្ពុជានៅតែជាប្រទេសពុករលួយជាងគេបំផុតក្នុងចំណោមប្រទេសទាំង១០នៅតំបន់អាស៊ាន ដែលមានអំពើពុករលួយចាក់ឫសទាំងវិស័យសាធារណៈនិងវិស័យឯកជន។
របាយការណ៍បានសរសេរថា៖ «នៅកម្រិតតំបន់ ប្រទេសកម្ពុជាបន្តស្ថិតនៅក្នុងចំណោមប្រទេសមានពិន្ទុទាបជាងគេទី៣ នៅតំបន់អាស៊ីប៉ាស៊ីហ្វិក នៅលើតែប្រទេសអាហ្វហ្គានីស្ថាន និងកូរ៉េខាងជើងតែប៉ុណ្ណោះ ហើយក៏ជាប្រទេសមានពិន្ទុទាបជាងគេក្នុងតំបន់អាស៊ានផងដែរ»។
ដើម្បីកាត់បន្ថយអំពើពុករលួយ និងជំរុញឱ្យមានតម្លាភាពសង្គម អង្គការតម្លាភាពកម្ពុជា បានអំពាវនាវឱ្យរដ្ឋាភិបាលពន្លឿនរបៀបវារៈនិងធ្វើការកែទម្រង់នូវចំណុចមួយចំនួន រួមមាន ការធ្វើវិសោធនកម្មមាត្រាមួយចំនួនក្នុងច្បាប់ប្រឆាំងអំពើពុករលួយ ជាពិសេសច្បាប់ស្ដីពីការប្រកាសទ្រព្យសម្បត្តិមន្រ្តីរាជការ ការបង្កភាពងាយស្រួលឱ្យមានការចូលរួមយ៉ាងសកម្មពីសង្គមស៊ីវិល ប្រព័ន្ធផ្សព្វផ្សាយ និងប្រជាពលរដ្ឋ តាមដានពីតម្លាភាពសង្គម រួមទាំងពង្រឹងការអនុវត្តច្បាប់ដោយស្មើភាព ជាដើម៕